Varaha Purana · Chapter 185

atha kāṃsyārcāsthāpanam //
śrīvarāha uvāca //
kāṃsyena pratimāṃ kṛtvā surūpāṃ supratiṣṭhitām //
sarvāṅgāvayavairyuktāṃ vimalāṃ karmanirmitām

jyeṣṭhāyāṃ caiva nakṣatre mama veśmanyupānayet //
gītavāditraśabdena bahubhirmaṅgalaistathā

arghyaṃ gṛhya yathānyāyamimaṃ mantramudāharet

yo'sau bhavānsarvayajñeṣu pūjyo dhyeyo goptā viśvakāmo mahātmā //
prasannātmā bhagavānme prasannaḥ supūjitastiṣṭha hi lokanātha

arghyaṃ dattvā yathānyāyaṃ sthāpayettadudaṅmukhaḥ //
yathānyāyena saṃsthāpya kuryāccaivādhivāsanam

caturaḥ kalaśāṃścaiva paṃcagavyasamanvitān //
sarvagandhaiśca lājaiśca madhunā ca viśeṣataḥ

caturaḥ kalaśānpūrya snānārthaṃ me samantrakam //
tataścāstaṃgate sūrye śuddhairbhāgavataiḥ saha

kuryātsaṃsthāpanaṃ tatra mamārccāyāstu pūjakaḥ //
gṛhītvā kalaśāṃstatra śuddhānbhāgavatāṃstathā

namo nārāyaṇāyeti uktvā mantramudāharet

mantraḥ-
ādirbhavānbrahmayugāntakalpaḥ sarveṣu kāleṣvapi kalpabhūtaḥ //
eko bhavānnāsti kaściddvitīya upāgatastiṣṭha hi lokanātha

vikāra avikāra akāra sakāra śakāra ṣakāra svacchandarūpaḥ kṣaramakṣaraṃ dhṛtirūpaḥ arūpamiti namaḥ puruṣottamāyeti //
vyatītāyāṃ tu śarvaryāmudite ca divākare //
aśvena ca muhūrtena prāpte mūleṣu cottare

pūrvokteṣu vidhānena mama śāstrānudarśinām //
sthāpayeddvāramūle tu mama veśmani sundari

sarvaśāntyudakaṃ gṛhya sarvagandhaphalāni ca //
namo nārāyaṇāyeti uktvā mantramudāharet

mantraḥ-
ॐ indro bhavāṃstvaṃ ca yamaḥ kubero jaleśvaraḥ somabṛhaspatī ca//
śukraḥ śanaiścarabudhau saha saiṃhikeyaketū raviścaiva dharātmajastvam

tathaiva sarvauṣadhayo jalāni vāyuśca pṛthvī ca sa vāyusārathiḥ //
nāgāḥ sayakṣāśca diśaśca sarvāstasmai namaste puruṣottamāya iti

anenaiva tu mantreṇa kṛtvā karma supuṣkalam //
mama tāṃ pratimāṃ gṛhya tato veśmanyupānayet

ekānte snāpayenmāṃ ca jalaiḥ pūrvābhimantritaiḥ //
pragṛhya kalaśebhyaśca jalaṃ gandhasamanvitam

gātrasaṃśodhanārthāya imaṃ mantramudāharet

mantraḥ –
sarāṃsi ye te ca samastasāgarā nadyaśca tīrthāni ca puṣkarāṇi //
āyāntu tānyeva tava prasādācchuddhayai ca me syuḥ puruṣottamāya iti

evaṃ māṃ snāpya vidhinā mama karmānusāriṇaḥ //
evaṃ nyāyena māṃ tatra arcayitvā yathocitam

gandhadhūpādibhiścaiva yathāvibhavaśaktitaḥ//
paścādvastrāṇi me dadyānmama gātrasukhāni ca

tānyānayitvā vastrāṇi mamāgre sthāpayennaraḥ //
ubhau tau caraṇau natvā imaṃ mantramudāharet

mantraḥ-
vastrāṇi devendra mayā hṛtāni sūkṣmāṇi saumyāni sukhāvahāni //
gātrasya santuṣṭikarāṇi tubhyaṃ gṛhṇīṣva deveśa sulokanātha

vedopaveda ṛgveda yajurveda sāmaveda atharvaṇaveda saṃstuta iti namaḥ paramparāyeti //
arcitālaṃkṛtaṃ kṛtvā pūrvanyāyena sundari //
paścānme prāpaṇaṃ dadyānmantravadvidhipūrvakam

dattvā prāpaṇakaṃ tatra dadyādācamanaṃ tataḥ //
śāntipāṭhaśca vai kāryo mantreṇānena sundari

vidyāḥ sarve brahma ca brāhmaṇāśca grahāḥ sarve saritaḥ sāgarāśca //
indrādyaṣṭau lokapālāśca sarve pūrvoktā ye sarvaśāntiṃ ca kuryuḥ

āyāma yama kāmadama vāma ॐ namaḥ puruṣottamāyeti sūtram //
vṛtteṣvevopacāreṣu mama kuryātpradakṣiṇam //
abhivādanaṃ stutiṃ cāpi kṛtvā bhāgavatāṃśchucīn

sampūjya brāhmaṇānpaścādbhojayet pāyasādibhiḥ //
tebhyaḥ śāntyudakaṃ gṛhya dvijebhyaḥ kamalekṣaṇe

dadyādabhyukṣaṇaṃ mahyaṃ tenāhaṃ pūjito'bhavam //
sarvānvisarjayitvā tu kuryādvai gurupūjanam

aṅgulīyakavāsobhirdānasaṃmānanādibhiḥ //
yo guruṃ pūjayedbhūme bhaktiyuktena cetasā

tenāhaṃ pūjito devi evametanna saṃśayaḥ//
brāhmaṇānmama bhaktāṃśca gurūṃścaiva hi nindati

nāśayiṣyāmi taṃ devi satyamatedbravīmi te //
jalasya bindavo yāvanmama gātreṣu tiṣṭhati

tāvadvarṣasahasrāṇi mama lokeṣu tiṣṭhati //
ya etena vidhānena sthāpayiṣyati māṃ naraḥ

tāritaṃ ca kulaṃ tena pitṛjaṃ mātṛjaṃ tathā //
etatte kathitaṃ bhadre kāṃsyena sthāpanaṃ mama

kathayiṣyāmi te hyevaṃ raupyeṇa sthāpanaṃ mama

iti śrīvarāhapurāṇe kāṃsyapratimāsthāpanavidhirnāma paṃcāśītyadhikaśatatamo'dhyāyaḥ