Vayu Purana · Verses 1-2

śrīgaṇeśāya namaḥ //
nārāyaṇaṃ namaskṛtya narañcaiva narottamam/
devīṃ sarasvatīṃ caiva tato jayamudīrayet//
jayati parāśarasūnuḥ satyavatīhṛdayanandano vyāsaḥ/
yasyāsyakamalagalitaṃ vāṅmayamamṛtaṃ jagat pibati//
prapadye devamīśānaṃ śāśvataṃ dhruvamavyayam/
mahādevaṃ mahātmānaṃ sarvasya jagataḥ patim

brahmāṇaṃ lokakarttāraṃ sarvajñamaparājitam/
prabhuṃ bhūtabhaviṣyasya sāmpratasya ca satpatim

jñānamapratimaṃ yasya vairāgyaṃ ca jagatpateḥ/
aiśvaryañcaiva dharmaśca sahasiddhicatuṣṭayaḥ

ya imān paśyate bhāvānnityaṃ sadasadātmakān/
āviśanti punastaṃ vai kriyābhāvārthamīśvaram

lokakṛllokatattvajño yogamāsthāya tattvavit/
asṛjat sarvabhūtāni sthāvarāṇi carāṇi ca

tamajaṃ viśvakarmāṇaṃ citpatiṃ lokasākṣiṇam/
purāṇākhyānajijñāsurvrajāmi śaraṇaṃ prabhum

brahmavāyumahendrebhyo namaskṛtya samāhitaḥ/
ṛṣīṇāñca variṣṭhāya vasiṣṭhāya mahātmane

tannapttre cātiyaśase jātūkarṇāya carṣaye/
vasiṣṭhāya ca śucaye kṛṣṇadvaipāyanāya ca

purāṇaṃ sampravakṣyāmi brahmoktaṃ vedasammitam/
dharmārthanyāyasaṃyuktairāgamaiḥ suvibhūṣitam

asīmakṛṣṇe vikrānte rājanye'nupamatviṣi/
praśāsatīmāṃ dharmeṇa bhūmiṃ bhūmipasattame

ṛṣayaḥ saṃśitātmānaḥ satyavrataparāyaṇāḥ/
ṛjavo naṣṭarajasaḥ śāntā dāntā jitendriyāḥ

dharmakṣetre kurukṣetre dīrghasatrantu ījire/
nadyāstīre dṛṣadvatyāḥ puṇyāyāḥ śucirodhasaḥ/
dīkṣitāste yathāśāstraṃ naimiṣāraṇyagocarāḥ

draṣṭuṃ tān sa mahābuddhiḥ sūtaḥ paurāṇikottamaḥ/
lomāni harṣayāñcakre śrotrūṇāṃ yat subhāṣitaiḥ/
karmaṇā prathitastena loke'smim̐llomaharṣaṇaḥ

tapaḥśrutācāranidhervedavyāsasya dhīmataḥ/
śiṣyo babhūva medhāvī triṣu lokeṣu viśrutaḥ

purāṇa vedo hyakhilo yasmin samyak pratiṣṭhitaḥ/
bhāratī caiva vipulā mahābhāratavarddhinī

dharmārthakāmamokṣārthāḥ kathā yasmin pratiṣṭhitāḥ/
sūktāḥ suparibhāṣāśca bhūmāvoṣadhayo yathā

sa tān nyāyena sudhiyo nyāyavinmunipuṅgavān/
abhigamyopasaṃsṛtya namaskṛtya kṛtāñjaliḥ/
toṣayāmāsa medhāvī praṇipātena tānṛṣīn

te cāpi sartriṇaḥ prītāḥ sasadasyā mahaujasaḥ/
tasmai sāma ca pūjāñca yathāvat pratipedire

atha teṣāṃ purāṇasya śuśrūṣā samapadyata/
dṛṣṭvā tamātiviśvastaṃ vidvāṃsaṃ lomaharṣaṇam

tasmin satre gṛhapatiḥ sarvaśāstraviśāradaḥ/
iṅgitairbhāvamālakṣya teṣāṃ sūtamanodayat

tvayā sūta mahābuddhirbhagavān brahmavittamaḥ/
itihāsapurāṇārthaṃ vyāsaḥ samyagupāsitaḥ/
dudoha vai matiṃ tasya tvaṃ purāṇāśrayāṃ kathām

eṣāñca ṛṣimukhyānāṃ purāṇaṃ prati dhīmatām/
śuśrūṣāsti mahābuddhe tacchrāvayitumarhasi

sarve hīme mahātmāno nānā gotrāḥ samāgatāḥ/
svān svān vaṃśān purāṇaistu śrṛṇuyurbrahmavādinaḥ

saputrān dīrghasatre'smiñchravayethā munīnatha/
dīkṣiṣyamāṇairasmābhi stena prāgasi saṃsmṛtaḥ

iti sannoditaḥ sūtastaireva munibhiḥ purā/
purāṇārthaṃ purāṇajñaiḥ satyavrataparāyaṇaiḥ

svadharma eṣa sūtasya sadbhirdṛṣṭaḥ purātanaiḥ/
devatānāmṛṣīṇāñca rājñāñcāmitatejasām

vaṃśānāṃ dhāraṇaṃ kāryaṃ śrutānāñca mahātmanām/
itihāsapurāṇeṣu diṣṭā ye brahmavādibhiḥ

na hi vedeṣvadhikāraḥ kaśvit sūtasya dṛśyate/
vainyasya hi pṛthoryajñe varttamāne mahātmanaḥ/
sutyāyāmabhavat sūtaḥ prathamaṃ varṇavaikṛtaḥ

aindreṇa haviṣā tatra haviḥ pṛktaṃ bṛhaspateḥ/
juhāvendrāya devāya tataḥ sūto vyajāyata/
pramādāttatra sañjajñe prāyaścittañca karmasu

śiṣyahavyena yat pṛktamabhibhūtaṃ gurorhaviḥ/
adharottaracāreṇa jajñe tadvarṇavaikṛtaḥ

yacca kṣatrāt samabhavadbrāhmaṇā'varayonitaḥ/
tataḥ pūrveṇa sādharmyāttulyadharmā prakīrttitaḥ

madhyamo hyeṣa sūtasya dharmaḥ kṣatropajīvanam/
rathanāgāśvacaritaṃ jaghanyañca cikitsitam

tat svadharmamahaṃ pṛṣṭo bhavadbhirbrahmavādibhiḥ/
kasmāt samyaṅna vibrūyāṃ purāṇamṛṣipūjitam

pitṝṇāṃ mānasī kanyā vāsavī samapadyata/
apadhyātā ca pitṛbhirmatsyayonau babhūva sā

araṇīva hutāśasya nimittaṃ yasya janmanaḥ/
tasyāṃ jāto mahāyogī vyāso vedavidāṃ varaḥ

tasmai bhagavate kṛtvā namo vyāsāya vedhase//
puruṣāya purāṇāya bhṛguvākyapravarttine/
mānuṣacchadmarūpāya viṣṇave prabhaviṣṇave

jātamātrañca yaṃ veda upatasthe sasaṅgrahaḥ/
dharmameva puraskṛtya jātūkarṇādavāpa tam

matiṃ manthānamāvidhya yenāsau śrutisāgarāt/
prakāśaṃ janito loke mahābhāratacandramāḥ

vedadrumaśca yaṃ prāpya saśākhaḥ samapadyata/
bhūmikālaguṇān prāpya bahuśākho yathā drumaḥ

tasmādahamupaśrutya purāṇaṃ brahmavādinaḥ/
sarvajñātsarvavedeṣu pūjitāddīptatejasaḥ

purāṇaṃ sampravakṣyāmi yaduktaṃ mātariśvanā/
pṛṣṭena munibhiḥ pūrvaṃ naimiṣīyairmahātmabhiḥ

maheśvaraḥ paro'vyaktaścaturbāhuścaturmukhaḥ/
acintyaścāprameyaśca svayambhūrheturīśvaraḥ

avyaktaṃ kāraṇaṃ yadyannityaṃ sadasadātmakam/
mahadādiviśeṣāntaṃ sṛjatīti viniścayaḥ

aṇḍaṃ hiraṇmayañcaiva babhūvāpratimaṃ tataḥ/
aṇḍasyāvaraṇañcādbhirapāmapi ca tejasā

vāyunā tasya nabhasā nabho bhūtādinā vṛtam/
bhūtādirmahatā caiva avyaktenāvṛto mahān

ato'tra viśvadevānāmṛṣīṇāñcopavarṇitam/
nadīnāṃ parvatānāñca prādurbhāvo'tra śasyate

manvantarāṇāṃ sarveṣāṃ kalpānāñcopavarṇanam/
kīrttanaṃ brahmakṣatrasya brahma janma ca kīrttyate

ato brahmaṇi sraṣṭṛtvaṃ prajāsargopavarṇanam/
avasthāścātra kīrttyante brahmaṇo'vyaktajanmanaḥ

kalpānāṃ vatsarāścaiva jagataḥ sthāpanantathā/
śayanañca hareratra pṛthivyuddharaṇantathā

sanniveśaḥ purādīnāṃ varṇāśramavibhāgaśaḥ/
vṛkṣāṇāṃ gṛhasaṃsthānāṃ siddhānāñcavināśanam

yojanānāṃ pathāñcaiva sañcaro bahuvistaraḥ/
svarge sthānavibhāgaśca marttyānāṃ bhuvicāriṇām

vṛkṣāṇāmoṣadhīnāñca vīrudhāñca prakīrttanam/
vṛkṣanārakikīṭatvaṃ marttyānāṃ parikīrttitam

devatānāmṛṣīṇāñca dve sṛtī parikīrttite/
annādīnāṃ tanūnāñca sarjanantyajanantathā

prathamaṃ sarvaśāstrāṇāṃ purāṇaṃ brahmaṇā smṛtam/
anantarañca vakrebhyo vedāstasya viniḥsṛtāḥ

aṅgāni dharmaśāstrañca vratāni niyamāstathā/
paśūnāṃ puruṣāṇāñca sambhavaḥ parikīrtitaḥ

tathā nirvacanaṃ proktaṃ kalpasya ca parigrahaḥ/
nava sargāḥ punaḥ proktā brahmaṇo buddhipūrvakāḥ

trayo'nye buddhipūrvāstu tato lokānakalpayat/
brahmaṇo'vayavebhyaśca dharmādīnāṃ samudbhavaḥ

ye dvādaśa prasūyante prajāḥ kalpe punaḥ punaḥ/
kalpayorantaraṃ proktaṃ pratisandhiśca yastayoḥ

tamomātrāvṛtatvācca brahmaṇo'dharmasambhavaḥ/
tathaiva śatarūpāyāḥ sambhavaśca tataḥ param

priyavratottānapādau prasūtyākūtayaśca tāḥ/
kīrttyante dhūtapāpmāno yeṣu lokāḥ pratiṣṭhitāḥ

ruceḥ prajāpateścordvamākūtyāṃ mitunodbhavaḥ/
prasūtyāmapi dakṣasya kanyānāṃ prabhavastataḥ

dākṣāyaṇīṣu cāpyūrddhvaṃ śraddhādyāsu mahātmanām/
dharmasya kīrttyate sargaḥ sāttvikasya sukhodayaḥ

tathā'dharmmasya hiṃsāyāṃ tāmaso'śubhalakṣaṇaḥ/
maheśvarasya satyāñca prajāsargaḥ prakīrtitaḥ

nirāmayañca brahmāṇaṃ tādṛśaṃ kīrttitaṃ punaḥ/
yogaṃ yoganidhiḥ prāha dvijānāṃ muktikāṃkṣiṇām

avatāraśca rudrasya mahābhāgyaṃ tathaiva ca/
traivedikāṃ kathāñcāpi saṃvādaḥ paramo mahān

brahmanārāyaṇābhyāñca yatra stotraṃ prakīrttitam/
stutastābhyāṃ sa deveśastutoṣa bhagavān śivaḥ

prādurbhāvo'tha rudrasya brahmaṇo'ṅge mahātmanaḥ/
kīrttyate nāma hetuśca yathā'rodīnmahāmanāḥ

rudrādīni yathā hyaṣṭau nāmānyāpnot svayambhuvaḥ/
yathā ca tairvyāpratamidaṃ trailokyaṃ sacarācaram

bhṛgvādīnāmṛṣīṇāñca prajāsargopavarṇanam/
vasiṣṭhasya ca brahmarṣeryatra gotrānukīrttanam

agneḥ prajāyāḥ sambhūtiḥ svāhāyāṃ yatra kīrttitā/
pitṝṇāṃ dviprakārāṇāṃ svadhāyāstadanantaram

pitṛvaṃśaprasaṅgena kīrtyate ca maheśvarāt/
dakṣasya śāpaḥ satyarthe bhṛgvādīnāñca dhīmatām

pratiśāpaśca rudrasya dakṣādadbhutakarmaṇaḥ/
pratiṣedhaśca vairasya kīrtyate yatra vistarāt

teṣāṃ niyogo dvīpeṣu deśeṣu ca pṛthak pṛthak/
svāyambhuvasya sargasya tataścāpyanukīrttanam

ukto nābhernisargaśca rajasaśca mahātmanaḥ/
dvīpānāṃ sasamudrāṇāṃ parvatānāñca kīrttanam

varṣāṇāñca nadīnāñca tadbhedānāñca sarvaśaḥ/
dvīpabhedasahasrāṇāmantarbhedaśca saptasu

vistarān maṇḍalāccaiva jambūd‌vīpasamudrayoḥ/
pramāṇaṃ yojanāgreṇa kīrttyate parvataiḥ saha

himavān hemakūṭastu niṣadho merureva ca/
nīlaḥ śvetaḥ śṛṅgavāṃśca kīrttyante varṣaparvatāḥ

teṣāmantaraviṣkambhā ucchrāyāyāmavistarāḥ/
kīrttyante yojanāgreṇa ye ca tatra nivāsinaḥ

bhāratādīni varṣāṇi nadībhiḥ parvataistathā/
bhūtaiścopaniviṣṭāni gatimadbhirdhruvaistathā

jambūdvīpādayo dvīpāḥ samudraiḥ saptabhirvṛtāḥ/
tataścāpyammayī bhūmirlokālokaśca kīrttyate

aṇḍasyāntastvime lokāḥ saptadvīpā ca medinī/
bhūrādayaśca kīrttyante varaṇaiḥ prākṛtaiḥ saha

sarvañca tat‌pradhānasya parimāṇaikadeśikam/
savyāsaparimāṇañca saṃkṣepeṇaiva kīrttyate

sūryācandramasoścaiva pṛthivyāścāpyaśeṣataḥ/
pramāṇaṃ yojanāgreṇa sāmpratairabhimānibhiḥ/
mahendrādyāḥ sabhāḥ puṇyā mānasottaramūrddhani

ata ūrddhvaṃ gatiścoktā svargasyālātacakravat/
nāgavīthyajavīthyośca lakṣaṇaṃ parikīrttyate

kāṣṭhayorlekhayoścaiva maṇḍalānāñca yojanaiḥ/
lokālokasya sandhyāyā ahno viṣuvatastathā

lokapālāḥ sthitāścorddhvaṃ kīrttyante ye caturdiśam/
pitrūṇāṃ devatānāṃ ca panthānau dakṣiṇottarau

gṛhiṇāṃ nyāsināñcoktau rajaḥsattvasamāśrayāt/
kīrttyate ca padaṃ viṣṇordharmādyā yatra dhiṣṭhitāḥ

sūryācandramasoścāro grahāṇāṃ jyotiṣāṃ tathā/
kīrttyate dhruvasāmarthyāt prajānāṃ ca śubhāśubham

brahmaṇā nirmitaḥ sauraḥ syandano'rthavaśāt svayam/
kīrttyate bhagavān yena prasarpati divi svayam

sa ratho'dhiṣṭhito devairādityaiḥ ṛṣibhistathā/
gandharvairapsarobhiśca grāmaṇīsarparākṣasaiḥ

apāṃ sāramayasyendoḥ kīrtyate ca rathastathā/
vṛddhikṣayau ca saumasya kīrttyete sūryakāritau

sūryādīnāṃ syandanānāṃ dhruvādeva prakīrttanam/
kīrttyate śiśumāraśca yasya pucche dhruvaḥ sthitaḥ

tārārūpāṇi sarvāṇi nakṣatrāṇi grahaiḥ saha/
nivāsā yatra kīrttyante devānāṃ puṇyakāriṇām

sūryaraśmisahasre ca varṣaśītoṣṇaniḥsravaḥ/
pravibhāgaśca raśmīnāṃ nāmataḥ karmato'rthataḥ

parimāṇagatī cokte grahāṇāṃ sūryasaṃśrayāt/
yathā cāśu viṣāt prāptā śambhoḥ kaṇṭhasya nīlatā

brahmaprasāditasyāśu viṣādaḥ śūlapāṇinaḥ/
stūyamānaḥ surairviṣṇuḥ stauti devaṃ maheśvaram

liṅgodbhavakathā puṇyā sarvapāpapraṇāśinī/
viśvarūpāt pradhānasya pariṇāmo'yamadbhutaḥ

purūravasa ailasya māhātmyānuprakīrttanam/
pitṝṇāṃ dviprakārāṇāṃ tarpaṇaṃ cāmṛtasya vai

tataḥ parvāṇi kīrttyante parvaṇāñcaiva sandhayaḥ/
svarga lokagatānāṃ ca prāptānāñcāpyadhogatim/
pitṝṇāṃ dviprakārāṇāṃ śrāddhenānugraho mahān

yugasaṃkhyāpramāṇaṃ ca kīrtyate ca kṛte yuge/
tretāyuge cāpakarṣādvārtāyāḥ saṃpravarttanam

varṇānāmāśramāṇāñca saṃkhyānañca pravarttanam/
varṇānāmāśramāṇāñca saṃsthitirdharmatastathā

yajñapravarttanañcaiva saṃvādo yatra kīrtyate/
ṛṣīṇāṃ vasunā sārddhaṃ vasoścādhaḥ punargatiḥ

praśnānāṃ durvacatvaṃ ca svāyambhuvamṛte manum/
praśaṃsā tapasaścoktā yugāvasthāśca kṛtsnaśaḥ/
dvāparasya kaleścātra saṅkṣepeṇa prakīrtanam

devatiryaṅmanuṣyāṇāṃ pramāṇāni yugeyuge/
kīrtyante yugasāmarthyāt pariṇāhocchrayāyuṣaḥ

śiṣṭādīnāṃ ca nirdeśaḥ prādurbhāvaśca kīrtyate/
vedasya tadvijātānāṃ maṃtrāṇāṃ ca prakīrtanam

śākhānāṃ parimāṇaṃ ca vedavyāsādiśabdanam/
manvantarāṇāṃ saṃhāraḥ saṃhārānte ca sambhavaḥ

devatānāmṛṣīṇāṃ ca manoḥ pitṛgaṇasya ca/
na śakyaṃ vistarādvaktumityuktaṃ ca samāsataḥ

manvantarasya saṃkhyā ca mānuṣeṇa prakīrtitā/
manvantarāṇāṃ sarveṣāmetadeva ca lakṣaṇam

atītānāgatānāṃ ca varttamānena kīrttyate/
tathā manvantarāṇāṃ ca pratisandhānalakṣaṇam

atītānāgatānāṃ ca proktaṃ svāyambhuve'ntare/
manvantaratrayaṃ caiva kālajñānaṃ ca kīrttyate

manvantareṣu devānāṃ prajeśānāṃ ca kīrttanam/
dakṣasya cāpi dauhitrāḥ priyāyā duhituḥ sutāḥ //
brahmādibhiste janitā dakṣeṇaiva ca dhīmatā

sāvarṇādyāśca kīrttyante manavo merumāśritāḥ/
dhruvasyottānapādasya prajāsargopavarṇanam

pṛthunāpi ca vainyena bhūmerddohapravarttanam/
pātrāṇāṃ payasāṃ caiva vaṃśānāṃ ca viśeṣaṇam/
brahmādibhiḥ pūrvameva dugdhā ceyaṃ vasundharā

daśabhyastu pracetebhyo māriṣāyāṃ prajāpateḥ/
dakṣasya kīrttyate janma somasyāṃśena dhīmataḥ

bhūtabhavyabhaveśatvaṃ mahendrāṇāṃ ca kīrttyate/
manvādikā bhaviṣyanti ākhyānairbahubhirvṛtāḥ

vaivasvatasya ca manoḥ kīrttyate sargavistaraḥ/
devasya mahato yajñe vāruṇīṃ bibhratastanum/
brahmaśukrāt samutpattirbhṛgvādīnāṃ ca kīrtyate

vinivṛtte prajāsarge cākṣuṣasya manoḥ śubhe/
dakṣasya kīrttyate sargo dhyānādvaivasvatai'ntare

nāradaḥ priyasaṃvādī dakṣaputrānmahābalān

nāśayāmāsa śāpāya ātmano brahmaṇaḥ sutaḥ

tato dakṣo'sṛjat kanyā vīriṇyāmeva viśrutāḥ/
kīrttyate dharmasargaśca kāśyapasya ca dhīmataḥ

ata ūrdhvaṃ brahmaṇaśca viṣṇoścaiva bhavasya ca/
ekatvaṃ ca pṛthaktvaṃ ca viśeṣatvaṃ ca kīrtyate

īśatvācca yathā śaptā jātā devāḥ svayambhuvā/
marutprasādo marutāṃ dityā devāṃśasambhavāḥ

kīrttyante marutāñcātha gaṇāste saptasaptakāḥ/
devatvaṃ pitṛvākyena vāyuskandhena cāśrayaḥ

daityānāṃ dānavānāñca gandharvoragarakṣasām/
sarvabhūtapiśācānāṃ paśūnāṃ pakṣivīrudhām/
utpattayaścāpsarasāṃ kīrttyante bahuvistarāt

samudrasaṃyogakṛtaṃ janmairāvatahastinaḥ/
vainateyasamutpattistathā cāsyābhiṣecanam

bhṛgūṇāṃ vistaraścoktastathā cāṅgirasāmapi/
kaśyapasya pulastyasya tathaivātrermmahātmanaḥ

parāśarasya ca muneḥ prajānāṃ yatra vistaraḥ/
devatānāmṛṣīṇāñca prajotpattistataḥ param

tisraḥ kanyāḥ prakīrttyante yāsu lokāḥ pratiṣṭhitāḥ/
pitṛdauhitranirddeśo devānāṃ janma cocyate

vistaraste bhagavataḥ pañcānāṃ sumahātmanām/
ilāyā vistaraścokta ādityasya tataḥ param

vikukṣicaritañcoktaṃ dhundhoścaiva nibarhaṇam/
bṛhadbalāntasaṃkṣepādikṣvākvādyāḥ prakīrttitāḥ

nimyādīnāṃ kṣitīśānāṃ yāvajjahugaṇāditi/
kīrttyate vistaro yaśca yayāterapi bhūpateḥ

yaduvaṃśasamuddeśo haihayasya ca vistaraḥ/
kroṣṭoranantaraṃ coktastathā vaṃśasya vistaraḥ

jyāmaghasya ca māhātmyaṃ prajāsargaśca kīrttyate/
devāvṛdhasya tvarkasya vṛṣṭeścaiva mahātmanaḥ

atrimitrānvayaścaiva viṣṇorddivyābhiśaṃsanam/
vivasvato'tha saṃprāptirmaṇiratnasya dhīmataḥ

yudhā jitaḥ prajāsargaḥ kīrttyate ca mahātmanaḥ/
kīrttyate cānvayaḥ śrīmān rājarṣerdevamīḍhuṣaḥ

punaśca janma cāpyuktaṃ caritañca mahātmanaḥ/
kaṃsasyacāpi daurātmyamekāntena samudbhavaḥ

vāsudevasya devakyāṃ viṣṇorjjanma prajāpateḥ/
viṣṇoranantarañcāpi prajāsargopavarṇanam

daivāsure samutpanne viṣṇunā strīvadhe kṛte/
saṃrakṣatā śakravadhaṃ śāpaḥ prāptaḥ purā bhṛgoḥ/
bhṛguścotthāpayāmāsa divyāṃ śukrasya mātaram

devānāmasurāṇāṃ ca saṃgrāmā dvādaśāyutāḥ/
nārasiṃhaprabhṛtayaḥ kīrttyante prāṇanāśanāḥ

śukreṇārādhanaṃ sthāṇordhīreṇa tapasā kṛtam/
varadānapralubdhena yatra śarvastavaḥ kṛtaḥ/
anantaraṃ vinirdiṣṭaṃ devāsuraviceṣṭitam

jayantyā saha sakte tu yatra śukre mahātmani/
asurānmohayāmāsa śukrarūpeṇa buddhimān/
bṛhaspatistu tān śukraḥ śaśāpa sumahādyutiḥ

uktaṃ ca viṣṇumāhātmyaṃ viṣṇorjanmādiśabdanam/
turvasuḥ śukradauhitro devayānyāṃ yadorabhūt/
anurdruhyustathā pūruryayātitanayā nṛpāḥ

atra vaṃśyā mahātmānasteṣāṃ pārthivasattamāḥ/
kīrtyante dīrghayaśaso bhūridraviṇatejasaḥ

kuśikasya ca viprarṣeḥ samyagyo dharmasaṃśrayaḥ/
bārhaspatyantu surabhiryatra śāpamihānudat

kīrttanaṃ jahnuvaṃśasya śantanorvīryaśabdanam/
bhaviṣyatāṃ tathā rājñāmupasaṃhāraśabdanam

anāgatānāṃ saptānāṃ manūnāṃ copavarṇanam/
bhaumasyānte kaliyuge kṣīṇe saṃhāravarṇanam

parārddhaparayoścaiva lakṣaṇaṃ parikīrttyate/
brahmaṇo yojanāgreṇa parimāṇavinirṇayaḥ

naimittikaḥ prākṛtikastathaivātyantikaḥ smṛtaḥ/
trividhaḥ sarva bhūtānāṃ kīrttyate pratisañcaraḥ

anāvṛṣṭirbhāskarācca ghoraḥ saṃvarttako'nalaḥ/
megho hyekārṇavaṃ vāyustathā rātrirmahātmanaḥ

saṃkhyālakṣaṇamuddiṣṭaṃ tato brāhmaṃ viśeṣataḥ/
bhūrādīnāṃ ca lokānāṃ saptānāmupavarṇanam/
kīrttyante cātra nirayāḥ pāpānāṃ rauravādayaḥ

brahmalokopariṣṭāttu śivasya sthānamuttamam/
yatra saṃhāramāyānti sarvabhūtāni saṃkṣaye

sarveṣāṃ caiva sattvānāṃ pariṇāmavinirṇayaḥ/
brahmaṇaḥ pratisaṃsarge sarvasaṃhāravarṇanam

aṣṭarūpyamataḥ proktaṃ prāṇasyāṣṭakameva ca/
gatiścordhvamadhaścoktā dharmādharmasamāśrayāt

kalpe kalpe ca bhūtānāṃ mahatāmapi saṃkṣayaḥ/
prasaṃkhyāya ca duḥkhāni brahmaṇaścāpyanityatā

daurātmyaṃ caiva bhogānāṃ pariṇāmavinirṇaṃyaḥ/
durlabhatvaṃ ca mokṣasya vairāgyāddoṣadarśanam

vyaktāvyaktaṃ parityajya sattvaṃ brahmaṇi saṃsthitam/
nānātvadarśanācchuddhaṃ tatastadabhivarttate

tatastāpatrayātīto nīrūpākhyo nirañjanaḥ/
ānando brahmaṇaḥ prokto na bibheti kutaścana

kīrttyate ca punaḥ sargo brahmaṇo'nyasya pūrvavat/
kīrttyate ṛṣivaṃśaśca sarvapāpapraṇāśanaḥ

iti kṛtyasamuddeśaḥ purāṇasyopavarṇitaḥ/
kīrttyante jagato hyatra sarvapralayavikriyāḥ/
pravṛttayaśca bhūtānāṃ nivṛttīnāṃ phalāni ca

prādurbhāvo vasiṣṭhasya śakterjanma tathaiva ca/
saudāsānnigrahastasya viśvāmitrakṛtena ca

parāśarasya cotpattiradṛśyatvaṃ yathā vibhoḥ/
jajñe pitṝṇāṃ kanyāyāṃ vyāsaścāpi yathā muniḥ

śukasya ca tathā janma saha putrasya dhīmataḥ/
parāśarasya pradveṣo viśvāmitrakṛto yathā

vasiṣṭhasambhṛtaścāgnirviśvāmitrajighāṃsayā/
santānahetorvibhunā cīrṇaḥ skandena dhīmatā/
daivena vidhinā vipra viśvāmitrahitaiṣiṇā

ekaṃ vedañcatuṣpādañcaturddhā punarīśvaraḥ/
yathā bibheda bhagavān vyāsaḥ sarvān svabuddhitaḥ/
tasya śiṣyaiḥ praśiṣyaiśca śākhā bhedāḥ punaḥ kṛtāḥ

prayogaiḥ ṣaḍ‌guṇīyaiśca yathā pṛṣṭaḥ svayambhuvā/
pṛṣṭena cānupṛṣṭāste munayo dharmakāṅkṣiṇaḥ//
deśaṃ puṇyamabhīpsantau vibhunā taddhitaiṣiṇā

sunābhaṃ divyarūpākhyaṃ satyāṅgaṃ śubhavikramam/
anaupamyamidañcakraṃ varttamānamatandritāḥ/
pṛṣṭhato yāta niyatāstataḥ prāpsyatha yaddhitam

gacchato dharmacakrasya yatra nemirviśīryate/
puṇyaḥ sa deśo mantavya ityuvāca tadā prabhuḥ/
uktvā caivamṛṣīn brahmā hyadṛśyatvamagātpunaḥ

gaṅgāgarbhasamāhāraṃ naimiṣeyatvameva ca/
ījire caiva satreṇa munayo naimiṣe tadā/
mṛte śaradvati tathā tasya cotthāpanaṃ kṛtam

ṛṣayo naimiṣeyāstu śraddhayā parayā punaḥ/
niḥsīmāṃ gāmimāṃ kṛtsnāṃ kṛtvā rājānamāharan/
yathāvidhi yathāśāstraṃ tamātithyairapūjayan

prītaṃ tathā kṛtātithyaṃ rājānaṃ vidhivattadā/
antarddhānagataḥ krūraḥ svarbhānurasuro'harat

anusasrurhataṃ cāpi nṛpamaiḍaṃ yathā purā/
gandharva sahitaṃ dṛṣṭvā kalāpagrāmavāsinam

sannipātaḥ punastasya yathā yajñe maharṣibhiḥ/
dṛṣṭvā hiraṇmayaṃ sarvaṃ yajñe vastu mahātmanām

tadā vai naimiṣeyāṇāṃ satre dvādaśavārṣike/
yathā vivadamānastu aiḍaḥ saṃsthāpitastu taiḥ

janayitvā tvaraṇyānte aiḍaputraṃ yathāyuṣam/
samāpayitvā tatsatramāyuṣaṃ paryupāsate

etatsarvaṃ yathāvṛttaṃ vyākhyātaṃ dvijasattamāḥ/
ṛṣīṇāṃ paramaṃ cātra lokatantramanuttamam

brahmaṇā yatpurā proktaṃ purāṇaṃ jñānamuttamam/
avatāraśca rudrasya dvijānugrahakāraṇāt

tathā pāśupatā yogāḥ sthānānāñcaiva kīrttanam/
liṅgodbhavasya devasya nīlakaṇṭhatvameva ca

kathyate yatra viprāṇāṃ vāyunā brahmavādinā/
dhanyaṃ yaśasyamāyuṣyaṃ puṇyaṃ pāpapraṇāśanam/
kīrttanaṃ śravaṇaṃ cāsya dhāraṇañca viśeṣataḥ

anena hi krameṇedaṃ purāṇaṃ saṃpracakṣyate/
sukhamarthaḥ samāsena mahānapyupalabhyate/
tasmāt kiñcitsumuddiśya paścādvakṣyāmi vistaram

pādamādyamidaṃ samyak yo'dhīyīta jitendriyaḥ/
tenādhītaṃ purāṇaṃ tat sarvaṃ nāstyatra saṃśayaḥ

yo vidyāccaturo vedān sāṅ‌gopaniṣado dvijaḥ/
na cetpurāṇaṃ saṃvidyānnaiva sa syādvicakṣaṇaḥ

itihāsapurāṇābhyāṃ vedaṃ samupabṛṃhayet/
bibhetyalpaśrutādvedo māmayaṃ pratariṣyati

abhyasannimamadhyāyaṃ sākṣāt proktaṃ svayambhuvā/
āpadaṃ prāpya mucyeta yatheṣṭāṃ prāpnuyādghatim

yasmāt purā hyanatīdaṃ purāṇaṃ tena tat smṛtam/
niruktamasya yo veda sarvapāpaiḥ pramucyate

nārāyaṇaḥ sarvamidaṃ viśvaṃ vyāpya pravarttate/
tasyāpi jagataḥ sraṣṭuḥ sraṣṭā devo maheśvaraḥ

ataśca saṃkṣepamimaṃ śrṛṇudhvaṃ maheśvaraḥ sarvamidaṃ purāṇam/
sa sargakāle ca karoti sargān saṃhārakāle punarādadīta

iti śrīmahāpurāṇe vāyuprokte anukramaṇikā nāma prathamo'dhyāyaḥ