Varaha Purana · Chapter 203

atha pāpasamūhānukramavarṇanam //
ṛṣiputra uvāca //
anyānyapi ca pāpāni citragupto dideśa ha //
vyāmiśrānkathyamānāṃśca śṛṇudhvaṃ tānmahaujasaḥ

śīlasaṃyamahīnānāṃ kṛṣṇapakṣānugāminām //
mahāpāpairupetānāṃ kathyatāṃ tatparābhavam

rājadviṣṭā gurudviṣṭāḥ sarve te vai vigarhitāḥ //
aviśvāsyā hyasambhāṣyāḥ kukṣimātraparāyaṇāḥ

hiṃsāvihāriṇaḥ krūrāḥ sūcakāḥ kāryadūṣakāḥ //
gaveḍakasya vadhakāḥ mahiṣājādikasya ca

dāvāgniṃ ye ca muṃcanti ye ca saukarikāstathā //
tatra kālamasaṃkhyeyaṃ pacyante pāpakāriṇaḥ

karmakṣayādyadā bhūyo mānuṣyaṃ prāpnuvanti te //
alpāyuṣo bhavantīha vyādhigrastāśca nityaśaḥ

garbha eva vipadyante mriyante bālakāstathā //
paririṃgaratāḥ kecinmriyante puruṣādhamāḥ

kāṣṭhavaṃśe ca śastre ca vāyunā jvalanena ca //
toyena vā pāśabandhaiḥ patanena viṣeṇa vā

mātāpitṛvadhaṃ kaṣṭaṃ mitrasambandhibandhujam //
bahuśaḥ prāpnuvantyete vidravaṃ cāpyabhīkṣṇaśaḥ

prāṇātipātanaṃ te vai prāpnuvanti yathā tathā //
lohakāḥ kārukāścaiva garbhāṇāṃ vinihiṃsakāḥ

mūlakarmakarā ye ca garadāḥ puradāhakāḥ //
ye ca pañjarakarttāro ye ca śūlopaghātakāḥ

piśunāḥ kalahāścaiva ye ca mithyāvidūṣakāḥ //
gokuñjarakharoṣṭrāṇāṃ carmakā māṃsabhedakāḥ

udvejanakarāścaṇḍāḥ pacyante narakeṣu te //
tatra kālaṃ tu samprāpya yātanāśca suduḥsahāḥ

karmakṣayo yadā bhūyo mānuṣyaṃ prāpnuvanti te //
hīnāṅgāḥ sudaridrāśca bhavaṃti puruṣādhamāḥ

śravaṇacchedanaṃ caiva nāsācchedanameva ca //
chedanaṃ hastapādānāṃ prāpnuvaṃti svakarmaṇā

śārīraṃ mānasaṃ duḥkhaṃ prāpnuvanti punaḥpunaḥ //
galavedanāstathogrāśca tathā mastakavedanāḥ

kukṣyāmayaṃ tathā tīvraṃ prāpnuvaṃti narādhamāḥ //
jaḍāndha badhirā mūkāḥ paṃgavaḥ pādasarpiṇaḥ

ekapakṣahatāḥ kāṇāḥ kunakhāścāmayāvinaḥ //
kubjāḥ khañjāstathā hīnā vikalāśca ghaṭodarāḥ

galatkuṣṭhāḥ śvitrakuṣṭhā bhavanti svaiśca karmabhiḥ //
vātāṇḍāścāṇḍahīnāśca pramehamadhumehinaḥ

yoniśūlākṣiśūlāśca śvāsa hṛdguhyaśūlinaḥ //
piṇḍakāvarttabhedaiśca plīhagulmādirogiṇaḥ

bahubhirdāruṇairghorairvyādhibhiḥ samanudgatāḥ //
ityetānhiṃsakānkrūrānghātayantu sudāruṇān

mithyāpralāpino dūtānpācayantu yathākramam //
karkaśāḥ puruṣāḥ satyā ye ca yoṣānirarthakāḥ

eṣāṃ caturvidhā bhāṣā yā mithyāpyabhidhīyate //
hāsyarūpeṇa yā bhāṣā citrarūpeṇa vā punaḥ

arahasyaṃ rahasyaṃ vā paiśunyena tu nindanāt //
udvegajananā vāpi kaṭukā lokagarhitāḥ

snehakṣayakarāṃ rūkṣāṃ bhinnavṛttavibhūṣitām //
kadalīgarbhanissārāṃ marmaspṛkkaṭukākṣarām

svarahīnāmasaṃkhyeyāṃ bhāṣaṃte ca nirarthakam //
ayaṃtritamukhā ye ca ye nibaddhāḥ pralāpinaḥ

dūṣayanti hi jalpanto'nṛjavo niṣṭhurāḥ śaṭhāḥ //
nirdayā gatalajjāśca mūrkhā marmavibhedinaḥ

na marṣayaṃti ye'nyeṣāṃ kīrtyamānāñchubhānguṇān //
durvācaḥ paruṣāṃścaṇḍānbandhayadhvaṃ narādhamān

tatastiryakprajāyante bahudhā kīṭa pakṣiṇaḥ //
loke doṣakarāścaiva lokadviṣṭāstathā pare//

tatra kālaṃ ciraṃ ghoraṃ pacyante pāpakāriṇaḥ//
karmakṣayo yadā bhūyo mānuṣyaṃ prāpnuvanti te

paribhūtā avijñātā naṣṭacittā akīrttayaḥ //
anarcyāścāpyanarhāśca svapakṣe hyavamānitāḥ

tyaktvā mitrāṇi mitreṣu jñātibhiśca nirākṛtāḥ //
lokadoṣakarāścaiva lokadveṣyāśca ye narāḥ

anyairapi kṛtaṃ pāpaṃ teṣāṃ patati mastake //
vajraṃ śastraṃ viṣaṃ vāpi dehāddehanipātanam

mithyāpralāpināmeṣāmuktā kleśaparamparā //
steyahāraṃ prahāraṃ ca nītihāraṃ tathaiva ca

steyakarmāṇi kurvanti prasahya haraṇāni ca //
karacaṇḍāśino ye ca rājaśabdopajīvinaḥ

pīḍayanti janān sarvānkṛpaṇāngrāmakūṭakān //
suvarṇamaṇimuktānāṃ kūṭakarmānukārakāḥ

samaye kṛtaharttāro lokapīḍākarā narāḥ //
anādibuddhayaścānye svārthātiśayakāriṇaḥ

bhūtaniṣṭhābhiyogajñā vyavahāreṣvanarthakāḥ //
bhedakārāśca dhātūnāṃ rajatasya ca kārakāḥ

nyāsārthahārakā ye ca sammohanakarāśca ye //
ye tathopādhikāḥ kṣudrāḥ pacyante teṣu teṣvatha

nirayeṣva pratiṣṭheṣu dāruṇeṣu tatastataḥ//
tatra kālaṃ tu suciraṃ pacyantāṃ pāpakāriṇaḥ

karmakṣayo yadā teṣāṃ mānuṣyaṃ prāpnuvanti te //
tatra tatropapadyante yatra yatra mahadbhayam

yasmiṃścaurabhayaṃ deśe kṣudbhayaṃ rājato bhayam //
āpadbhyo'pi bhayaṃ yatra vyādhimṛtyubhayaṃ tathā

ītayo yatra deśeṣu lubdheṣu nagareṣu ca //
kṣayāḥ kālopasargā vā jāyante tatra te narāḥ

bahuduḥkhaparikliṣṭā garbhavāsena pīḍitāḥ //
ekahastā dvihastā vā kūṭāśca vikṛtodarāḥ

śirāvivṛtagātrāśca hīnāṅgā vātarogiṇaḥ //
aśrupātitanetrāśca bhāryā na prāpnuvanti te

teṣāmapatyaṃ na bhavettadrūpaṃ ca sulakṣaṇam //
atihrasvaṃ vivarṇaṃ ca vikṛtaṃ bhrāntalocanam

saṃsāre ca yathā pakvaṃ kṛpaṇaṃ bhairavasvanam //
mahataḥ parivārasya tuṣṭaścocchiṣṭabhojakaḥ

rūpato guṇato hīno balataḥ śīlatastathā //
rājabhṛtyā bhavantyete pṛthivīparicārakāḥ

anālayā nirāmarṣā veda nābhiḥ susaṃvṛtāḥ //
samakāryasajātyānāṃ mitrasambandhināṃ tathā

karmāntakārakā hyete tṛṇībhūtā bhavanti te //
anartho rājadaṇḍo vā nityamutpādyate vadhaḥ

karmakalyāṇakṛcchreṣu bhṛśaṃ cāpi vimuhyati //
karṣakāḥ paśupālāśca vāṇijyasyopajīvakāḥ

yadyatkurvanti te karma sarvatra kṣayabhāginaḥ //
satyamanviṣyamāṇāśca naiva te kīrttibhāginaḥ

yatkiñcidaśubhaṃ karma tasmindeśe samucchritam //
tasya deśasya naivāsti varjayitvāturānnarān

suvṛṣṭyāmapi teṣāṃ vai kṣetraṃ taṃ tu vivarjayet //
aśanirvā patettatra kṣetraṃ vāpi vinaśyati

na sukhaṃ nāpi nirvāṇaṃ teṣāṃ mānuṣatā bhavet //
utpadyate nṛśaṃsānāṃ tīvraḥ kleśaḥ sudāruṇaḥ

steyakarmaprayuktānāṃ muktvā kleśaparamparām //
paradāraprasaktānāmimāṃ śṛṇuta yātanām

tiryaṅmānuṣadeheṣu yānti vikṣiptamānasāḥ //
viharanti hyadharmeṣu dharmacāritradūṣakāḥ

tāṃstenaiva pradānena saṃgrahettu graheṇa vā //
mūlakarmaprayogeṇa rāṣṭrasyātikrameṇa vā

prasahya vā prakṛtyā vai ye caranti kulāṅganāḥ //
varṇasaṅkarakarttāraḥ kuladharmādidūṣakāḥ

śīlaśaucādisampannaṃ ye janaṃ dharmalakṣaṇam //
dharṣayanti ca ye pāpāḥ śrūyatāṃ tatparābhavaḥ

nirayaṃ pāpabhūyiṣṭhā anubhūya mahābhayam //
bahuvarṣasahasrāṇi kamarṇā tena duṣkṛtāḥ

karmakṣaye yadā bhūyo mānuṣyaṃ yānti dāruṇam //
saṅkīrṇayonijāḥ kṣudrā bhavanti puruṣādhamāḥ

veśyālaṅghakakūṭānāṃ śauṇḍikānāṃ tathaiva ca //
duṣṭapāṣaṇḍanārīṇāṃ naikamaithunagāminām

nirllajjapuṇḍrakāḥ kecidbaddhapauruṣagaṇḍakāḥ //
strībandhakāḥ strīvināśāḥ strīveṣāḥ strīvihāriṇaḥ

strīṇāṃ cānupravṛddhā ye strībhogaparibhoginaḥ //
taddaivatāstanniyamāstadveṣāstatprabhāṣitāḥ

tadbhāvāstatkathālāpāstadbhogāḥ paribhoginaḥ //
vipralobhaṃ ca dāneṣu prāpnuvanti narādhamāḥ

saubhāgyaparamāsaktā narā bībhatsadarśanāḥ //
abuddhaiḥ saha saṃvāsaṃ priyaṃ cāvipriyaṃ tathā

śārīraṃ mānasaṃ duḥkhaṃ prāpnuvanti narādhamāḥ //
kṛmibhirbhakṣaṇaṃ caiva taptatailopasecanam

agnikṣāranadībhyāṃ tu prāpnuvanti na saṃśayaḥ //
paradāraprasaktānāṃ bhayaṃ bhavati nigrahaḥ

sarvaṃ ca nikhilaṃ kāryaṃ yanmayā samudāhṛtam

iti śrīvarāhapurāṇe pāpasamūhānukramo nāma tryadhikadviśatatamo'dhyāya