Varaha Purana · Chapter 204

atha dūtapreṣaṇavarṇanam //
ṛṣiruvāca //
idaṃ caivāparaṃ tasya vadato hi mayā śrutam //
citraguptasya viprendrā vacanaṃ lokaśāsinaḥ

dūre'sāviti kiṃ kāryaṃ na kṣayo'styasya karmaṇaḥ //
kiṃ kṛpāṃ kurute tasmingṛhāṇa jahi mā vyathaḥ

vrīḍitaḥ kimbhavāñjñātaṃ kiṃ tiṣṭhati parāṅmukhaḥ //
kiṃ na gacchasi vegena kiṃ tvayā suciraṃ kṛtam

gaccha gaccha punastatra śīghraṃ cainamihānaya //
aśakto'smīti kiṃ roṣamarhante darpamīdṛśam

kiṃ tvaṃ vadasi durbuddhe vivāhastasya varttate //
ūrdhvaretāstapasvīti tvaṃ māṃ bhāṣayase katham

kiṃ tvaṃ vadasi garhyaṃ ca muhūrttaṃ paripālaya //
ramate kāntayā sārddhamiti kiṃ tvaṃ prabhāṣase

pativrateti sādhvīti rahasyaṃ bhāṣase punaḥ//
kiṃ kiṃ vadasi bālo hi niśi caivāgato gṛham

ānīyate kathaṃ jñātvā bhoktukāmaṃ kathaṃ hare //
jalaśāyinaṃ kathaṃ caiva dātukāmaṃ kathaṃ hare

dhārmikā yūyamevātra ahameko nṛśaṃsavat //
yāta yāta tathā dṛṣṭvā yathākālo'natikramet

śīghraṃ tvaṃ bhava sarpo hi vyāghrastvaṃ ca sarīsṛpaḥ //
jale grāho bhava tvaṃ hi tvaṃ kṛmistvaṃ sarīsṛpaḥ

narakānugatastvaṃ hi vyādhibhūtaḥ samāśrayaḥ //
atīsāro bhava tvaṃ hi tvaṃ chardistvaṃ punarbhavaḥ////
karṇarogo viṣūcī ca nityarogaśca sambhavaḥ //
jvaro bhava mahāghoro jale grāho durāsadaḥ

vātavyādhistathā ghorastathaiva tvaṃ jalodaraḥ//
apasmārastvamunmādo vātarogastathaiva ca

vibhramastvaṃ bhavecchīghraṃ viṣṭambhaśca punarbhava //
vyādhirbhava mahāghoro hyayaṃ tṛṣṇāṃ tu vindatu

yathākālaṃ yathādṛṣṭaṃ tāvatkālo'tra tiṣṭhatu //
kālasaṃharaṇe vāpi śubhasyāgamane'pi vā

yūyaṃ ca kṛtakarmāṇastato mokṣamavāpsyatha //
drutaṃ dravata vegena sarve gacchata mā ciram

varājñā dharmarājasya yā mayā samudāhṛtā //
ekāhaṃ kṣapayestatra dvirātraṃ tatra mā ciram

trirātraṃ vai catūrātraṃ ṣaḍrātraṃ daśarātrakam //
pakṣaṃ vā māsamekaṃ vā bahūnmāsāṃstathāpi vā

kṣapayitvā yathākālaṃ tato mokṣamavāpsyatha //
bhūtātmā mohavāṃstatra karuṇaḥ kaṣṭameva ca

yasminyasmiṃstu kāle'haṃ yāvataśca śrayāmyaham //
tasmiṃstasminmahākālaṃ yūyaṃ tatkarttumarhatha

viniyogā mayā sūktā yathāpūrvaṃ yathāśrutam //
jāgrataṃ vā pramattaṃ vā yathā kālo na sampatet

yatnāttathā tu karttavyaṃ bhavadbhirmama śāsanāt //
abhayaṃ cātra yacchāmi brāhmaṇebhyo na saṃśayaḥ

tasmādyāta ṛṣibhyaśca strībhyaścaiva mahābalāḥ //
yātanāyā na bhetavyamahamājñāpayāmi vaḥ

yathāvācyaṃ ca kuruta yathā kālo na gacchati //
yathākāmaṃ prakuruta yacca dṛṣṭaṃ yathā tathā

mayājñaptā viśeṣeṇa mṛtyunā saha saṅgataḥ //
yathā vīro mahātejāścitragupto mahāyaśāḥ

yathābravītsvayaṃ rudro yathā śakraḥ śacīpatiḥ //
yathājñāpayate brahmā citraguptastathā prabhuḥ

iti śrīvarāhapurāṇe saṃsāracakre dūtapreṣaṇaṃ nāma caturadhikadviśatatamo'dhyāyaḥ