Varaha Purana · Chapter 34

mahātapā uvāca /
pitṝṇāṃ saṃbhavaṃ rājan kathyamānaṃ nibodha me /
pūrvaṃ prajāpatirbrahmā sisṛkṣurvividhāḥ prajāḥ

ekāgramanasā sarvāstanmātrā manasā bahiḥ /
kṛtvā paramakaṃ brahma dhyāyan sargepsuruccakaiḥ

tasyātmani tadā yogaṃ gatasya parameṣṭhinaḥ /
tanmātrā niryayurdehād dhūmavarṇākṛtitviṣaḥ

pibāma iti bhāṣantaḥ surān soma iti sma ha /
ūrdhvaṃ jigamiṣanto vai viyatsaṃsthāstapasvinaḥ

tān dṛṣṭvā sahasā brahmā tiryaksaṃsthāna unmukhān /
bhavantaḥ pitaraḥ santu sarveṣāṃ gṛhamedhinām

ūrdhvavaktrāstu ye tatra te nāndīmukhasaṃjñitāḥ /
vṛddhiśrāddheṣu satata pūjyā śrutividhānataḥ

agniṃ puraskṛto yaistu te dvijā agnihotriṇaḥ /
nityairnaimittikaiḥ kāmyaiḥ pārvaṇaistarpayantu tān

bahiḥpravaraṇā ye ca kṣatriyāstarpayantu tān /
ājyaṃ pibanti ye cātra tānarcayantu viśaḥ sadā

brāhmaṇairabhyanujñātāḥ śūdrāḥ svapitṛnāmataḥ /
tānevārcayatāṃ samyagvidhimantrabahiṣkṛtāḥ

anāhitāgnayo ye ca brahmakṣatraviśo narāḥ /
svakālinaste'rcayantu lokāgnipurataḥ sadā

ityevaṃ pūjitā yūyamiṣṭān kāmān prayacchata /
āyuḥ kīrtiṃ dhanaṃ putrān vidyāmabhijanaṃ smṛtim

ityuktvā tu tadā brahmā teṣāṃ panthānamākarot /
dakṣiṇāyanasaṃjñaṃ tu pitṝṇāṃ ca pitāmahaḥ

tūṣṇīṃ sasarja bhūtāni tamūcuḥ pitarastataḥ /
vṛttiṃ no dehi bhagavan yayā vindāmahe sukham

brahmā uvāca /
amāvāsyādinaṃ vo'stu tasyāṃ kuśatilodakaiḥ /
tarpitā mānuṣaistṛptiṃ parāṃ gacchatha nānyathā

tilā deyāstathaitasyāmupoṣya pitṛbhaktitaḥ /
paramaṃ tasya saṃtuṣṭā varaṃ yacchata mā ciram

// iti śrīvarāhapurāṇe bhagavacchāstre catustriṃśo'dhyāyaḥ