વિગ્રહવ્યાવર્તની (અન્ય આવૃત્તિ) · શ્લોક 62-72

સત એવ પ્રતિષેધો યદિ શૂન્યત્વં નન્વપ્રતિષિદ્ધમિદમ્ ।
પ્રતિષેધયતે હિ ભવાન્ ભાવાનાં નિઃસ્વભાવત્વમ્

પ્રતિષેધયસે ઽથ ત્વં શૂન્યત્વં તચ્ચ નાસ્તિ શૂન્યત્વમ્ ।
પ્રતિષેધઃ સત ઇતિ તે નન્વેવં હીયતે વાદઃ

પ્રતિષેધયામિ નાહં કિંચિત્ પ્રતિષેધ્યમસ્તિ ન ચ કિંચિત્ ।
તસ્માત્ પ્રતિષેધયસીત્યધિલય એવ ત્વયા ક્રિયતે

યચ્ચાહં તે વચનાદસતઃ પ્રતિષેધવચનસિદ્ધિરિતિ ।
અત્ર જ્ઞાપયતે વાગસદિતિ તન્ન પ્રતિનિહન્તિ

મૃગતૃષ્ણાદૃષ્ટાન્તે યઃ પુનરુક્તં ત્વયા મહાંશ્ચર્યઃ ।
તત્રાપિ નિર્ણયં શૃણુ યથા સ દૃષ્ટાન્ત ઉપપન્નઃ

સ યદિ સ્વભાવતઃ સ્યાત્ ભાવો ન સ્યાત્ પ્રતીત્યસમુદ્ભૂતઃ ।
યશ્ચ પ્રતીત્ય ભવતિ ગ્રાહો નનુ શૂન્યતા સૈવ

યદિ ચ સ્વભાવતઃ સ્યાદ્ ગ્રાહઃ કસ્તં નિવર્તયેદ્ ગ્રાહ્યમ્ ।
શેષેષ્વપ્યેષ વિધિસ્તસ્માદ્ દોષો ઽનુપાલમ્ભઃ

એતેન હેત્વભાવઃ પ્રત્યુક્તઃ પૂર્વમેવ સ સમત્વાત્ ।
મૃગતૃષ્ણાદૃષ્ટાન્તવ્યાવૃત્તિવિધૌ ય ઉક્તઃ પ્રાક્

યસ્ત્રૈકાલ્યે હેતુઃ પ્રત્યુક્તઃ પૂર્વમેવ સ સમત્વાત્ ।
ત્રૈકાલ્યપ્રતિહેતુશ્ચ શૂન્યતાવાદિનાં પ્રાપ્તઃ

પ્રભવતિ ચ શૂન્યતેયં યસ્ય પ્રભવન્તિ તસ્ય સર્વાર્થાઃ ।
પ્રભવતિ ન તસ્ય કિં ન ભવતિ શૂન્યતા યસ્યેતિ

યઃ શૂન્યતાં પ્રતીત્યસમુત્પાદં મધ્યમાં પ્રતિપદમનેકાર્થામ્ ।
નિજગાદ પ્રણમામિ તમપ્રતિમસંબુદ્ધમ્