Vishnudharmottara Purana · Chapter 1.3

//mārkaṇḍeya uvāca //
brahmarātryāṃ vyatītāyāṃ vibuddhe padmasambhave //
viṣṇuḥ sisṛkṣurbhūtānāṃ jñātvā bhūmiṃ jalāntagām

jalakrīḍāruci śubhaṃ kalpādiṣu yathā purā //
vārāhamāsthito rūpamujjahāra vasundharām

vedapādyūpadaṃṣṭraśca caturvaktraścaturmukhaḥ //
agnijihvo darbharomā brahmaśīrṣo mahātapāḥ

ahorātrekṣaṇo divyo vedāṅgaḥ śrutibhūṣaṇaḥ //
ājyanāsaḥ sruvatuṇḍaḥ sāmaghoṣasvano mahān //

dharmaḥ satyamahāḥ śrīmānkarmavikramasatkṛtaḥ //
prāyaścittamayo dhīraḥ prāṃśujānurmahāyaśāḥ //
udgātraṃtro homaliṅgaḥ phalabījamahauṣadhiḥ

vāyvantarātmā mantrāsthirvikṛtaḥ somaśoṇitaḥ //
vedaskaṃdho havirgandho havyakavyātivegavān

prāgvaṃśakāyo dyutimānnānādīkṣābhiranvitaḥ //
dakṣiṇāhṛdayo yogī mahākratumayo mahān

upākarmeṣṭiruciraḥ pravargyāvartabhūṣaṇaḥ//
māyāpatnīsahāyo vai mahāśṛṃṅga ivoditām

mahīṃ sāgara paryantāṃ saśailavanakānanām //
ekārṇavajalabhraṣṭāmekārṇavagataḥ prabhuḥ

daṃṣṭrāgreṇa samuddhṛtya lokānāṃ hitakāmyayā //
ādidevo mahāyogī cakāra jagatīṃ punaḥ

evaṃ jñātvā varāheṇa bhūtvā bhūtahitārthinā //
uddhṛtā pṛthivī devī jalamadhyagatā purā

uddhṛtya bhūmiṃ sa vibhurmahātmā varāharūpeṇa jalāntarasthām //
cakre vibhāgaṃ jagatastadīśo yathāyathā tacchṛṇu rājasiṃha

iti śrīviṣṇudharmo'ttare prathamakhaṇḍe mārkaṇḍeyavajrasaṃvāde varāhaprādurbhāvo nāma tṛtīyo'dhyāyaḥ