વરાહ પુરાણ · અધ્યાય 192

અથ સર્વશાન્તિવર્ણનમ્ ॥
સૂત ઉવાચ ॥
શ્રુત્વા તુ મધુપર્ક્કસ્ય હ્યુત્પત્તિં દાનમેવ ચ ॥
પુણ્યં ચૈવ ફલં ચૈવ કારણં ગ્રહણં તથા

વિસ્મયં પરમં ગત્વા સા મહી સંશિતવ્રતા ॥
પાદૌ ગૃહ્ય યથાન્યાયં પ્રત્યુવાચ જનાર્દનમ્

દેવ વૃત્તોપચારેણ તવ યન્મનસિ પ્રિયમ્ ॥
કિં ચ તત્રૈવ દાતવ્યં તવ કર્મપરાયણૈઃ

એતદાચક્ષ્વ તત્ત્વેન તત્ર યત્પરમં મહત્ ॥
શ્રીવરાહ ઉવાચ ॥
સાધુ ભૂમે મહાભાગે યન્માં ત્વં પરિપૃચ્છસિ

કથયિષ્યામિ તત્સર્વં દુઃખસંસારમોક્ષણમ્ ॥
કૃત્વા તુ મમ કર્માણિ યત્ત્વયા પૂર્વભાષિતમ્

પશ્ચાચ્છાન્તિં ચ મે કુર્યાદ્ભૂમે રાષ્ટ્રસુખાવહમ્ ॥
સર્વકર્મ તતઃ કૃત્વા ભૂમ્યાં જાનુ નિપાત્ય ચ

નમો નારાયણાયેતિ ઉક્ત્વા મન્ત્રમુદાહરેત્ ॥
મન્ત્રઃ-
ૐ નમો નમો વાસુદેવ ત્વં ગતિસ્ત્વં પરાયણમ્

શરણં ત્વાં ગતો નાથ સંસારાર્ણવતારક ॥
આગતસ્ત્વં ચ સુમુખ પુનઃ સમુચિતેન વૈ

દિશઃ પશ્ય અધઃ પશ્ય વ્યાધિભ્યો રક્ષ નિત્યશઃ ॥
પ્રસીદ સ્વસ્ય રાષ્ટ્રસ્ય રાજ્ઞઃ સર્વબલસ્ય ચ

ગર્ભિણીનાં ચ વૃદ્ધાનાં વ્રીહીણાં ચ ગવાં તથા ॥
બ્રાહ્મણાનાં ચ સતતં શાન્તિં કુરુ શુભં કુરુ

અન્નં કુરુ સુવૃષ્ટિં ચ સુભિક્ષમભયં તથા ॥
રાષ્ટ્રં પ્રવર્દ્ધતુ વિભો શાન્તિર્ભવતુ નિત્યશઃ

દેવાનાં બ્રાહ્મણાનાં ચ ભક્તાનાં કન્યકાસુ ચ ॥
પશૂનાં સર્વભૂતાનાં શાન્તિર્ભવતુ નિત્યશઃ

એવં શાન્તિં પઠિત્વા તુ મમ કર્મપરાયણઃ॥
પુનર્જલાઞ્જલિં દત્ત્વા ત્વિમં મન્ત્રમુદાહરેત્

મન્ત્રઃ-
યોઽસૌ ભવાન્સર્વજગત્પ્રસૂતો યજ્ઞેષુ દેવેષુ ચ કર્મસાક્ષી ॥
શાન્તિં કુરુ ત્વં મમ વાસુદેવ સંસારમોક્ષં ચ કુરુષ્વ દેવ

એષા સિદ્ધિશ્ચ કીર્તિશ્ચ ઓજસા તુ મહૌજસમ્ ॥
લાભાનાં પરમો લાભો ગતીનાં પરમા ગતિઃ

એવં પઠતિ તત્ત્વેન મમ શાન્તિં સુખાવહામ્ ॥
તે તુ મલ્લયતાં યાન્તિ પુનરાવૃત્તિવર્જિતાઃ

એવં શાન્તિં પઠિત્વા તુ મધુપર્કં પ્રયોજયેત્ ॥
નમો નારાયણાયેતિ ચોક્ત્વા મન્ત્રમુદાહરેત્

મન્ત્રઃ-
યોઽસૌ ભવાન્દેવવરપ્રસૂતો યો વૈ સમર્ચ્યો મધુપર્ક્કનામા ॥
આગચ્છ સન્તિષ્ઠ ઇમે ચ પાત્રે મમાપિ સંસારવિમોક્ષણાય

સર્પિર્દધિમધૂન્યેવ સમં પાત્રે હ્યુદુમ્બરે ॥
અલાભે મધુનશ્ચાપિ ગુડેન સહ મિશ્રયેત્

ઘૃતાલાભે તુ સુશ્રોણિ લાજૈઃ સહ વિમિશ્રયેત્ ॥
અલાભે વાપિ દધ્નશ્ચ ક્ષીરેણ સહ મિશ્રયેત્

દધિ ક્ષૌદ્રં ઘૃતં ચૈવ કારયેત સમં તથા ॥
સમર્પયામિ દેવેશ રુદ્ર સર્પિર્ઘૃતં મધુ

સર્વેષામપ્યલાભે તુ મમ કર્મપરાયણાઃ ॥
અપ એવ તતો ગૃહ્ય ઇમં મન્ત્રમુદાહારેત્

મન્ત્રઃ—
યોઽસૌ ભવાન્નાભિમાત્રપ્રસૂતો યજ્ઞૈશ્ચ મન્ત્રૈઃ સરહસ્યજપ્યૈઃ ॥
સોઽયં મયા તે પરિકલ્પિતશ્ચ ગૃહાણ દિવ્યો મધુપર્ક્કનામા

યો દદાતિ મહાભાગે મયોક્તં વિધિપૂર્વકમ્ ॥
સર્વયજ્ઞફલં પ્રાપ્ય મમ લોકં પ્રપદ્યતે

અન્યચ્ચ તે પ્રવક્ષ્યામિ તચ્છૃણુષ્વ વસુન્ધરે ॥
યો વૈ પ્રાણાન્પ્રમુંચેત મમ કર્મપરાયણઃ

તસ્ય ચૈવેહ દાતવ્યં મન્ત્રેણ વિધિપૂર્વકમ્ ॥
યાવત્પ્રાણાન્પ્રમુંચેત કૃત્વા કર્મ સુપુષ્કલમ્

મદ્ભક્તેન તુ દાતવ્યં સર્વસંસારમોક્ષણમ્ ॥
દૃષ્ટ્વા તુ વિહ્વલં હ્યેનં મમ કર્મપરાયણઃ

મધુપર્ક્કં પરં ગૃહ્ય ચેમં મન્ત્રમુદાહરેત્

મન્ત્રઃ-
યોઽસૌ ભવાંસ્તિષ્ઠતિ સર્વદેહે નારાયણઃ સર્વજગત્પ્રધાનઃ ॥
ગૃહાણ ચૈવં સુરલોકનાથ ભક્તોપનીતં મધુપર્ક્કસંજ્ઞમ્

અનેનૈવ તુ મન્ત્રેણ દદ્યાચ્ચ મધુપર્ક્કકમ્ ॥
નરસ્ય મૃત્યુકાલે તુ દદ્યાત્સંસાર મોક્ષણમ્

એષા ગતિર્મહાભાગે મધુપર્ક્કસ્ય કીર્ત્તિતા ॥
એવં કશ્ચિન્ન જાનાતિ મધુપર્કં વસુન્ધરે

એવં હિ મધુપર્ક્કશ્ચ દેયઃ સિદ્ધિમભીપ્સુભિઃ ॥
અર્ચિત્વા દેવદેવેશં સર્વસંસારનાશનમ્

દદાતિ મધુપર્કં યઃ સ યાતિ પરમાં ગતિમ્ ॥
અયં પવિત્રો વિમલઃ સર્વકામ વિશોધનઃ

દીક્ષિતાય ચ દાતવ્યો યશ્ચ શિષ્યો ગુરુપ્રિયઃ ॥
ન મૂર્ખાય પ્રદાતવ્યમવિનીતાય કર્હિચિત્

શૃણોતિ મધુપર્ક્કસ્ય ચાખ્યાનં પાપનાશનમ્ ॥
યાતિ દિવ્યાં પરાં સિદ્ધિં મધુપર્ક્કસ્ય કારણાત્

એતત્તે કથિતં ભદ્રે મધુપર્ક્કવિભાવનમ્ ॥
સર્વસંસારમોક્ષાર્થં યદીચ્છેત્સિદ્ધિમુત્તમામ્

રાજદ્વારે શ્મશાને વા ભયે ચ વ્યસને તથા ॥
યે પઠન્તિ ત્વિમાં શાન્તિં શીઘ્રં કાર્યં ભવિષ્યતિ

અપુત્રો લભતે પુત્રમભાર્યશ્ચ પ્રિયાં લભેત્ ॥
અપતિર્લભતે કાન્તં બદ્ધો મુચ્યેત બન્ધનાત્

એતત્તે કથિતં ભૂમે મહાશાન્તિં સુખાવહામ્ ॥
સર્વસંસારમોક્ષાર્થં રહસ્યં પરમં મહત્

યસ્ત્વનેન વિધાનેન કુર્યાચ્છાન્તિમનુત્તમામ્॥
સર્વસઙ્ગાન્પરિત્યજ્ય મમ લોકં ચ ગચ્છતિ

ઇતિ શ્રીવરાહપુરાણે ભગવચ્છાસ્ત્રે સર્વશાન્તિકરણં નામ દ્વિનવત્યધિકશતતમોઽધ્યાયઃ