Vishnudharmottara Purana · Chapter 1.1

śrīgaṇeśāya namaḥ //
śrīnārāyaṇāya namaḥ //
atha śrīviṣṇudharmottaraprārambhaḥ //
nārāyaṇaṃ namaskṛtya naraṃ caiva narottamam //
devīṃ sarasvatīṃ vyāsaṃ tato jayamudīrayet

kṛtavarmā tathā bhojaḥ śveto māhiṣmatīpatiḥ //
kulindaḥ sarvadamano mālaviścandravarddhanaḥ

vatsanābhaśca bāṇaśca nandīśo darasatpatiḥ //
pratisāraścitradhanussarvo vāyurathastathā

draviḍaḥ kusumāpīḍa otraśca samarapriyaḥ //
śambhuḥ kirātarājaśca auraso nandivardhanaḥ

vaṭumūlaśca tūneśaḥ śālvaśca janamejayaḥ //
suhyarājo dadhīkarṇo bāhlīko damanastathā

hiraṇyanābhaḥ kausalyo dāśārho vijayastathā//
ete cānye ca rājānaḥ śataśo bahudakṣiṇāḥ

sampūrṇacandravadanā gajarājakaroravaḥ //
upāsāṃcakrire vajraṃ sihāsanagatā nṛpāḥ

bahubhirbhūmipālaiśca tathā vajreṇa dhīmatā //
yudhiṣṭhireṇa ca sadā śobhitā śuśubhe sabhā

rājānaste tato dṛṣṭvā ṛṣīndurlabhadarśanān//
brahmalokasthamātmānamamanyanta yaśobhṛtaḥ

ūcuste praṇayādvākyaṃ vajraṃ bhūrisahasradam //
yathā tretāyuge rājandvāpare ca yathā nṛpāḥ //
brāhmaṇā brahmakalpāśca tathaiva susamāgatāḥ

asmiṃstiṣye ca saṃprāpte tava rājanprasādataḥ //
rājan kṛṣṇasagotro'si teneyante sabhā nṛpa

upāsyate mahābhāgairbrahmakalpaistapodhanaiḥ //
....... . . .. na tathā vīryanirjitā

bhaktyā yathā tu tasyaiva kṛṣṇasyāmitatejasaḥ //
tena kṛṣṇena ye cakrurvyatītāḥ pūrvapārthivāḥ

varttatā tena kṛṣṇena te rājanmokṣamāpnuyuḥ//
atha tiṣyayugaḥ prāpto ghoraḥ paramadāruṇaḥ

durlabhaṃ darśanaṃ yatra nṛpasaṃghe mahātmanām

tasmāttvaṃ rājaśārdūla praṣṭumarho dvijottamān //
vaiṣṇavānvividhāndharmānsarahasyānsasaṃgrahān

ityevamukto vajrastaistyaktvā siṃhāsanaṃ tadā //
vajraṃ tu prāñjaliṃ dṛṣṭvā sarva eva narādhipāḥ

varāsanānvihāyāśu tasthuḥ prāñjalayastadā //
vajra uvāca // bhavadbhirnṛpaśārdūlāḥ prārthitā ye dvijāḥ śritāḥ

anugrahārthaṃ bhūpānāṃ jagato hitakāmyayā //
bhavanto vaktumarhanti viṣṇudharmānsanātanān

tasmāttiṣyayuge nāsti bhavato darśanaṃ nṛpaiḥ //
ṛṣaya ūcuḥ //
uttiṣṭha tvaṃ mahīpāla alaṅkuru svamāsanam

śravaṇepi vayaṃ tasya viśeṣeṇārthitā nṛpa //
vajra te saṃśayānsarvāñchetsyatyeṣa mahāmuniḥ

ityevamuktvā vajraṃ te ṛṣayastapasi sthitāḥ //
mārkaṇḍeyamathocuste brūhi dharmānmahīpate

vaiṣṇavānvividhāndharmāṃllokānāmaghahāriṇaḥ//
tathā pārthivasaṃghasya saṃśayān manasi sthitān

mārkaṇḍeya uvāca//
brahmaṇyaḥ satyavān dhanyaḥ sarvaśatrunibarhaṇaḥ//
yadyatpṛcchasi māṃ vajra tattadvaktāsmyasaṃśayam

sihāsanastho bhava bhūmipāla kvaitrakārutva bhavantu sarve'pi tathā mahīpāḥ //
sukhopaviṣṭairiha bhūmipālaiḥ svasaṃśayān brūhi yathāprakāmam

ityevamuktaḥ sa yadupradhāno bhṛguprabarheṇa maharṣimadhye //
praṇamya viprānsa jagāma rājā siṃhāsanaṃ ratnasahasracitram

siṃhāsanasthe nṛpavaryamukhye siṃhāsanasthāḥ kṣitipapradhānāḥ //
sarve babhūvuḥ praṇatāstathā ca śuśrūṣavo brāhmaṇamukhyavākyam

vajra uvāca //
ācakṣva mahyaṃ bhṛguvaṃśacandra samudbhavaṃ tvaṃ jagato yathāvat // /
śṛṇvaṃti me brāhmaṇasaṃghamukhyā nareṃdramukhyāśca vacastvadīyam

iti śrīviṣṇudharmottare prathamakhaṇḍe mārkaṇḍeyavajrasaṃvāde kathāprastāvanaṃ nāma prathamo'dhyāyaḥ