Varaha Purana · Chapter 166

dharaṇyuvāca //
śrutāni tu mahādeva tīrthāni vividhāni tu //
asikuṇḍeti saṃjñeyaṃ tanme tvaṃ kathaya prabho

śrīvarāha uvāca //
sumatirnāma rājāsīddhārmiko lokaviśrutaḥ //
tīrthayātrānimittena svargalokaṃ gataḥ purā

gate svargaṃ tu nṛpatau putro rājyaṃ cakāra ha //
vimatirnāma nāmnā ca rājye paitāmahe sthitaḥ

rājyaṃ ca kurvatastasya āgato nāradastadā //
viṣṭaraṃ pādyamarghyaṃ ca tasmai dattaṃ yathocitam

pratigṛhya ca tatsarvaṃ tamuvāca sa nāradaḥ //
piturhyanṛṇatāṃ gatvā sa putro dharmabhāgbhavet

ityuktvā nāradastatra tatraivāntaradhīyata //
nārade tu gate rājā papraccha svātmamantriṇaḥ

tadā kimuktamṛṣiṇā nāradena pituḥ kṛte //
ānṛṇyamiti yadvākyaṃ mayā buddhaṃ na kiṃcana

mantriṇaśca tato jñātvā piturmaraṇameva ca //
tīrthayātrānimittaṃ ca tasmai rājñe nyavedayan

ataevoktamānṛṇyaṃ nāradena pitustava //
śrutvā vākyaṃ tadā rājā tīrthayātrāṃ cakāra ha

vimaterbuddhirutpannā gacchāmo mathurāṃ purīm //
caturo vārṣikānmāsānmathurāyāṃ vasāmahe

sarvāṇi tatra tīrthāni tiṣṭhanti vividhāni ca //
āgate tu nṛpe tatra tīrthānyūcuḥ parasparam

yuddhaṃ vimatinā sārddhaṃ svayaṃ karttuṃ na śaknumaḥ //
kalpagrāmaṃ tu gacchāmo varāho yatra tiṣṭhati

gatāni tatra tīrthāni kalpagrāmaṃ vasundhare //
tatra vārāharūpeṇa sthito'haṃ ca yadṛcchayā

yāvannirīkṣayāmyagraṃ tāvattiṣṭhanti sannidhau //
tīrthānyūcuḥ //
jaya viṣṇo jayāciṃtya jaya deva jayācyuta

jaya viśveśa kartteśa jaya deva namo'stu te //
śrīvarāha uvāca //
tīrthaiḥ stuto'haṃ vasudhe vacanaṃ cedamabruvam

varaṃ vṛṇuta bhadraṃ vo yadvo manasi varttate //
tīrthānyūcuḥ //
varāha yadi deveśa abhayaṃ dātumarhasi

supāpinā vimatinā kṛtastrāsaḥ sudāruṇaḥ //
taṃ niyacchasva pāpiṣṭhaṃ yadi paśyasi naḥ sukham

śrīvarāha uvāca //
hitāya sarvatīrthānāṃ haniṣyāmi mahāripum //
tatra tīrthaniyogena āgato mathurāṃ purīm

tatrāgate tu vasudhe yuddhaṃ kṛtvā tu tena vai //
tadāsinā tu divyena sa rājā baladarpitaḥ //
sūdito hi mayā devi asyagraṃ nihitaṃ bhuvi

aseragreṇa tūddhṛtya mṛttikāṃ varavarṇini //
tatra kuṇḍaṃ mahaddivyaṃ devarṣividhinirmitam //
asikuṇḍeti saṃjñā ca prāptā tena vasundhare

tatrāścaryaṃ pravakṣyāmi manaḥkarṇasukhāvaham //
paśyanti manujāḥ siddhāḥ sarvapāpavivarjitāḥ

dvādaśyāṃ ca caturdaśyāṃ śraddadhānā jitendriyāḥ //
phalāni tasya paśyanti labhante na suniścitāḥ

tasminkāle hyahaṃ devi mathurāyāṃ samāgataḥ //
tatra tiṣṭhāmyahaṃ bhadre paścimāṃ diśamāśritaḥ

tatra kṛtvā ca hairaṇyā mūrttayaśca caturvidhāḥ //
tīrthe varāhasaṃjñe tu mathurāyāṃ vyavasthitāḥ

sudṛḍhāḥ sudṛśaḥ subhrū yaḥ paśyati sa mucyate //
ekā varāhasaṃjñā ca tathā nārāyaṇasya ca

vāmanasya tṛtīyā vai caturthī rāghavasya ca //
etāścatasro yaḥ paśyetsnātvā kuṇḍe'sisaṃjñite

catuḥsāgaraparyantā krāntā tena dharā dhruvam //
tīrthānāṃ māthurāṇāṃ ca sarveṣāṃ phalamaśnute

tatra sarveṣu tīrtheṣu asikuṇḍaṃ mahattaram //
yā saṃkhyā kathitā pūrvaṃ tīrthānāṃ dakṣiṇottare

asikuṇḍaṃ samārabhya tīrthānukramaṇikā varā //
suptotthito'pi dvādaśyāmasikuṇḍāpluto naraḥ

mūrttīḥ paśyati yastāstu brahmabhūyāya kalpate //
nāstīha punarāvṛttirbhavetkālaviparyaye

iti śrīvarāhapurāṇe asikuṇḍaprabhāvo nāma ṣaṭṣaṣṭyadhikaśatatamo'dhyāyaḥ