વિષ્ણુધર્મોત્તરપુરાણમ્ · અધ્યાય 1.12

॥વજ્ર ઉવાચ ॥
ભારતસ્યાસ્ય વર્ષસ્ય ભેદેઽસ્મિન્નવમે પ્રભો ॥
કિમર્થં સાગરઃ ખાતઃ સ કૃતઃ સગરૈસ્તથા

માર્કણ્ડેય ઉવાચ ॥
ભારતસ્યાસ્ય વર્ષસ્ય ભેદેઽસ્મિન્નવમે નૃપ! ॥
નવમે ચ દિશાં ભાગે પૂર્વસ્યાં દિશિ યાદવ

કોશલો નામ વિષયઃ પ્રભૂતધનધાન્યવાન્ ॥
સ્ફીતગ્રામગુણાઢ્યોઽસ્તિ નિત્યં મુદિત માનવઃ

પયસ્વિન્યઃ પયસ્વિન્યો યત્ર સસ્યધરા ધરા ॥
મનોઽભિરામા રામાશ્ચ પુરુષાઃ પૌરુષાગ્રગાઃ

વિદગ્ધજનભૂયિષ્ઠા સર્વપુણ્ય સમાકુલા ॥
નગરૈર્ન વિશિષ્યન્તે યત્ર ગ્રામા મનોહરાઃ

ગવાં પ્રવેશે સાયાહ્ને યત્ર ગ્રામેષુ ભાસ્કરઃ ॥
ધૂલિપુઞ્જપરિક્ષિપ્તઃ વનસાનુવિરાજિતઃ

પશ્ચિમે પ્રથમે ચૈવ યત્ર યામે વિરાજિતઃ ॥
રાત્રૌ બ્રહ્મધ્વનિસ્તત્ર તિષ્ઠતીવ નભસ્તલમ્

ફલાવનતશાખાઢ્યાશ્છાયાદ્રુમસમા કુલાઃ ॥
પ્રપાકૂપતડાગાઢ્યા પન્થાનો યત્ર યાદવ

વ્યાધિતસ્કરદુર્ભિક્ષપરરાષ્ટ્રભયાનિ ચ ॥
જના યત્ર ન જાનન્તિ નાકાલમરણં તથા

યૂપચિહ્ના મહી યત્ર દેવવેશ્માવતંસિકા ॥
યત્રોત્પલસમાકીર્ણવરવાપીવિભૂષિતા

ઉદ્યાનેષુ સદા યત્ર વેણુગાન્ધર્વનિઃસ્વનમ્ ॥
શિલીમુખરવૈર્મિશ્રં યાત્યસંબાધતાં ગુણૈઃ

યસ્મિન્ન કશ્ચિચ્ચ્યવતે સ્વધર્માદ્દીનો જનો યત્ર ન ચાસ્તિ કશ્ચિત્ ॥
ન નેત્રહીનો વિકલેન્દ્રિયો વા વસુન્ધરા યત્ર યથાર્થનામા

ઇતિ શ્રીવિષ્ણુધર્મોત્તરે પ્રથમખણ્ડે માર્કણ્ડેયવજ્રસંવાદે કોસલવર્ણનો નામ દ્વાદશોઽધ્યાયઃ