Varaha Purana · Chapter 209

atha pativratāmāhātmya varṇanam //
nārada uvāca //
karmaṇā kena rājendra tapasā vā tapodhanāḥ //
uttamāṃ ca gatiṃ yāṃti kṛṣṇavāsaḥ praśaṃsa me

evamuktastu dharmātmā nāradenābravīttadā //
yama uvāca //
na tasya niyamo vipra tapo naiva ca suvrata

upavāso na dānaṃ vā na devo vā mahāmune //
yādṛśī tu bhavedvipra śṛṇu tattvaṃ samāsataḥ

prasupte yā prasvapiti jāgarti vibudhe svayam //
bhuṅkte tu bhojite vipra sā mṛtyuṃ jayati dhuvam

maune maunā bhavedyā tu sthite tiṣṭhati yā svayam //
sā mṛtyuṃ jāyate vipra nānyatpaśyāmi kiṃcana

ekadṛṣṭirekamanā bhartturvacanakāriṇī //
tasyā bibhīmahe sarve ye tathānye tapodhana

devānāmapi sā sādhvī pūjyā paramaśobhanā //
bhartrā cābhihitā yāpi na pratyākhyāyinī bhavet

varttamānāpi viprendra pratyākhyātāpi vā sadā //
na daivataṃ samprayāti patyuranyaṃ kadācana

sā na mṛtyumukhaṃ yāti evaṃ yā strī pativratā //
evaṃ yā tu bhavennityaṃ bharttuḥ priyahite ratā

anuveṣṭanabhāvena bharttāramanugacchati //
sā tu mṛtyumukhadvāraṃ na gacchedbrahmasambhava

eṣa mātā pitā bandhureṣa me daivataṃ param //
evaṃ śuśrūṣate yā tu sā māṃ vijayate sadā

pativratā tu yā sādhvī tasyāṃ cāhaṃ kṛtāñjaliḥ //
bhartāramanudhyāyantī bharttāramanugacchatī

bharttāramanuśocantī mṛtyudvāraṃ na paśyati //
gītavāditranṛtyāni prekṣaṇīyānyanekaśaḥ

na śṛṇoti na paśyedyā mṛtyudvāraṃ na paśyati //
snāntī ca tiṣṭhatī vāpi kurvantī vā prasādhanam

nānyaṃ yā manasā paśyenmṛtyudvāraṃ na paśyati //
devatā arcayantaṃ vā bhujyamānamapi dvija

patiṃ na tyajate cittānmṛtyudvāraṃ na paśyati //
bhānau cānudite vāpi utthāya ca tapodhana

gṛhaṃ mārjayate nityaṃ mṛtyudvāraṃ na paśyati //
cakṣurdehaśca bhāvaśca yasyā nityaṃ susaṃvṛtam

śaucācārasamāyuktā sāpi mṛtyuṃ na paśyati//
bhartturmukhaṃ prapaśyedyā bharttuścittānusāriṇī

varttate ca hite bhartturmṛtyudvāraṃ na paśyati //
evaṃ kīrttimatāṃ loke dṛśyante divi devatāḥ

mānuṣāṇāṃ ca bhāryā vai tatra deśe tu dṛśyate //
kathitaiva purā vipra ādityena pativratā

mayā tasmāttu viprarṣe yathāvṛttaṃ yathāśrutam //
guhyametattato dṛṣṭvā pūjayāmi pativratāḥ

iti śrīvarāhapurāṇe saṃsāracakre pativratāmāhātmyaṃnāma navādhikadviśatatamo'dhyāyaḥ