Varaha Purana · Chapter 173

śrīvarāha uvāca //
tatra sthitvā yathānyāyaṃ gokarṇaḥ sarvamaṃgalam //
śukaṃ ca mātāpitarau sādhubhāryācatuṣṭayam

saṃmānya pūjayāmāsa yathāvibhavaśaktitaḥ //
mathurāvāsibhirlokairudyānaṃ kārayaṃstadā

svayaṃ ca kṛtavāṃstatra avighnasya mahāmakham //
bhakṣyabhojye brāhmaṇebhyo dadau dānāni nityaśaḥ

gītavāditramaṃgalyaṃ putravṛddhau yathocitam //
tatsarvaṃ kṛtavām̐lloko gokarṇasya mahātmanaḥ

ekaikaṃ ca pariṣvajya praṇipatya yathākramam //
mātāpitroḥ praṇamyātha śirasā pādapaṃkaje

śukaṃ hṛdi samālokya praruroda sa vai vaṇik //
yasya prasādājjīvaśca dharmaścānuttamā gatiḥ

viśiṣṭena mayā prāpto rājño lābhaḥ supuṣkalaḥ //
śuka putrānmayā prāptamiha loke paratra ca

evaṃ vasansukhaṃ tatra gokarṇaḥ saha bandhubhiḥ //
śuka nāmnā kṛtaṃ tena śivasyāyatanaṃ mahat

śukeśvaraṃ pratiṣṭhāpya divyaṃ satraṃ cakāra ha //
brāhmaṇānāṃ śate dve ca miṣṭānnavarabhojane

śukasatramiti khyātaṃ mṛto muktimavāpa saḥ //
vimānavaramāruhya svargalokaṃ gataḥ śukaḥ

śukapradāne gokarṇaḥ phalaṃ snānasya saṃgamāt//
śrāddhaṃ suvarṇairgodānaṃ kṛtvā tasmai dadau ca saḥ

śabarāya sabhāryāya tena svargaṃ gataśca ha //
śukodareṇa sahito vimānavaramāsthitaḥ

etatte kathitaṃ sarvaṃ mathurāyāṃ mahatphalam //
sarasvatīsaṃgamasya gokarṇasya śivasya ca

gokarṇasya tu santānamakṣayaṃ dharmato'vyayam //
sambhūtaṃ sa sukhaṃ bhuktvā tato mokṣamavāpnuyāt

iti śrīvarāhapurāṇe gokarṇamāhātmye trayassaptatyadhikaśatatamo'dhyāyaḥ