Varaha Purana · Chapter 183

atha mṛnmayārcāsthāpanam //
śrīvarāha uvāca //
punaranyatpravakṣyāmi tacchṛṇuṣva vasundhare //
tiṣṭhāmi mṛnmayīṃ cāpi pratimāṃ pūjanecchayā

ārccāṃ ca mṛnmayīṃ kṛtvā asphuṭāṃ cāpyakhaṇḍitām //
nādhikāṃ vāmanāṃ cāpi na vakrāṃ kārayedbudhaḥ

īdṛśīṃ pratimāṃ kṛtvā mama karmaparāyaṇaḥ //
bhūme sarvāṇi karmāṇi yathā vā rocate tathā

kāṣṭhānāmapyalābhe tu mṛnmayīṃ tatra kārayet //
śailajāṃ vā tato bhūme mama karmaparāyaṇaḥ

tāmreṇa kāṃsyaraupyeṇa sauvarṇatrapu rītibhiḥ //
kurvanti śubhakarmāṇaḥ kovidaḥ pratimāṃ śubhām

arcanaṃ tvaparaṃ vedyāṃ mama kamarparigrahāt//
kecillokāpavādena khyātyai kurvanti kecana

gṛhaṃ cālocya kaścinmāṃ pūjayetkāmanāparaḥ //
pūjayedyadi vā cakraṃ mama tejoṃśasambhavam

bhūme evaṃ vijānīhi sthāpito'haṃ na saṃśayaḥ //
sampadastu prayacchāmi pūjito'haṃ dharādhare

mantrairvā vidhipūrveṇa yo me karmāṇi kārayet //
yaṃ yaṃ phalaṃ samuddiśya māṃ pūjayati mānavaḥ

tattatphalaṃ prayacchāmi prasannenāntarātmanā //
mama caiva prasādena prāpnoti gatimuttamām

madbhaktaḥ satataṃ nityaṃ karmaṇā pariveṣṭitaḥ //
sa vai matparitoṣārthaṃ manasyeva prapūjayet

dadyājjalāñjaliṃ mahyaṃ tena me prītiruttamā //
tasya kiṃ sumanobhiśca jāpyena niyamena kim

mahyaṃ cintayato nityaṃ nibhṛtenāntarātmanā //
tasya kāmānprayacchāmi divyānbhogānmanoramān

etatte sarvamākhyātaṃ sugopyaṃ ca prayatnataḥ //
mṛnmayīṃ pratimāṃ kṛtvā mama karmasu niṣṭhitaḥ

śravaṇe caiva nakṣatre kuryāttasyādhivāsanam //
pūrvoktena vidhānena sthāpayenmantrapūrvakam

paṃcagavyaṃ ca gandhaṃ ca vāriṇā saha miśrayet //
tato me snapanaṃ kāryamimaṃ mantramudāharet

mantraḥ-
yo'sau bhavānsarvajagatprakarttā yasya prasādena bhavanti lokāḥ //
sa tvaṃ kuruṣvācyuta matprasādaṃ tvaṃ tiṣṭha cārccāsu ca mṛnmayīṣu

kāraṇakāraṇaṃ hyugratejasaṃ dyutimantaṃ mahāpuruṣaṃ namo namaḥ //
anena mantreṇa veśmani praviśya sthāpanāṃ kuryāt //
anenaiva tu mantreṇa sthāpayenmāṃ samāhitaḥ //
pūrvavatsthāpayettatra caturaḥ kalaśānpurā //
caturastāngṛhītvā ca imaṃ mantramudāharet

mantraḥ –
ॐ varuṇaṃ samudro labdhvā saṃpūjito hyātmamatiprasannaḥ //
etena mantreṇa mamābhiṣekaṃ prāptaṃ variṣṭhaṃ hi sa ūrdhvabāhuḥ //
agniśca bhūmiśca rasāśca sarve bhavanti yasmātsatataṃ namasye

evamāsnāpya vidhivanmama karmaparāyaṇaḥ //
pūrvoktavidhinā caiva gandhamālyaiśca pūjayet

aguruṃ caiva dhūpaṃ ca sakarpūraṃ sakuṅkumam //
namo nārāyaṇāyeti uktvā dhūpaṃ prakalpayet

dhūpaṃ dattvā yathānyāyaṃ pītaṃ vastraṃ tu dāpayet //
namo nārāyaṇāyeti uktvā mantramudāharet

mantraḥ-
vastreṇa pītena sadā prasanno yasminprasanne tu jagatprasannam //
gṛhṇātu vastraṃ sumukhaḥ prasanno devaḥ sadā pātu bhavasya bandhāt

tata etena maṃtreṇa vastraṃ dadyādyathocitam //
dhūpadīpādibhiḥ pūjya prāpaṇaṃ parikalpayet

pūrvoktena vidhānena dadyātprāpaṇakaṃ naraḥ //
paścādācamanaṃ dadyānmantrapūrvaṃ prayatnataḥ

mantraḥ-
śāntirbhavatu devānāṃ brahma kṣatraviśāṃ tathā //
śāntirbhavatu vṛddhānāṃ bālānāṃ śāntiruttamā

devo varṣatu parjanyaḥ pṛthivī sasyapūritā //
anenaiva tu mantreṇa śāntiṃ kṛtvā vidhānataḥ

paścādbhāgavatānpūjya tato brāhmaṇapūjanam //
śirasā vacanaṃ kāryaṃ dakṣiṇābhiḥ prapūjya ca

acchidraṃ vācya paścācca kuryādevaṃ visarjanam //
evaṃ visarjanaṃ kṛtvā ye ca tatra samāgatāḥ

pūjayettāṃśca vidhivadvastrālaṃkārabhūṣaṇaiḥ //
pūjayīta guruṃ tatra yadīcchenmama sātmyatām

yo guruṃ pūjayedbhaktyā vidhidṛṣṭena karmaṇā //
tenāhaṃ pūjito nityaṃ devi satyaṃ bravīmi te

tuṣṭo dadāti kṛcchreṇa grāmamātraṃ narādhipaḥ //
ābrahmapadaparyantaṃ helayā yacchate guruḥ

tathaiva mama śāstreṣu mamaiva vacanācchubhe //
sarvaśāstreṣu kalyāṇi gurupūjā vyavasthitā

ya etena vidhānena kuryātsaṃsthāpanaṃ mama //
tāritāni kulānyeva trīṇi triṃśacca saptatiḥ

pūjāyāṃ mama mārgeṣu patanti jalabindavaḥ //
tāvadvarṣasahasrāṇi mama lokeṣu modate

evaṃ te kathitaṃ bhūme sthāpanaṃ mṛnmayasya tu //
kathayiṣyāmi te hyanyat sarvabhāgavatapriyam

iti śrīvarāhapurāṇe mṛnmayārccāsthāpanaṃ nāma tryaśītyadhikaśatatamo'dhyāyaḥ