Varaha Purana · Chapter 191

atha madhuparkotpattidānasaṃkaraṇaprakaraṇam //
sūta uvāca //
evaṃ śrutvā bahūndharmān dharmaśāstraviniścayāt//
varāharūpiṇaṃ devaṃ punaḥ papraccha medinī

dharaṇyuvāca//
evaṃ śāstraṃ mayā deva tava vaktrādviniḥsṛtam //
śrutaṃ subahuśaścaiva tṛptirmama na vidyate

mamaivānugrahārthāya rahasyaṃ vaktumarhasi //
kīdṛśo madhuparkkaśca kiṃ puṇyaṃ kā ca devatā

kāni dravyāṇi kasmai ca deyānīti vadasva me //
iti bhūmyā vacaḥ śrutvā devadevo janārdanaḥ

varāharūpī bhagavānpratyuvāca vasundharām

śrīvarāha uvāca //
śṛṇu bhūme prayatnena madhuparko yathā kṛtaḥ //
utpattiścaiva dānaṃ ca sarvo yasya ca hīyate

ahaṃ brahmā ca rudraśca kṛtvā lokasya saṃkṣayam //
avyaktāni ca bhūtāni yāni kāni ca sarvathā

tato bhūme dakṣiṇāṅgātpuruṣo me viniḥsṛtaḥ //
rūpavāndyutimāṃścaiva śrīmānhrīkīrtimānnaraḥ

tatra papraccha māṃ brahmā mama gātrādviniḥsṛtaḥ //
ya eva tiṣṭhate viṣṇo trayāṇāṃ ca caturthakaḥ

sarahaśca laghurdeva etattava na yujyate //
brahmaṇo vacanaṃ śrutvā mayāpyevaṃ prabhāṣitam

evaṃ ca me samutpannaḥ sarvakarmasu niṣṭhitaḥ //
madhuparkketi vikhyāto bhaktānāṃ bhavamokṣaṇaḥ

mayātra saṃśitaṃ brahman rudre cāpi samāsataḥ //
sādhu viṣṇo bhāgataste eṣa cāpi viniḥsṛtaḥ

udbhavaṃ madhuparkkasya ātmasambhavaniścayam //
tatastu mā'bravīdbrahmā kāraṇaṃ madhuraṃ vacaḥ

madhuparkeṇa kiṃ kāryametadācakṣva niṣkalam //
pitāmahavacaḥ śrutvā mayā'sau pratibhāṣitaḥ

kāraṇaṃ madhuparkasya dānaṃ saṅkaraṇaṃ tathā //
mamārcanavidhiṃ kṛtvā madhuparkaṃ prayacchati

brahman yātyuttaraṃ sthānaṃ yatra gatvā na śocati//
tasya kriyāṃ pravakṣyāmi mama dānapratigrahāt

yasya dānavidhiṃ prāpya yānti divyāṃ gatiṃ mama //
vṛtteṣvevopacāreṣu ye ca brahmanmama priyāḥ

saṃgṛhya madhuparkaṃ vai imaṃ mantramudāharet

mantraḥ---
ॐ eṣa hi deva bhagavaṃstava gātrasūtiḥ saṃsāramokṣaṇakaro madhuparkanāmā //
bhaktyā mayā'yaṃ pratipādito'dya gṛhāṇa deveśa namo namaste

punaranyatpravakṣyāmi tacchṛṇuṣva vasundhare //
yādṛśo madhuparkko vai yā ca tasya mahān kriyā

madhvevaṃ dadhi sarpiśca kuryāccaiva samaṃ tathā //
vidhinā mantrapūtena yadīcchetsiddhimuttamām

sāmāsādya tataḥ kṛtvā mama karmaparāyaṇaḥ //
ucitenopacāreṇa yattvayā paripṛcchitam

iti śrīvarāhapurāṇe madhuparkkotpattidānasaṃkaraṇaṃ nāmaikanavatyadhikaśatatamo'dhyāyaḥ