Vigrahavyāvartanī (another edition) · Verses 62-72

sata eva pratiṣedho yadi śūnyatvaṃ nanvapratiṣiddhamidam /
pratiṣedhayate hi bhavān bhāvānāṃ niḥsvabhāvatvam

pratiṣedhayase 'tha tvaṃ śūnyatvaṃ tacca nāsti śūnyatvam /
pratiṣedhaḥ sata iti te nanvevaṃ hīyate vādaḥ

pratiṣedhayāmi nāhaṃ kiṃcit pratiṣedhyamasti na ca kiṃcit /
tasmāt pratiṣedhayasītyadhilaya eva tvayā kriyate

yaccāhaṃ te vacanādasataḥ pratiṣedhavacanasiddhiriti /
atra jñāpayate vāgasaditi tanna pratinihanti

mṛgatṛṣṇādṛṣṭānte yaḥ punaruktaṃ tvayā mahāṃścaryaḥ /
tatrāpi nirṇayaṃ śṛṇu yathā sa dṛṣṭānta upapannaḥ

sa yadi svabhāvataḥ syāt bhāvo na syāt pratītyasamudbhūtaḥ /
yaśca pratītya bhavati grāho nanu śūnyatā saiva

yadi ca svabhāvataḥ syād grāhaḥ kastaṃ nivartayed grāhyam /
śeṣeṣvapyeṣa vidhistasmād doṣo 'nupālambhaḥ

etena hetvabhāvaḥ pratyuktaḥ pūrvameva sa samatvāt /
mṛgatṛṣṇādṛṣṭāntavyāvṛttividhau ya uktaḥ prāk

yastraikālye hetuḥ pratyuktaḥ pūrvameva sa samatvāt /
traikālyapratihetuśca śūnyatāvādināṃ prāptaḥ

prabhavati ca śūnyateyaṃ yasya prabhavanti tasya sarvārthāḥ /
prabhavati na tasya kiṃ na bhavati śūnyatā yasyeti

yaḥ śūnyatāṃ pratītyasamutpādaṃ madhyamāṃ pratipadamanekārthām /
nijagāda praṇamāmi tamapratimasaṃbuddham