Vishnudharmottara Purana · Chapter 1.2

// mārkaṇḍeya uvāca // //
nārāyaṇaṃ namaskṛtya sarvabhūtaparāyaṇam //
lakṣmīsahāyaṃ varadaṃ śeṣaparyaṅkaśāyinam

jagato'sya samutpattisthitināśaikakāraṇam //
jñānajñeyaṃ jñānagamyaṃ hṛdi sarvasya saṃsthitam

vakṣyāmi jagatāṃ rājansamutpattiṃ nibodha tām //
sarvapāpapraśamanīmāyuṣyāṃ svargadāṃ śivām

nārāyaṇo'sya jagataḥ sṛṣṭisaṃhārapālanam //
karoti jagatīpāla yasya sarvamidaṃ mahān

vedeṣu gīyate yo'sau puruṣaḥ pañcaviṃśakaḥ //
anādinidhano dhātā tvanantaḥ puruṣottamaḥ

yasyonmeṣastu divaso brahmaṇaḥ parameṣṭhinaḥ //
nimeṣastu tathā rātristacca kalpaṃ prakīrtitam

puruṣatve tvanantasya na rūpaṃ nṛpa vidyate //
na ca śabdo na ca ghrāṇaḥ sparśo vā pṛthivīpate

na tasya parimāṇaṃ vā na cādirnidhanaṃ kutaḥ //
sarvataḥ pāṇipādāntaḥ sarvatokṣiśiromukhaḥ

sarvataḥ śrutimām̐lloke sarvamāvṛtya tiṣṭhati //
sarvendriyaguṇābhāsaṃ sarvendriyavivarjitam

asaktaṃ sarvabhṛccaiva nirguṇaṃ guṇabhoktṛ ca //
taṃ ca prāpya bhavantīha ye muktāḥ puruṣottamāḥ

sugatiryogasiddhānāṃ tasmātsarvasya sambhavaḥ //
tasmādbhavati cāvyaktastasmādātmāpi jāyate

tasmādbuddhirmanastasmāttataḥ khaṃ pavanastataḥ //
tasmāttejastatastvāpastebhyoṇḍamabhavatkila

aṇḍo hiraṇmayo rājaṃstasyāntaḥ svayameva hi //
śarīragrahaṇaṃ pūrvaṃ sṛṣṭyarthaṃ kurute prabhuḥ

brahmā caturmukho devo rajomātrādhikaḥ sadā //
śarīragrahaṇaṃ kṛtvā sṛjatīdaṃ carācaram

aṇḍasyāntarjagatsarvaṃ sadevāsuramānuṣam //
saptalokān sapātālānsaptadvīpārṇavāṃ mahīm

sṛṣṭiṃ kṛtvā sa bhagavān sāttvikīmāsthitastanum //
kṣīrode keśavo bhūtvā śeṣabhogamayaḥ prabhuḥ

lakṣmīsahāyo lokāṃstu sarvānpālayate sadā //
yoganidrāṃ samāsthāya sarvasattvaśarīragaḥ

śubhāśubhāni karmāṇi sarveṣāṃ sa hi paśyati //
antakāle haro bhūtvā jagatsaṃharate punaḥ

tāmasīṃ tanumāsthāya līlayaiva mahāyaśāḥ //
brahmāto sṛṣṭikāle tu jalamadhyagatāṃ mahīm

dṛṣṭvoddharati yajñātmā vārāhīmāsthitastanum //
brahmāsya sarge paripālane ca viṣṇurmahātmā bhavatīha nityam//
saṃhārakāle ca haratvameti traidhaṃ vidhatte sa trikālayogāt

iti śrīviṣṇudharmottare prathamakhaṇḍe mārkaṇḍeyavajrasaṃvāde hiraṇyagarbhotpattikathano nāma dvitīyo'dhyāyaḥ