Vedanta Paribhasha · Chapter p3

idānīmarthāpattirnirūpyate/ tatropapādyajñānenopapādakalpanamarthāpattiḥ/ tatropapādyajñānaṃ karaṇam/ upapādakajñānaṃ phalam/ yena vinā yadanupapannaṃ tattatropapādyam/ yasyābhāve yasyānupapattistattatropapādakam/ yathā rātribhojanena vinā divā'bhuñjānasya pīnatvamanupapannamiti tādṛśapīnatvamupapattiriti rātribhojanamupapādakam/
rātribhojanakalpanārūpāyāṃ pramitau ’arthasyāpattiḥ kalpanā’ iti ṣaṣṭhīsamāsenārthāpattiśabdo varttate/ kalpanā-karaṇapīnatvādijñāne ‘arthasya āpattiḥ kalpanā yasmāt’ iti bahuvrīhisamāsena vartata iti phalakaraṇayorubhayostatpadaprayogaḥ/
sā cārthāpattirdvividhā—dṛṣṭārthāpattiḥ, śrutārthāpattiśceti/
tatra dṛṣṭārthāpattiryathā-- idaṃ rajatamiti purovartini pratipannasya rajatasya nedaṃ rajatamiti tatraiva niṣiddhyamānatvaṃ satyatve'nupapannamiti rajatasya sadbhinnatvaṃ satyatvātyantābhāvavattvaṃ mithyātvaṃ kalpayatīti/ śrutārthāpattiryathā- śrūyamāṇavākyasya svārthānupapattimukhenārthāntarakalpanaṃ, yathā tarati śokamātmavit ityatra śrutasya śokaśabdavācyabandhajātasya jñānanivartyatvasyānupapattyā bandhasya mithyātvaṃ kalpyata iti/ yathā vā śatavarṣajīvī devadatto gehe neti vākyaśravaṇānantaraṃ jīvino gṛhāsattvaṃ bahiḥsattvaṃ kalpayatīti/
śrutārthāpattiśca dvividhā—abhidhānānupapattiḥ, abhihitānupapattiśca/ tatra yatra vākyaikadeśa-śravaṇe'nvayābhidhānānupapattyā'nvayābhidhānopayogi padāntaraṃ kalpyate tatrābhidhānānupapattiḥ/ yathā dvāramityatra pidhehītyadhyāhāraḥ/ yathā vā viśvajitā yajetetyatra svargakāmapadādhyāhāraḥ/ nanu dvāramityādau anvayābhidhānātpūrvamidamanvayābhidhānaṃ pidhānopasthāpakapadaṃ vinā anupapannamiti kathaṃ jñānamiti cet— na/ abhidhānapadena karaṇavyutpattyā tātparyyasya vivakṣitatvāt/ tathā ca “dvārakarmakapidhānakriyāsaṃsargaparatvaṃ pidhānopasthāpakapadaṃ vinā anupapannam” iti jñānaṃ tatrāpi sambhāvyate/
abhihitānupapattistu yatra vākyāvagato'rtho'nupapannatvena jñātaḥ sannarthāntaraṃ kalpayati tatra draṣṭavyā/ yathā svargakāmo jyotiṣṭomena yajetetyatra svargasādhanatvasya kṣaṇikajyotiṣṭomayāgagatatayā avagatasyānupapattyā madhyavartyapūrvaṃ kalpyate/
na ceyamarthāpattiranumāne'ntarbhavitumarhati, anvayavyāptyajñānenānvayinyanantarbhāvāt, vyatirekiṇaścānu-mānatvaṃ prāgeva nirastam/ ata evārthāpattisthale'numinomīti nānuvyavasāyaḥ, kintvanenedaṃ kalpayāmīti/
nanvarthāpattisthale idamanena vinā'nupapannamiti jñānaṃ karaṇamityuktam, tatra kimidaṃ tena vinā'nupapannatvaṃ ? tadabhāvavyāpakībhūtābhāvapratiyogitvamiti brūmaḥ/
evamarthāpattermānāntaratvasiddhau vyatireki nānumānāntaram/ pṛthivītarebhyo bhidyata ityādau gandhavattvamitarabhedaṃ vinānupapannamityādijñānasya kāraṇatvāt/ ata evānuvyavasāyaḥ pṛthivyāmitarabhedaṃ kalpayāmīti/
//iti vedāntaparibhāṣāyāmarthāpattiparicchedaḥ//५//