Varaha Purana · Chapter 212

atha saṃsāracakropākhyāne prabodhanīyavarṇanam //
nārada uvāca //
sādhu sādhu mahārāja sarvadharmavidāṃ vara //
tvayā tu kathitā divyā katheyaṃ dharmasaṃhitā

ato'hamapi suprītastava dharmapathe sthitaḥ //
tava vākyānnissṛtāni proktāni ca śrutāni ca

tvayāhaṃ caiva rājendra pūjitaśca viśeṣataḥ //
gacchāmi tvarito lokānyatra me ramate manaḥ

svasti te'stu mahārāja tvakampo bhava suvrata //
evamuktvā tato yāto nārado munisattamaḥ

tejasā dyotayansarvaṃ gaganaṃ bhāskaro yathā //
vicacāra divaṃ ramyāṃ kāmacāro mahāmuniḥ

gate tasmiṃstu suciraṃ sa rājā dharmavatsalaḥ //
māṃ dṛṣṭvā sumanā viprā vākyaiścitrairavandayan

kṛtvā pūjāṃ ca me yuktāṃ priyamuktvā ca suvrata //
visarjayāmāsa vibhuḥ suprītenāṃtarātmanā

etadvaḥ kathitaṃ viprāstasya rājñaḥ purottame //
yathā dṛṣṭaṃ śrutaṃ caiva yathā cehāgato hyaham

vaiśaṃpāyana uvāca //
tasya tadvacanaṃ śrutvā hṛṣṭapuṣṭāstapodhanāḥ //
kecidvaikhānasāstatra kecidāsannirāsanāḥ

sādhu sādhviti caivoktvā vismayotphullalocanāḥ //
yāyāvarāstathā cānye vānaprasthāstathāpare

śālānīśca tathā kecitkāpotīvṛttimāsthitāḥ //
tathā cānye jagurvṛttiṃ sarvabhūtadayāṃ śubhām

śiloṃcchāśca tathaivānye kāṣṭhāntāśca mahaujasaḥ //
apākapācinaḥ kecitpākinaśca kvacitpunaḥ

nānāvidhidharāḥ kecijjitātmānastu kecana //
sthānamaunavratāḥ kecittathānye jalaśāyinaḥ

tathorddhvaśāyikāścānye tathānye mṛgacāriṇaḥ //
paṃcāgnayastathā kecit kecitparṇaphalāśinaḥ

abbhakṣā vāyubhakṣāśca tathānye śākabhakṣiṇaḥ //
ato'nye'pyatitīvraṃ vai tapaścaiva prapedire

tapaso'nyanna cāstīti cintayitvā punaḥ punaḥ //
janmano maraṇāccaiva keciddhīrā maharṣayaḥ

tyaktvā dharmamadharmaṃ ca śāśvatīṃ dhiyamāsthitāḥ //
śrutvā caiva kathāmetāmṛṣayo divyavarcasaḥ

jagṛhurniyamāṃstāṃstānbhayahetoraninditāḥ //
nāciketo'pi dhamārtmā putro dṛṣṭvā tapodhanam

prītyā paramayā yukto dharmamevānvacintayat //
vedārthamamitaṃ viṣṇuṃ śuddhaṃ cinmayamīśvaram

cintayāmāsa dharmātmā tapaḥ paramamāsthitaḥ //
idaṃ tu paramākhyānaṃ bhagavadbhaktikārakam

śṛṇuyācchrāvayedvāpi sarvakāmānavāpnuyāt

iti śrīvarāhapurāṇe prāgitihāse saṃsāracakropākhyāne prabodhanīyaṃ nāma dvādaśādhikadviśatatamo'dhyāyaḥ