Varaha Purana · Chapter 192

atha sarvaśāntivarṇanam //
sūta uvāca //
śrutvā tu madhuparkkasya hyutpattiṃ dānameva ca //
puṇyaṃ caiva phalaṃ caiva kāraṇaṃ grahaṇaṃ tathā

vismayaṃ paramaṃ gatvā sā mahī saṃśitavratā //
pādau gṛhya yathānyāyaṃ pratyuvāca janārdanam

deva vṛttopacāreṇa tava yanmanasi priyam //
kiṃ ca tatraiva dātavyaṃ tava karmaparāyaṇaiḥ

etadācakṣva tattvena tatra yatparamaṃ mahat //
śrīvarāha uvāca //
sādhu bhūme mahābhāge yanmāṃ tvaṃ paripṛcchasi

kathayiṣyāmi tatsarvaṃ duḥkhasaṃsāramokṣaṇam //
kṛtvā tu mama karmāṇi yattvayā pūrvabhāṣitam

paścācchāntiṃ ca me kuryādbhūme rāṣṭrasukhāvaham //
sarvakarma tataḥ kṛtvā bhūmyāṃ jānu nipātya ca

namo nārāyaṇāyeti uktvā mantramudāharet //
mantraḥ-
ॐ namo namo vāsudeva tvaṃ gatistvaṃ parāyaṇam

śaraṇaṃ tvāṃ gato nātha saṃsārārṇavatāraka //
āgatastvaṃ ca sumukha punaḥ samucitena vai

diśaḥ paśya adhaḥ paśya vyādhibhyo rakṣa nityaśaḥ //
prasīda svasya rāṣṭrasya rājñaḥ sarvabalasya ca

garbhiṇīnāṃ ca vṛddhānāṃ vrīhīṇāṃ ca gavāṃ tathā //
brāhmaṇānāṃ ca satataṃ śāntiṃ kuru śubhaṃ kuru

annaṃ kuru suvṛṣṭiṃ ca subhikṣamabhayaṃ tathā //
rāṣṭraṃ pravarddhatu vibho śāntirbhavatu nityaśaḥ

devānāṃ brāhmaṇānāṃ ca bhaktānāṃ kanyakāsu ca //
paśūnāṃ sarvabhūtānāṃ śāntirbhavatu nityaśaḥ

evaṃ śāntiṃ paṭhitvā tu mama karmaparāyaṇaḥ//
punarjalāñjaliṃ dattvā tvimaṃ mantramudāharet

mantraḥ-
yo'sau bhavānsarvajagatprasūto yajñeṣu deveṣu ca karmasākṣī //
śāntiṃ kuru tvaṃ mama vāsudeva saṃsāramokṣaṃ ca kuruṣva deva

eṣā siddhiśca kīrtiśca ojasā tu mahaujasam //
lābhānāṃ paramo lābho gatīnāṃ paramā gatiḥ

evaṃ paṭhati tattvena mama śāntiṃ sukhāvahām //
te tu mallayatāṃ yānti punarāvṛttivarjitāḥ

evaṃ śāntiṃ paṭhitvā tu madhuparkaṃ prayojayet //
namo nārāyaṇāyeti coktvā mantramudāharet

mantraḥ-
yo'sau bhavāndevavaraprasūto yo vai samarcyo madhuparkkanāmā //
āgaccha santiṣṭha ime ca pātre mamāpi saṃsāravimokṣaṇāya

sarpirdadhimadhūnyeva samaṃ pātre hyudumbare //
alābhe madhunaścāpi guḍena saha miśrayet

ghṛtālābhe tu suśroṇi lājaiḥ saha vimiśrayet //
alābhe vāpi dadhnaśca kṣīreṇa saha miśrayet

dadhi kṣaudraṃ ghṛtaṃ caiva kārayeta samaṃ tathā //
samarpayāmi deveśa rudra sarpirghṛtaṃ madhu

sarveṣāmapyalābhe tu mama karmaparāyaṇāḥ //
apa eva tato gṛhya imaṃ mantramudāhāret

mantraḥ—
yo'sau bhavānnābhimātraprasūto yajñaiśca mantraiḥ sarahasyajapyaiḥ //
so'yaṃ mayā te parikalpitaśca gṛhāṇa divyo madhuparkkanāmā

yo dadāti mahābhāge mayoktaṃ vidhipūrvakam //
sarvayajñaphalaṃ prāpya mama lokaṃ prapadyate

anyacca te pravakṣyāmi tacchṛṇuṣva vasundhare //
yo vai prāṇānpramuṃceta mama karmaparāyaṇaḥ

tasya caiveha dātavyaṃ mantreṇa vidhipūrvakam //
yāvatprāṇānpramuṃceta kṛtvā karma supuṣkalam

madbhaktena tu dātavyaṃ sarvasaṃsāramokṣaṇam //
dṛṣṭvā tu vihvalaṃ hyenaṃ mama karmaparāyaṇaḥ

madhuparkkaṃ paraṃ gṛhya cemaṃ mantramudāharet

mantraḥ-
yo'sau bhavāṃstiṣṭhati sarvadehe nārāyaṇaḥ sarvajagatpradhānaḥ //
gṛhāṇa caivaṃ suralokanātha bhaktopanītaṃ madhuparkkasaṃjñam

anenaiva tu mantreṇa dadyācca madhuparkkakam //
narasya mṛtyukāle tu dadyātsaṃsāra mokṣaṇam

eṣā gatirmahābhāge madhuparkkasya kīrttitā //
evaṃ kaścinna jānāti madhuparkaṃ vasundhare

evaṃ hi madhuparkkaśca deyaḥ siddhimabhīpsubhiḥ //
arcitvā devadeveśaṃ sarvasaṃsāranāśanam

dadāti madhuparkaṃ yaḥ sa yāti paramāṃ gatim //
ayaṃ pavitro vimalaḥ sarvakāma viśodhanaḥ

dīkṣitāya ca dātavyo yaśca śiṣyo gurupriyaḥ //
na mūrkhāya pradātavyamavinītāya karhicit

śṛṇoti madhuparkkasya cākhyānaṃ pāpanāśanam //
yāti divyāṃ parāṃ siddhiṃ madhuparkkasya kāraṇāt

etatte kathitaṃ bhadre madhuparkkavibhāvanam //
sarvasaṃsāramokṣārthaṃ yadīcchetsiddhimuttamām

rājadvāre śmaśāne vā bhaye ca vyasane tathā //
ye paṭhanti tvimāṃ śāntiṃ śīghraṃ kāryaṃ bhaviṣyati

aputro labhate putramabhāryaśca priyāṃ labhet //
apatirlabhate kāntaṃ baddho mucyeta bandhanāt

etatte kathitaṃ bhūme mahāśāntiṃ sukhāvahām //
sarvasaṃsāramokṣārthaṃ rahasyaṃ paramaṃ mahat

yastvanena vidhānena kuryācchāntimanuttamām//
sarvasaṅgānparityajya mama lokaṃ ca gacchati

iti śrīvarāhapurāṇe bhagavacchāstre sarvaśāntikaraṇaṃ nāma dvinavatyadhikaśatatamo'dhyāyaḥ