Vishnudharmottara Purana · Chapter 1.18

// mārkaṇḍeya uvāca //
sagarasya tu te putrāssaṃhatā vīryasaṃyutāḥ //
saṃjātā daivayogena devabrāhmaṇakaṃṭakāḥ

teṣāṃ tu karmaṇodvignā devāḥ sarve pitāmaham //
abruvansāgaraiḥ sarvairdeva bādhyāma saṃhataiḥ

evamuktastadā brahmā sarvalokapitāmahaḥ //
uvāca devānsakalānsāgaraiḥ pratyamarṣitān

yastvasya jagato nāthaḥ paramātmā sanātanaḥ //
vāsudevaḥ sa kapilaḥ surāstān ghātayiṣyati

evamuktāḥ surā stena yayuḥ sarve triviṣṭapam //
etasminneva kāle tu sagaraḥ sa mahīpatiḥ

dīkṣito vājimedhāya vidhivadvedapāragaiḥ //
turaṅgaṃ cārayāmāsuryajñiyaṃ tanayā mahīm

teṣāṃ cārayatāṃ so'śvaḥ kapilena tathā hṛtaḥ //
kapilena hṛtaṃ nāśvaṃ te jānanti vimohitāḥ

anveṣanto'pi yatnena nāpuste turagaṃ yataḥ //
pitre nivedya te sarve nicakhnuḥ pṛthivītalam

bhāratasyāsya varṣasya bhede'sminnavame nṛpa! //
samantatastataścakruḥ khātakarmabalānvitāḥ

vistarādyojanaśataṃ pātālatalagāminam //
vaiḍūryapavartātpūrvamuttareṇa himācalāt

paścārdhe kāñcanagirerudageva ca lāvaṇāt //
himācalaśca tairvīraḥ rājandeśadvaye kṣataḥ

himācalasya khaṇḍaśca khātasyāntaḥ praveśitaḥ //
uttaraḥ sāgarastasmāddhima śailena durgamaḥ

evaṃvidhena khātena te praviśya pṛthakpṛthak //
ekīkṛtā daivayogātkapilo yatra vai sthitaḥ

kapilasya samīpasthaṃ dadṛśuste turaṅgamam //
turaṅgasahitaṃ dṛṣṭvā kapilaṃ te tvamarṣitāḥ

kuddālalepikāhastāstasya jagmurvadhepsayā //
tānbādhamānāndurbuddhīnsa dadarśa tadā ṛṣiḥ

cakṣuṣā dṛṣṭamātrāste bhasmībhūtāstu sāgarāḥ //
narakaṃ ca gatāḥ sarve devabrāhmaṇakaṇṭakāḥ

vijñāya tanayānnaṣṭānnāradātsagaro nṛpaḥ //
preṣayāmāsa satatamaṃśumantaṃ sa dhārmikam

aṃśumānapi saṃprāpya kapilaṃ munisattamam//
abhivādya mahātejāstuṣṭāva yadunandanaḥ

tasya tuṣṭo'tha turagaṃ dattavānkapilo muniḥ //
aṃśumantaṃ tadovāca pitṝṇāṃ salilārthinām

pautraste bhavitā rājaṃstapasā tasya toṣitā //
āgamiṣyati sā devī gaṅgā gaganamekhalā

tayā klinnamidaṃ bhasma sāgarāṇāṃ durātmanām

yadā bhaviṣyati tadā sāgarāḥ svargagāminaḥ //
anyasyāpi yadā tvasthi gaṅgātoye patiṣyati

tasyāpi svarlokagatirbhaviṣyati na saṃśayaḥ //
evamuktoṃśumāñśīghraṃ cābhivādya jagadgurum

āgamya yojayāmāsa turageṇa pitāmaham //
yajñaṃ samāpayāmāsa sagaro'pi mahīpatiḥ

evaṃ hi sāgarairmattaiḥ khātako nṛpasattama //
yena klṛptamidaṃ dvīpaṃ sāgaraṃ nṛpa kathyate//

lavaṇodātsamudrācca toyena nṛpa sāgaraḥ//
yadā pūrṇastadā jāto lavaṇodo narādhipa!

kṛtsnaṃ ya evaṃ jayati sa samrāḍiti kīrtyate //
tato gataḥ sa dharmātmā kālena mahatā divam

dilīpe bhāramāsajya jagāma tanaye svake //
dilīpo'pi samādāya rājyaṃ putraṃ bhagīratham

jagāma tridivaṃ rājā vane taptvā mahattapaḥ //
āsādya rājyaṃ sa bhagīratho'pi ānīya gaṅgāṃ tapasā ca bhūmim

saṃplāvayāmāsa jalena bhasma tatsāgarāṇāṃ yaduvṛndanātha!

saṃplāvite bhasmani rājaputrā gaṅgājalaughena divaṃ prayātāḥ //
svarlokamāsādya tathā'kṣayaṃ te vasanti hṛṣṭāstridaśaiḥ sametāḥ

iti śrīviṣṇudharmottare prathamakhaṇḍe mārkaṇḍeyavajrasaṃvāde sagaropākhyānaṃ nāmāṣṭādaśo'dhyāyaḥ