વરાહ પુરાણ · અધ્યાય 195

અથ યમલોકસ્થપાપિવર્ણનમ્ ॥
નાચિકેત ઉવાચ ॥
કથ્યમાનં મયા વિપ્રાઃ શૃણ્વન્તુ તપસિ સ્થિતાઃ ॥
નમશ્ચ તસ્મૈ દેવાય ધર્મરાજાય ધીમતે

સંસારં તુ યથાશક્તિ કથ્યમાનં નિબોધત ॥
અસત્યવાદિનો યે ચ જન્તુસ્ત્રીબાલઘાતકાઃ

તથા બ્રહ્મહણઃ પાપા યે ચ વિશ્વાસઘાતકાઃ ॥
યે યે શઠાઃ કૃતઘ્નાશ્ચ લોલુપાઃ પારદારિકાઃ

કન્યાનાં દૂષકા યે ચ યે ચ પાપરતા નરાઃ ॥
વેદાનાં દૂષકાશ્ચૈવ વેદમાર્ગવિહિંસકાઃ

શૂદ્રાણાં યાજકાશ્ચૈવ હાહાભૂતા દ્વિજાતયઃ ॥
અયાજ્યયાજકાશ્ચૈવ યે યે કુષ્ઠયુતા નરાઃ

સુરાપો બ્રહ્મહા ચૈવ યો દ્વિજો વીરઘાતકઃ ॥
તથા વાર્ધુષિકા યે ચ જિહ્મપ્રેક્ષાશ્ચ યે નરાઃ

માતૃત્યાગી પિતૃત્યાગી યઃ સ્વસાધ્વીં પરિત્યજેત્ ॥
ગુરુદ્વેષી દુરાચારો દૂતાશ્ચાવ્યક્તભાષિણઃ

ગૃહક્ષેત્રહરા યે ચ સેતુબન્ધવિનાશકાઃ॥
અપુત્રાશ્ચાપ્યદારાશ્ચ શ્રદ્ધયા ચ વિવર્જિતાઃ

અશૌચા નિર્દયાઃ પાપા હિંસકા વ્રતભઞ્જકાઃ ॥
સોમવિક્રયિણશ્ચૈવ સ્ત્રીજિતઃ સર્વવિક્રયી

ભૂમ્યામનૃતવાદી ચ વેદજીવી ચ યો દ્વિજઃ ॥
નક્ષત્રી ચ નિમિત્તી ચ ચાણ્ડાલાધ્યાપકસ્તથા ॥195.૧ ૦ ॥
સર્વમૈથુનકર્તા ચ અગમ્યાગમને રતઃ ॥
માયિકા રતિકાશ્ચૈવ તુલાધારાશ્ચ યે નરાઃ ॥૧ ૧ ॥
સર્વપાપસુસઙ્ગાશ્ચ ચિન્તકા યેઽતિવૈરિણઃ ॥
સ્વામ્યર્થે ન હતા યે ચ યે ચ યુદ્ધપરાઙ્મુખાઃ

પરવિત્તાપહારી ચ રાજઘાતી ચ યો નરઃ ॥
અશક્તઃ પાપઘોષશ્ચ તથા યે હ્યગ્નિજીવિનઃ

શુશ્રૂષયા ચ મુક્તા યે લિઙ્ગિનઃ પાપકર્મિણઃ ॥
પાત્રકારી ચક્રિણશ્ચ નરા યે ચાપ્યધાર્મિકાઃ

દેવાગારાંશ્ચ સત્રાણિ તીર્થવિક્રયિણસ્તથા ॥
વ્રતવિદ્વેષિણો યે ચ તથાઽસદ્વાદિનો નરાઃ

મિથ્યા ચ નખરોમાણિ ધારયન્તિ ચ યે નરાઃ ॥
કૂટા વક્રસ્વભાવાશ્ચ કૂટશાસનકારિણઃ

અજ્ઞાનાદવ્રતી યશ્ચ યશ્ચાશ્રમબહિષ્કૃતઃ ॥
વિપ્રકીર્ણપ્રતિગ્રાહી સૂચકસ્તીર્થનાશકઃ

કલહી ચ પ્રતર્ક્યશ્ચ નિષ્ઠુરશ્ચ નરાધમઃ॥
એતે ચાન્યે ચ બહવો હ્યનિર્દિષ્ટાઃ સહસ્રશઃ

સ્ત્રિયો નરાશ્ચ ગચ્છન્તિ યત્ર તચ્છૃણુતામલાઃ ॥
કુર્વન્તીહ યથા સર્વે તત્ર ગત્વા યમાલયે

તાનિ વૈ કથયિષ્યામિ શ્રૂયતાં દ્વિજસત્તમાઃ ॥
વૈશમ્પાયન ઉવાચ ॥
એવં તસ્ય વચઃ શ્રુત્વા સર્વ એવ તપોધનાઃ

પપ્રચ્છુર્વિસ્મયાવિષ્ટા નાચિકેતમૃષિં તદા ॥
ઋષય ઊચુઃ ॥
ત્વયા સર્વં યથા દૃષ્ટં બ્રૂહિ તત્ર વિદાં વર

યથાસ્વરૂપઃ કાલોઽસૌ યેન સર્વં પ્રવર્ત્તતે ॥
ઇહ કર્માણિ યઃ કૃત્વા પુરુષો હ્યલ્પચેતનઃ

વારયેત્સ તદા તં તુ બ્રહ્મલોકે ચ સ પ્રભુઃ ॥
કલ્પાન્તં પચ્યમાનોઽપિ દહ્યમાનોપિ વા પુનઃ

ન નાશો હિ શરીરસ્ય તસ્મિન્દેશે તપોધનાઃ ॥
યસ્ય યસ્ય હિ યત્કર્મ પચ્યમાનઃ પુનઃ પુનઃ

અવશ્યં ચૈવ ગન્તવ્યં તસ્ય પાર્શ્વં પુનઃપુનઃ ॥
ન તુ ત્રાસાદ્દ્વિજઃ શક્તસ્તત્ર ગન્તું હિ કશ્ચન

ન ગચ્છન્તિ ચ યે તત્ર દાનેન નિગમેન ચ ॥
વૈતરણ્યાશ્ચ યદ્રૂપં કિંતોયં ચ વહત્યસૌ

રૌરવો વા કથં વિપ્ર કિંરૂપં કૂટશાલ્મલેઃ ॥
કીદૃશા વા હિ તે દૂતાઃ કિં કાર્યાઃ કિં પરાક્રમાઃ

કિં ચ કિંચ તુ કુર્વાણાઃ કિંચ કિંચ સમાચરન્ ॥
ન ચેતો લભતે જન્તુચ્છાદિતં પૂર્વતેજસા

ધૃતિં ન લભતે કિંચિત્તૈસ્તૈર્દોષૈઃ સુવાસિતાઃ ॥
દોષં સત્યમજાનન્તસ્તથા મોહેન મોહિતાઃ

બોદ્ધવ્યં નાવબુધ્યન્તે ગુણાનાં તુ ગુણોત્તરમ્ ॥
હાહાભૂતાશ્ચ ચિંતાર્ત્તાઃ સર્વદોષસમન્વિતાઃ

પરં પરમજાનન્તો રમન્તે કસ્ય માયયા ॥
ક્લિશ્યન્તે બહવસ્તત્ર કૃત્વા પાપમચેતસઃ

એતત્કથય વત્સ ત્વં યતઃ પ્રત્યક્ષદર્શિવાન્

ઇતિ શ્રીવરાહપુરાણે સંસારચક્રે યમલોકસ્થપાપિવર્ણનં નામ પઞ્ચનવત્યધિકશતતમોઽધ્યાયઃ