Varaha Purana · Chapter 33

śrīvarāha uvāca /
athāparāṃ rudrasaṃbhūtimādyāṃ śrṛṇuṣva rājanniti so'bhyuvāca /
mahātapāḥ prītito dharmmadakṣaḥ kṣamāstradhārī ṛṣirugratejāḥ

jātaḥ prajānāṃ patirugratejā jñānaṃ paraṃ tattvabhāvaṃ viditvā /
sṛṣṭiṃ sisṛkṣuḥ kṣubhito'tikopāda vṛddhikāle jagataḥ prakāmam

tapasyato'taḥ sthirakīrtiḥ purāṇo rajastamodhvastagatirbabhūva /
varo vareṇyo varadaḥ pratāpī kṛṣṇāruṇaḥ puruṣaḥ piṅganetraḥ

rudannukto brahmaṇā mā ruda tvaṃ rudrastato'sāvabhavat purāṇaḥ /
nayasva sṛṣṭiṃ vitatasvarūpāṃ bhavān samartho'si mahānubhāva

ityuktamātraḥ salile mamajjamagne sasarjātmabhavāya dakṣaḥ /
kasthe tadā devavare vitenuḥ sṛṣṭiṃ tu te mānasā brahmajātāḥ

tasyāṃ tatāyāṃ tu surādhipe tu paitāmahaṃ yajñavaraṃ prakāmam /
magnaḥ purā yatsalile sa rudraḥ utsṛjya viśvaṃ tu surān sisṛkṣuḥ

sustrāva yajñaṃ surasiddhayakṣānupāgatān krodhavaśaṃ jagāma /
manyuṃ pradīptaṃ paribhāvya kena sṛṣṭaṃ jaganmāṃ vyatiricya mohāt

hā heti cokte jvalanārciṣastu tatrābhavan kṣudrapiśācasaṅghā vetālabhūtāni ca yogisaṅghāḥ

ghanaṃ yadā tairvitataṃ viyacca bhūmiśca sarvāśca diśaśca lokāḥ /
tadā sa sarvajñatayā cakāra dhanuścaturviṃśatihastamātram

guṇaṃ trivṛttaṃ ca cakāra roṣādādatta divye ca dhanurguṇaṃ ca /
tataśca pūṣṇo daśanānavidhyad bhagasya netre vṛṣaṇau kratośca

sa viddhabījo vyapayātkratuśca mārgaṃ vāyurdhāradhan yajñavāṭāt /
devāśca sarve paśupatimupeyurjagmuśca sarve praṇatiṃ bhavasya

āgamya tatraiva pitāmahastu bhavaṃ pratītaḥ saṃpariṣvajya devān /
bhaktyopetān vīkṣayad devadevān vijñānamantaḥ kuru vīrabāho

rudra uvāca /
sṛṣṭaḥ pūrvaṃ bhavatā'haṃ na ceme kasmānna bhāgaṃ parikalpayanti /
yajñodbhavaṃ tena ruṣā mayeme hṛtajñānā vikṛtā devadeva

brahmā uvāca /
devāḥ śaṃbhuṃ stutibhirjñānahetor yajadhvamuccairasurāśca sarve /
yena rudro bhagavāṃstoṣameti sarvajñatā toṣamātrasya ca syāt

ityuktāstena te devāḥ stutiṃ cakrurmahātmanaḥ

devā ūcuḥ /
namo devātidevāya trinetrāya mahātmane /
raktapiṅgalanetrāya jaṭāmukuṭadhāriṇe

bhūtavetālajuṣṭāya mahābhogopavītine /
bhīmāṭṭahāsavaktrāya kapardin sthāṇave namaḥ

pūṣṇo dantavināśāya bhaganetrahane namaḥ /
bhaviṣyavṛṣacihnāya mahābhūtapate namaḥ

bhaviṣyatripurāntāya tathāndhakavināśine /
kailāsavaravāsāya karikṛttinivāsine

vikarālodrdhvakeśāya bhairavāya namo namaḥ /
agnijvālākarālāya śaśimaulikṛte namaḥ

bhaviṣyakṛtakāpālivratāya parameṣṭhine /
tathā dāruvanadhvaṃsakāriṇe tigmaśūline

kṛtakaṅkaṇabhogīndra nīlakaṇṭha triśūline /
pracaṇḍadaṇḍahastāya vaḍavāgnimukhāya ca

vedāntavedyāya namo yajñamūrte namo namaḥ /
dakṣayajñavināśāya jagadbhayakarāya ca

viśveśvarāya devāya śivaśaṃbhubhavāya ca /
kapardine karālāya mahādevāya te namaḥ

evaṃ devaiḥ stutaḥ śaṃbhurugradhanvā sanātanaḥ /
uvāca devadevo'haṃ yatkaromi taducyatām

devā ūcuḥ /
vedaśāstrāṇi vijñānaṃ dehi no bhava māciram /
yajñaṃ sarahasyaṃ no yadi tuṣṭo'si naḥ prabho

mahādeva uvāca /
bhavantaḥ paśavaḥ sarve bhavantu sahitā iti /
ahaṃ patirvo bhavatāṃ tato mokṣamavāpsyatha /
tatheti devāstaṃ prāhustataḥ paśupatirbhavat

brahmā paśupatiṃ prāha prasannenāntarātmanā /
caturddaśī te deveśa tithirastu na saṃśayaḥ

tasyāṃ tithau bhavantaṃ ye yajante śraddhayānvitāḥ /
upoṣya paścādbhuñjīyādgodhūmānnena vai dvijān //
tasya tvaṃ tuṣṭimāpanno naya sthānamanuttamam

evamaktastadā rudro brahmaṇā'vyaktajanmanā /
dantān netre phale prādādbhagapūṣṇoḥ kratorapi /
parijñānaṃ ca sakalaṃ sa prādācca sureṣvapi

evaṃ rudrasya saṃbhūtiḥ saṃbhūtā brahmaṇaḥ purā /
anenaiva prayogena devānāṃ patirucyate

yaścainaṃ śrṛṇuyānnityaṃ prātarutthāya mānavaḥ /
sarvapāpavinirmukto rudralokamavāpnuyāt

// iti śrīvarāharapurāṇe bhagavacchāstre trayastriṃśo'dhyāyaḥ