Varaha Purana · Chapter 195

atha yamalokasthapāpivarṇanam //
nāciketa uvāca //
kathyamānaṃ mayā viprāḥ śṛṇvantu tapasi sthitāḥ //
namaśca tasmai devāya dharmarājāya dhīmate

saṃsāraṃ tu yathāśakti kathyamānaṃ nibodhata //
asatyavādino ye ca jantustrībālaghātakāḥ

tathā brahmahaṇaḥ pāpā ye ca viśvāsaghātakāḥ //
ye ye śaṭhāḥ kṛtaghnāśca lolupāḥ pāradārikāḥ

kanyānāṃ dūṣakā ye ca ye ca pāparatā narāḥ //
vedānāṃ dūṣakāścaiva vedamārgavihiṃsakāḥ

śūdrāṇāṃ yājakāścaiva hāhābhūtā dvijātayaḥ //
ayājyayājakāścaiva ye ye kuṣṭhayutā narāḥ

surāpo brahmahā caiva yo dvijo vīraghātakaḥ //
tathā vārdhuṣikā ye ca jihmaprekṣāśca ye narāḥ

mātṛtyāgī pitṛtyāgī yaḥ svasādhvīṃ parityajet //
gurudveṣī durācāro dūtāścāvyaktabhāṣiṇaḥ

gṛhakṣetraharā ye ca setubandhavināśakāḥ//
aputrāścāpyadārāśca śraddhayā ca vivarjitāḥ

aśaucā nirdayāḥ pāpā hiṃsakā vratabhañjakāḥ //
somavikrayiṇaścaiva strījitaḥ sarvavikrayī

bhūmyāmanṛtavādī ca vedajīvī ca yo dvijaḥ //
nakṣatrī ca nimittī ca cāṇḍālādhyāpakastathā //195.१ ० //
sarvamaithunakartā ca agamyāgamane rataḥ //
māyikā ratikāścaiva tulādhārāśca ye narāḥ //१ १ //
sarvapāpasusaṅgāśca cintakā ye'tivairiṇaḥ //
svāmyarthe na hatā ye ca ye ca yuddhaparāṅmukhāḥ

paravittāpahārī ca rājaghātī ca yo naraḥ //
aśaktaḥ pāpaghoṣaśca tathā ye hyagnijīvinaḥ

śuśrūṣayā ca muktā ye liṅginaḥ pāpakarmiṇaḥ //
pātrakārī cakriṇaśca narā ye cāpyadhārmikāḥ

devāgārāṃśca satrāṇi tīrthavikrayiṇastathā //
vratavidveṣiṇo ye ca tathā'sadvādino narāḥ

mithyā ca nakharomāṇi dhārayanti ca ye narāḥ //
kūṭā vakrasvabhāvāśca kūṭaśāsanakāriṇaḥ

ajñānādavratī yaśca yaścāśramabahiṣkṛtaḥ //
viprakīrṇapratigrāhī sūcakastīrthanāśakaḥ

kalahī ca pratarkyaśca niṣṭhuraśca narādhamaḥ//
ete cānye ca bahavo hyanirdiṣṭāḥ sahasraśaḥ

striyo narāśca gacchanti yatra tacchṛṇutāmalāḥ //
kurvantīha yathā sarve tatra gatvā yamālaye

tāni vai kathayiṣyāmi śrūyatāṃ dvijasattamāḥ //
vaiśampāyana uvāca //
evaṃ tasya vacaḥ śrutvā sarva eva tapodhanāḥ

papracchurvismayāviṣṭā nāciketamṛṣiṃ tadā //
ṛṣaya ūcuḥ //
tvayā sarvaṃ yathā dṛṣṭaṃ brūhi tatra vidāṃ vara

yathāsvarūpaḥ kālo'sau yena sarvaṃ pravarttate //
iha karmāṇi yaḥ kṛtvā puruṣo hyalpacetanaḥ

vārayetsa tadā taṃ tu brahmaloke ca sa prabhuḥ //
kalpāntaṃ pacyamāno'pi dahyamānopi vā punaḥ

na nāśo hi śarīrasya tasmindeśe tapodhanāḥ //
yasya yasya hi yatkarma pacyamānaḥ punaḥ punaḥ

avaśyaṃ caiva gantavyaṃ tasya pārśvaṃ punaḥpunaḥ //
na tu trāsāddvijaḥ śaktastatra gantuṃ hi kaścana

na gacchanti ca ye tatra dānena nigamena ca //
vaitaraṇyāśca yadrūpaṃ kiṃtoyaṃ ca vahatyasau

rauravo vā kathaṃ vipra kiṃrūpaṃ kūṭaśālmaleḥ //
kīdṛśā vā hi te dūtāḥ kiṃ kāryāḥ kiṃ parākramāḥ

kiṃ ca kiṃca tu kurvāṇāḥ kiṃca kiṃca samācaran //
na ceto labhate jantucchāditaṃ pūrvatejasā

dhṛtiṃ na labhate kiṃcittaistairdoṣaiḥ suvāsitāḥ //
doṣaṃ satyamajānantastathā mohena mohitāḥ

boddhavyaṃ nāvabudhyante guṇānāṃ tu guṇottaram //
hāhābhūtāśca ciṃtārttāḥ sarvadoṣasamanvitāḥ

paraṃ paramajānanto ramante kasya māyayā //
kliśyante bahavastatra kṛtvā pāpamacetasaḥ

etatkathaya vatsa tvaṃ yataḥ pratyakṣadarśivān

iti śrīvarāhapurāṇe saṃsāracakre yamalokasthapāpivarṇanaṃ nāma pañcanavatyadhikaśatatamo'dhyāyaḥ