Vishnu Purana · Chapter 4.10

iti śrīviṣṇumāhāpurāṇe caturthāṃśe navamo 'dhyāyaḥ (9)
śrīparāśara uvāca
yatiyayātisaṃyātyāyātiviyātikṛtisaṃjñā nahuṣasya ṣaṭ putrā mahābalaparākramā babhūvuḥ

yatistu rājyaṃ naicchat

yayātistu bhūbhṛdabhavat

uśanasaś ca duhitaraṃ devayānīṃ vārṣaparvaṇīṃ śarmiṣṭhāmupayeme

atrānuvaṃśaśloko bhavati

yaduṃ ca durvasuṃ caiva devayānī vyajāyata /
druhyuṃ cānuṃ ca pūruṃ ca śarmiṣṭhā vārṣaparvaṇī

kāvyaśāpācca kālenaiva yayātirjarāmavāpa

prasannaśukravacanācca svajarāṃ saṃkrāmayituṃ jyeṣṭhaṃ putraṃ yadumuvāca

vatsa tvanmātāmahaśāpādiyamakālenaiva jarā mamopasthitā tāmahaṃ tasyai vānugrahādbhavataḥsaṃcārayāmi

ekaṃ varṣasahasramatṛpto 'smi viṣayeṣu tvadvayasā viṣayānahaṃ bhoktumicchami

nātra bhavatā pratyākhyānaṃ kartavyamityuktaḥsa yadurnaicchattāṃ jarāmādātum

taṃ ca pitā śaśāpa tvatprasūtirna rājyārhā bhaviṣyatīti

anantaraṃ ca durvasuṃ druhyamanuṃ ca pṛtivīpatirjarāgrahaṇārthaṃ svayauvanapradānāya cābhyarthayāmāsa

tair apyekaikena pratyākhyātastāñchaśāpa

atha śarmiṣṭhātanayamaśeṣakanīyāṃsaṃ puruṃ tathaivāha

sa cātipravaṇamatiḥ sabahumānaṃ pitaraṃ praṇamya mahāprasādoyamasmākamityudāramabhidhāyajarāṃ jagrāha

svakīyaṃ ca yauvanaṃ svapitre dadau

so 'pi pauravaṃ yauvanamāsādya dharmāvirodhena yathākāmaṃ yathākālopapannaṃ yathotsāhaṃ viṣayāṃścacāra

samyak ca prajāpālanamakarot

viśvācyā devayānyā ca sahopabhogaṃ bhuktvā kāmānāmantaṃ prāpsyāmītyanudinaṃ tanmanasko babhūva

anudinaṃ copabhogataḥ kāmānatiramyānmene

tataścainamagāyata

ślo-
na jātu kāmaḥ kāmānāmupabhogena śāmyati /
haviṣā kṛṣṇavartmeva bhūya evābhivardhate

yatpṛthivyāṃ vrīhiyavaṃ hiraṇyaṃ paśavaḥ striyaḥ /
ekasyāpi na paryāptaṃ tasmāttṛṣṇāṃ parityajet

yadā na kurute bhāvaṃ sarvabhūteṣu pāpakam /
samadṛṣṭostadā puṃsaḥ sarvāḥsukhamayā diśaḥ

yā dustyajā durmatibhir yā na jīryati jīryataḥ /
tāṃ tṛṣṇāṃ saṃtyajetprājñaḥsukhenaivābhipūryate

jīryanti jīryataḥ keśā dantā jīryanti jīryataḥ /
dhanāśā jīvitāśā ca jīryato 'pi na jīryataḥ

pūrṇaṃ varṣasahasraṃ me viṣayāsaktacetasaḥ /
tathā pyanudinaṃ tṛṣṇā mama deṣūpajāyate

tasmādetāmahaṃ tyaktvā brahmaṇyādhāya mānasam /
nirdvandvo nirmamo bhūtvā cariṣyāmi mṛgaiḥ saha

śrīparāśara uvāca
puroḥsakāśādādāya jarāṃ dattvā ca yovanam /
rājyebhiṣicca pūruṃ ca prayayau tapase vanam

diśidakṣiṇapūrvasyāṃ durvasuṃ ca samādiśat /
pratīcyāṃ ca tathā druhyuṃ dakṣiṇāyāṃ tato yadum

udīcyāṃ ca tathaivānuṃ kṛtvā maṇḍalino nṛpān /
sarvapṛthvīpatiṃ puruṃ sobhiṣicya vanaṃ yayau