વિષ્ણુધર્મોત્તરપુરાણમ્ · અધ્યાય 1.28

માર્કણ્ડેય ઉવાચ ॥
રુદ્રલોકમથાસાદ્ય દદૃશુસ્ત્ર્યમ્બકં તદા ॥
વહ્નિપુઞ્જપ્રકાશેન જટાભારેણ રાજિતમ્

સૂર્યભાસા તૃતીયેન નયનેન ચ શોભિતમ્ ॥
ભાલચન્દ્રેણ શુભ્રેણ જટામણ્ડલશોભિના

વ્યાલયજ્ઞોપવીતશ્ચ નાગેશ્વરકૃતાંશુકમ્ ॥
નીલકણ્ઠં વિશાલાક્ષદન્તિચર્મોત્તરચ્છદમ્॥

ઉમાસહાયં વરદં સર્વભૂતભવોદ્ભવમ્ ॥
નન્દિનાનુગતં વીરં પ્રમથૈશ્ચ સહસ્રશઃ

નાનાવક્ત્રશિરોગ્રીવૈર્નાનાયુધવિભૂષણૈઃ ॥
તં દૃષ્ટ્વા પ્રણતઃ પ્રાહ શક્રસ્તુ ગુરુણા સહ

શક્ર ઉવાચ ॥
નમોઽસ્તુ દેવદેવેશ પ્રણતાર્તિવિનાશન ॥
નીલકણ્ઠ મહાભાગ હ્યુમાભૂષણતત્પર

ગઙ્ગાતરઙ્ગનિર્ધૌતજટામણ્ડલમણ્ડિત! ॥
શશાઙ્કશતસંકાશ સૂર્યકોટિસમપ્રભ

વામનૈર્જટિલૈર્મુણ્ડૈઃ પ્રમથૈરીડ્યસે સદા ॥
તૈશ્ચ સાર્ધં મહાદેવ રમસેઽમિતવિક્રમ

ઘોરં હિ બ્રહ્મચર્યં તે યથા નાન્યસ્ય કસ્યચિત્ ॥
તવ લિઙ્ગાર્ચનરતાઃ પૂયન્તે સર્વકિલ્બિષૈઃ

સ્મરન્તિ યે ત્વાં સતતં તે હિ યાન્તિ પરાં ગતિમ્ ॥
વિષ્ણોરચિન્ત્યભાગોઽસિ પ્રજાસંહરણે કૃતે

સર્વદેવમયો ધાતા સર્વદેવમયોઽપિ ચ ॥
સર્વદેવવરેણ્યસ્ત્વં સર્વભૂતવિભાવનઃ

સર્વામરગુરુર્દેવઃ સર્વભૂતેશ્વરેશ્વરઃ ॥
સર્વદેવો મહાયોગી મહાજયો મહાબલઃ

મહાબુદ્ધિર્મહાવીર્યો મહાતેજા મહાયશાઃ॥
ચતુષ્પાત્સકલો ધર્મો વાહનસ્તે મહાવૃષઃ

શ્મશાને વસતિર્નિત્યં ચિતાધૂમસમાકુલે ॥
નૃત્યદ્ભૂતાકુલે ભૂમેર્ભૂતિશ્વેતાનુલેપનઃ

ભૂખાર્કવર્ચઃસલિલયજમાનેન્દુવાયવઃ ॥
મૂર્ત્તયસ્તે સ્મૃતા દેવ યાભિર્વ્યાપ્તમિદં જગત્

ત્વયા વિના જગત્યસ્મિન્નાન્યત્કિઞ્ચન વિદ્યતે ॥
દૈત્યભારાભિતપ્તાઙ્ગાં પાલયસ્વ નમોઽસ્તુ તે

માર્કણ્ડેય ઉવાચ ॥
એવમુક્તસ્તુ શક્રેણ દેવઃ શક્રમભાષત ॥
કાર્તવીર્યમહં ત્વાજૌ કર્તા નિઃક્ષત્રિયાં મહીમ્

ન શક્તસ્ત્રિદશશ્રેષ્ઠ યતઃ સ્મર્તાસ્મિ તદ્વધમ્ ॥
વિષ્ણુદત્તવરો રાજા સોઽવધ્યો મમ વાસવ

તમેવ પ્રાર્થયિષ્યામિ વધં તસ્ય મહાત્મનઃ ॥
સર્વે યાત સ્વકં સ્થાનં ત્વહમપ્યમરેશ્વરમ્

ચન્દ્રમણ્ડલમધ્યસ્થં યાસ્યે વરદમીશ્વરમ્ ॥
વિષ્ણુશ્ચાર્ધેન ભાગેન દત્તાત્રેયોઽભવત્ક્ષિતૌ

તેન દત્તવરો રાજા પાલયત્યખિલાં મહીમ્

ઇત્યેવમુક્તસ્ત્રિદશેશ્વરસ્તુ દેવેન સાક્ષાત્ત્રિપુરાન્તકેન ॥
જગામ શીઘ્રં સ્વપુરં પ્રવિષ્ટો મહીં સમાદાય ગુરુઞ્ચ રાજન્

ઇતિ શ્રીવિષ્ણુધર્મોત્તરે પ્રથમખણ્ડે માર્કણ્ડેય વજ્રસંવાદે હરદર્શનં નામાષ્ટાવિંશતિતમોઽધ્યાયઃ