Varaha Purana · Chapter 184

atha tāmrārcāsthāpanam //
śrīvarāha uvāca //
tāmreṇa pratimāṃ kṛtvā surūpāṃ caiva bhāsvarām //
ucitenopacāreṇa veśmamadhyamupānayet

tato veśmanyupāgamya sthāpayitvā udaṅmukhaḥ //
citrāyāṃ caiva nakṣatre kuryāccaivādhivāsanam

jalaṃ ca sarvagandhena paṃcagavyena miśritam //
snāpayecca tato māṃ vai imaṃ mantramudāharet

mantraḥ-
yo'sau bhavāṃstiṣṭhati sārabhūtaḥ tvaṃ tāmrake tiṣṭhasi netrabhūtaḥ //
āgaccha mūrttau saha paṃcabhūtairmayā ca pātraiḥ saha viśvadhāman

anenaiva tu mantreṇa sthāpayitvā yaśasvini //
pūrvanyāyena karttavyamadhivāsanapūjanam

vyatītāyāṃ ca śarvaryāmudite ca divākare //
ṛcā śuddhiṃ vidhāyā'tha snāpayenmantrapūrvakam

brāhmaṇā vedapāṭhāṃśca kuryustatra samāgatāḥ //
bahuni maṅgalānyatra maṇḍape sthāpayettataḥ

sugandhadravyasaṃyuktaṃ jalaṃ cādāya pūjakaḥ//
tato me snapanaṃ kāryamimaṃ mantramudāharet

mantraḥ –
ॐ yo'sau bhavānsarvavaraḥ prabhuśca māyā balo yogabalapradhānaḥ //
āgaccha śīghraṃ ca mama priyāya santiṣṭha tāmreṣvapi lokanātha

jvalana pavanatulyāvana bhāvana tapana śvāsana svayaṃ tiṣṭha bhagavan puruṣottama om // iti //
tato dvāramupāgamya veśma śīghraṃ praveśayet //
āsane cāpi māṃ sthāpya pūjayedbhaktipūrvakam

mantreṇānena māṃ sthāpya gandhapuṣpādidīpakaiḥ

sthāpanāmantraḥ –
ॐ prakāśaprakāśa jagatprakāśa vijñānamayānandamaya trailokyanāthātrāgaccha iha
santiṣṭhatāṃ bhavānpuruṣottama māmava iti //
anena sthāpanāṃ kṛtvā mama śāstrānusārataḥ //
śuklavastraṃ samādāya imaṃ mantramudāharet

mantraḥ-
ॐ śuddhastvamātmā puruṣaḥ purāṇo jagatsu tattvaṃ suralokanātha //
vastrāṇi gṛhṇīṣva mama priyāṇi namo'stu tasmai puruṣottamāya

vastrairvibhūṣitaṃ kṛtvā mama karmaparāyaṇaḥ//
yathānyāyena me śīghramarccanaṃ tatra kārayet

arccanālaṃkṛtaṃ kṛtvā gandhadhūpādibhiḥ prabhum //
sampūjya vidhivanmāṃ tu naivedyaṃ parikalpayet

dattvā svādu ca naivedyaṃ śāntipāṭhaṃ tu kārayet //
mantraḥ –
śāntirbhavatu devānāṃ viprāṇāṃ śāntiruttamā

śāntirbhavatu rājñāṃ ca sarāṣṭrāṇāṃ tathā viśām //
bālānāṃ vrīhipaṇyānāṃ garbhiṇīnāṃ ca dehinām

śāntirbhavatu deveśa tvatprasādānmamākhilā//
evaṃ śāntiṃ paṭhitvā tu brāhmaṇāṃstatra pūjayet

guruṃ bhāgavataṃ caivamarcayecca yathāvidhi//
brāhmaṇānbhojayettatra yathotpannena mādhavi

viśeṣeṇa guruṃ pūjya vastrālaṃkārabhojanaiḥ //
tenāhaṃ pūjito bhūme satyametadbravīmi te

gururyasya na tuṣṭo vai tasmāddūrataro hyayam //
ya etena vidhānena kuryātsaṃsthāpanaṃ mama

tāritaṃ ca kulaṃ tena navabhiḥ saptaviṃśatiḥ //
etatte kathitaṃ bhadre tāmrārccāsthāpanaṃ mama

kathayiṣyāmi te hyevaṃ kārtsnyena pratimārccanam //
jalasya bindavo yāvanmama snāne ca sundari //
tāvadvarṣasahasrāṇi mama loke mahīyate

iti śrīvarāhapurāṇe tāmrārcāsthāpanaṃ nāma caturaśītyadhikaśatatamo'dhyāyaḥ