વિષ્ણુધર્મોત્તરપુરાણમ્ · અધ્યાય 1.154

માર્કણ્ડેય ઉવાચ ॥
ફાલ્ગુનામલપક્ષાન્તે રાજા સ્વપ્ને પુરૂરવાઃ ॥
તસ્યૈવ દેવદેવસ્ય શુશ્રાવ ગદિતં શુભમ્

રાત્ર્યામસ્યાં વ્યતીતાયાં મન્ત્રિણા ત્વં સમેષ્યસિ॥
તેન રાજન્સમાગમ્ય કૃતકૃત્યો ભવિષ્યસિ

સ્વપ્નમેવં સ રાજર્ષિર્દૃષ્ટ્વા વિપુલવિક્રમઃ ॥
પ્રત્યૂષકાલે વિધિવત્સ્નાતઃ પ્રાગ્વદતન્દ્રિતઃ

કૃતકૃત્યો યથાકામં પૂજયિત્વા જનાર્દનમ્ ॥
સ્વપ્નં તદ્દેવદેવસ્ય ન્યવેદયત ધાર્મિકઃ

તતઃ શુશ્રાવ વચનં દેવતાર્ચાસમીરિતમ્ ॥
એવમેતન્મહીપાલ નાત્ર કાર્યા વિચારણા ॥

એવં પ્રસાદં સંપ્રાપ્ય દેવદેવાજ્જનાર્દનાત્ ॥
કૃતકૃત્યમિવાત્માનં મેને સ નરપુઙ્ગવઃ

કૃતદેવાર્ચનો રાજા તદા હુતહુતાશનઃ ॥
જગાદ સુહૃદાં તેષાં પ્રસાદં મધુસૂદનાત્

તમૂચુશ્ચ તદા સર્વે રાજાનમપરાજિતમ્ ॥
વિદધાતુ પ્રસન્નસ્તે દેવદેવો જનાર્દનઃ

અપ્રસન્ને જગન્નાથે દેશેઽસ્મિન્નૃપ કસ્યચિત્ ॥
ન ગતિર્વિદ્યતે રાજંસ્ત્વં ચ દેશમિહાગતઃ

સુખં પ્રાપ્નુહિ ભદ્રન્તે ભૂય એવ હિતેપ્સિતાન્ ॥
સ સાદયિત્વા તે કામાન્દેવઃ સર્વગતઃ પ્રભુઃ

એવમુક્ત્વા નરેન્દ્રં તં ગન્ધર્વાપ્સરસાં ગણાઃ ॥
જગ્મુઃ ક્રીડાવિહારાર્થં યથાપૂર્વમરિન્દમ

અથાજગામ તં દેશં બ્રહ્મણો માનસઃ સુતઃ ॥
ત્રિજગદ્યશસાં સ્થાનમત્રિઃ સુરગણાર્ચિતઃ

તમાગતં મુનિવરં દૃષ્ટ્વા રાજા પુરૂરવાઃ ॥
પાદ્યાર્ઘ્યાચમનીયાદ્યૈરાસનેનાભ્યપૂજયત્

સમ્પૂજ્ય ચ મહાભાગમિદં વચનમબ્રવીત્ ॥
અદ્ય મે સફલં જન્મ અદ્ય મે સફલં તપઃ

યત્તે દેવગણૈર્વન્દ્યૌ વન્દિતૌ ચરણૌ મયા ॥
શ્રેયઃ પ્રસૂતિવૃક્ષસ્ય પ્રરોહસ્તવ દર્શનમ

સર્વપાપાન્તકરણં સર્વકલ્યાણકારણમ્ ॥
કિં વા ન લભ્યમસ્તીહ તેષાં દ્વિજવરોત્તમ

અમોઘદર્શને દૃષ્ટે ભવત્યમિતતેજસિ ॥
એવમુક્તસ્તદા રાજ્ઞા સંપ્રસન્નો જગાદ તમ્

શૃણુ રાજન્વચો મહ્યં યત્તે વક્ષ્યામિ સુવ્રત ॥
દેવદેવસમાદેશાદ્દત્તં તે દર્શનં મયા

સુપ્રસન્નો હિ ભગવાન્દેવસ્તે મધુસૂદનઃ ॥
દ્વાદશીષુ સદા રાજન્સોપવાસેન નિત્યશ

પૂજિતો ભગવાન્વિષ્ણુસ્ત્ત્વયાતીતે તુ જન્મનિ ॥
રાજસેન તુ ભાવેન ત્વયા દેવઃ સમર્ચિતઃ

અવરં કામમાશ્રિત્ય રાજન્નિહતકણ્ટકમ્ ॥
સાત્ત્વિકેન તુ ભાવેન પૂજયિત્વા જનાર્દનમ

રાજ્યં મદ્રેષુ સંપ્રાપ્તં નિપ્કણ્ટકમરિન્દમ ॥
દ્વાદશ્યર્ચાપ્રસન્નેન દેવદેવેન ચક્રિણા

પ્રદર્શિતમિદં સ્થાનં મદીયં સ્વર્ગસન્નિભમ્ ॥
ઇહ રાજઁસ્તપસ્તપ્ત્વા દેવદેવં જનાર્દનમ્

આરાધ્ય દૃષ્ટવાનસ્મિ પુરા વરર્ષગણાન્બહૂન્ ॥
પ્રાપ્યાનુજ્ઞાં હૃષીકેષાત્તત્કૃતે વિવરે શુભે

નિત્યં સન્નિહિતા રાજંસ્તસ્યૈવાર્ચા વિનિર્મિતા ॥
નિયોગાદ્દેવદેવસ્ય પૂજ્યતે સિદ્ધમત્તમૈઃ

નેયં દૃષ્ટા મનુષ્યેન્દ્ર મનુષ્યૈર્ન ચ રાક્ષસૈઃ ॥
પિશિતાશૈસ્તથૈવાન્યૈર્દૃષ્ટપૂર્વા કથઞ્ચન

અસ્મિન્સ્વર્ગોપમે દેશે ત્વયા લૌલ્યેન કર્મણા।
આરાધિતો જગન્નાથો દેવશ્ચક્રગદાધરઃ

આસન્નફલમૂલેઽપિ બહુગોરસસંયુતે॥
ક્ષૌદ્રયુક્તશિલાપ્રાયે સમાક્ષિકફલૈર્યુતે

કેવલામ્ભોશિના તપ્તં યત્ત્વયા પરમં તપઃ॥
તેન તેઽહં વરં દદ્મિ યદભીષ્ટં તવાનઘ

અચિરેણૈવ કાલેન ત્વયા રાજન્કૃતં તપઃ॥
રૂપાર્થં રૂપલાભાય પ્રાપ્તં મે ગદતઃ શૃણુ

તદ્વ્રતં યે કરિષ્યન્તિ મનુજેશ્વર માનવાઃ॥
સ્ત્રિયો વાપિ નરશ્રેષ્ઠ પ્રાપ્સ્યન્તે રૂપમુત્તમમ્

સૌભાગ્યમતુલં લોકે લાવણ્યમપિ ચોત્તમમ્॥
ધર્મિષ્ટતાં તથારોગ્યં કુલે જન્મ તથોત્તમે

જન્માન્તરમથાસાદ્ય સ્વર્ગલોકં તથાવિધમ્॥
સ્વર્ગલોકાત્પરિભ્રષ્ટા માનુષ્યે ગુણસંયુતાઃ

બ્રાહ્મણા ધનસમ્પન્ના ભવિષ્યન્ત્યથવા નૃપાઃ॥
જન્માન્તરમથાસાદ્ય સર્વેસ્યૈવ ફલપ્રદાઃ

રૂપવંતો મહારાજ ઇહામુત્ર ચ તેઽનઘાઃ॥
યસ્માત્ત્વયા તપસ્તપ્તં કેશવશ્ચાથ પૂજિતઃ

મયા સમાગતશ્ચાપિ ગંધર્વૈશ્ચ સહસ્રશઃ॥
ઇહૈવ કૃત્વા ધર્મજ્ઞ રૂપસત્રં મહાફલમ્॥
દિવ્યરૂપધરો ભૂત્વા સ્વરાષ્ટ્રં ગન્તુમર્હસિ

એતાવદુક્તઃ સ તુ મદ્રનાથો મહાત્મના તેન નરેન્દ્રસિંહ॥
પપ્રચ્છ તં ધર્મભૃતામ્વરિષ્ઠઃ સત્રસ્ય તસ્યાનુશયં વિધાનમ્

ઇતિ શ્રીવિષ્ણુધર્મોત્તરે પ્રથમખણ્ડે માર્કણ્ડેયવજ્રસંવાદે પુરૂરવસોઽત્રિદર્શનં નામ ચતુઃપઞ્ચાશદધિકશતતમોઽધ્યાયઃ