વરાહ પુરાણ · અધ્યાય 205

અથ શુભાશુભ ફલાનુકીર્તનવર્ણનમ્ ॥
ઋષિપુત્ર ઉવાચ ॥
ઇદમન્યત્પુરા વિપ્રાઃ શ્રૂયતાં તસ્ય ભાષિતમ્ ॥
યમસ્ય ચિત્રગુપ્તસ્ય યચ્ચ તત્ર મયા શ્રુતમ્

અયં તુ ભવતાં યાતુ યાતુ સ્વર્ગં મહીક્ષિતામ્ ॥
અયં વૃક્ષસ્ત્વયં તિર્યગયં મોક્ષં વ્રજેન્નરઃ

અયં નાગો ભવેચ્છીઘ્રમયં તુ પરમાં ગતિમ્ ॥
સ્વપૂર્વકાન્પશ્યતેઽયમાત્મનસ્તુ પિતામહાન્

ક્લિશ્યતો રુદતશ્ચૈવ વદતશ્ચ પુનઃપુનઃ ॥
સ્વેન દોષેણ સર્વે વા અક્ષયં નરકઙ્ગતાઃ

દારત્યાગી ત્વધર્મિષ્ઠઃ પુત્રપૌત્રવિવર્જિતઃ ॥
ક્ષિપ્તં વૈ રૌરવે હ્યેનં ક્ષપયન્તુ મહૌજસઃ

મુચ્યતાં ત ઇમે સર્વે હ્યતીતાનાગતાસ્તથા ॥
મુચ્યન્તામાશુ મુચ્યન્તાં ત એતે પાપવર્જિતાઃ

આગમે ચ વિપત્તૌ ચ સર્વધર્માનુપાલકાઃ ॥
તે તુ કલ્પાન્બહૂન્સ્વર્ગ ઉષિત્વા હ્યનસૂયકાઃ

બહુસુન્દરનાર્યઙ્કે હ્યાદ્યે પરમધાર્મિકમ્ ॥
કલૌ માનુષતાં યાતુ ધર્મસ્યેહ નિદર્શનમ્

ત્રિવિષ્ટપે પરિક્લેશો વાસો હ્યસ્યાક્ષયો ભવેત્ ॥
અયમાયોધને શત્રું હત્વા તુ નિધનઙ્ગતઃ

બ્રાહ્મણાર્થે ગવાર્થે વા રાષ્ટ્રાર્થે નિધનઙ્ગતઃ ॥
શક્રસ્ય હ્યમરાવત્યાં નિવેદયત મા ચિરમ્

તત્ર વૈમાનિકો ભૂત્વા કલ્પમેકં નિવત્સ્યતિ ॥
તથૈવાયં મહાભાગો ધર્માત્મા ધર્મવત્સલઃ

બહુદાનરતો નિત્યં સર્વભૂતાનુકમ્પકઃ ॥
એનં ગન્ધૈશ્ચ માલ્યૈશ્ચ શીઘ્રમેવ પ્રપૂજય

અસ્મૈ પૂજા ભવેદ્દેયા મયાદિષ્ટા મહાત્મને ॥
વીજ્યતાં ચામરૈરેષ રથમસ્મૈ પ્રદીયતામ્

પ્રેતવાસં સમુત્સૃજ્ય હીતો યાતુ ત્રિવિષ્ટપમ્ ॥
ઇન્દ્રસ્યાર્દ્ધં ભવેચ્ચૈવ દેવદેવસ્ય ધીમતઃ

શઙ્ખતૂર્યનિનાદેન તત્ર વૈ વિજયેન ચ ॥
તત્ર વૈ પૂજયિત્વા ચ પ્રાયશો લભતાં સુખમ્

અયં ગચ્છતુ ભદ્રં ચાપીન્દ્રદેશં દુરાસદમ્ ॥
અનેન વૈ કીર્તિમતા લોકઃ સર્વો હ્યલંકૃતઃ

ગુણૈશ્ચ શતસંખ્યાકૈઃ શક્ર એનં પ્રતીક્ષતે ॥
તાવત્સ્થાસ્યતિ ધર્માત્મા યાવચ્છક્રસ્ત્રિવિષ્ટપે

તાવત્સ મોદતે સ્વર્ગે યાવદ્ધર્મોઽનુમીયતે ॥
તતચ્યુતશ્ચ કાલેન માનુષ્યે સુખમશ્નુતે

રત્નવેણુપ્રદશ્ચૈવ સર્વધર્મૈરલંકૃતઃ ॥
અશ્વિનોર્નય લોકં તુ સર્વસૌખ્યસમન્વિતમ્

અયં યાતુ મહાભાગો દેવદેવં સનાતનમ્ ॥
અતિસૃષ્ટઃ પુરા યેન યથોક્તાઃ સુખદોહનાઃ

સર્વશક્ત્યા સમેતેન દ્વિજેભ્ય ઉપપાદિતાઃ ॥
શુચીનાં બ્રાહ્મણાનામ્બહ્વન્નદાનં વિશેષતઃ

તેન કલ્પં વસિષ્યન્તિ રુદ્રકલ્પા મનોરમાઃ ॥
તત્ર કલ્પં વસેદ્ગત્વા રુદ્રલોકં ન સંશયઃ

તેન દત્તં દ્વિજાતિભ્યો મધુખણ્ડપુરઃસરમ્ ॥
રસૈશ્ચ વિવિધૈર્યુક્તં સર્વગન્ધમનોરમમ્

તરુણી ક્ષીરસમ્પન્ના ગૌઃ સુવર્ણયુતા શુભા ॥
સવત્સા હેમવાસાશ્ચ દત્તાઽનેન મહાત્મના

અસ્ય લેખ્યં મયા દૃષ્ટં તિસ્રઃ કોટ્યસ્ત્રિવિષ્ટપે ॥
સ્વર્ગાત્પરિચ્યુતશ્ચાપિ ઋષીણાં જાયતે કુલે

સુવર્ણસ્ય પ્રદાતા ચ ત્રિદશેભ્યો નિવેદ્યતામ્ ॥
ત્રિદશાનભ્યનુજ્ઞાપ્ય યાતુ દેવમુમાપતિમ્

તત્રૈષ વૈ મહાતેજા યથેષ્ટં કામમાપ્નુયાત્ ॥
તત્રૈવાયમપિ પ્રેતગણભક્તો મહાતપાઃ

પ્રયાતુ પિતૃભિઃ સાર્દ્ધં તર્પિતા યેન પૂર્વજાઃ ॥
દાનવ્રતા દિવં યાન્તુ નાનાલોકનમસ્કૃતાઃ

અયં ભદ્રો મહાકામં સર્વભૂતહિતે રતઃ ॥
સર્વકામૈરયં પૂજ્યઃ સર્વકામપ્રદો નરઃ

ક્ષિતિપ્રદો દ્વિજાતિભ્યો હ્યયં યાતુ ત્રિવિષ્ટપમ્ ॥
તત્રૈવ તિષ્ઠતાદ્વીરો બ્રહ્મલોકે સહાનુગઃ

વિવિધૈઃ કામભોગૈસ્તુ સેવ્યમાનો નરોત્તમઃ ॥
અક્ષયં ચાજરં સ્થાનં પૂજ્યમાનો મહર્ષિભિઃ

ઇતિ શ્રીવરાહપુરાણે ભગવચ્છાસ્ત્રે સંસારચક્રે શુભાશુભફલાનુકીર્ત્તનં નામ પઞ્ચાધિકદ્વિશતતમોઽધ્યાયઃ