વરાહ પુરાણ · અધ્યાય 166

ધરણ્યુવાચ ॥
શ્રુતાનિ તુ મહાદેવ તીર્થાનિ વિવિધાનિ તુ ॥
અસિકુણ્ડેતિ સંજ્ઞેયં તન્મે ત્વં કથય પ્રભો

શ્રીવરાહ ઉવાચ ॥
સુમતિર્નામ રાજાસીદ્ધાર્મિકો લોકવિશ્રુતઃ ॥
તીર્થયાત્રાનિમિત્તેન સ્વર્ગલોકં ગતઃ પુરા

ગતે સ્વર્ગં તુ નૃપતૌ પુત્રો રાજ્યં ચકાર હ ॥
વિમતિર્નામ નામ્ના ચ રાજ્યે પૈતામહે સ્થિતઃ

રાજ્યં ચ કુર્વતસ્તસ્ય આગતો નારદસ્તદા ॥
વિષ્ટરં પાદ્યમર્ઘ્યં ચ તસ્મૈ દત્તં યથોચિતમ્

પ્રતિગૃહ્ય ચ તત્સર્વં તમુવાચ સ નારદઃ ॥
પિતુર્હ્યનૃણતાં ગત્વા સ પુત્રો ધર્મભાગ્ભવેત્

ઇત્યુક્ત્વા નારદસ્તત્ર તત્રૈવાન્તરધીયત ॥
નારદે તુ ગતે રાજા પપ્રચ્છ સ્વાત્મમન્ત્રિણઃ

તદા કિમુક્તમૃષિણા નારદેન પિતુઃ કૃતે ॥
આનૃણ્યમિતિ યદ્વાક્યં મયા બુદ્ધં ન કિંચન

મન્ત્રિણશ્ચ તતો જ્ઞાત્વા પિતુર્મરણમેવ ચ ॥
તીર્થયાત્રાનિમિત્તં ચ તસ્મૈ રાજ્ઞે ન્યવેદયન્

અતએવોક્તમાનૃણ્યં નારદેન પિતુસ્તવ ॥
શ્રુત્વા વાક્યં તદા રાજા તીર્થયાત્રાં ચકાર હ

વિમતેર્બુદ્ધિરુત્પન્ના ગચ્છામો મથુરાં પુરીમ્ ॥
ચતુરો વાર્ષિકાન્માસાન્મથુરાયાં વસામહે

સર્વાણિ તત્ર તીર્થાનિ તિષ્ઠન્તિ વિવિધાનિ ચ ॥
આગતે તુ નૃપે તત્ર તીર્થાન્યૂચુઃ પરસ્પરમ્

યુદ્ધં વિમતિના સાર્દ્ધં સ્વયં કર્ત્તું ન શક્નુમઃ ॥
કલ્પગ્રામં તુ ગચ્છામો વરાહો યત્ર તિષ્ઠતિ

ગતાનિ તત્ર તીર્થાનિ કલ્પગ્રામં વસુન્ધરે ॥
તત્ર વારાહરૂપેણ સ્થિતોઽહં ચ યદૃચ્છયા

યાવન્નિરીક્ષયામ્યગ્રં તાવત્તિષ્ઠન્તિ સન્નિધૌ ॥
તીર્થાન્યૂચુઃ ॥
જય વિષ્ણો જયાચિંત્ય જય દેવ જયાચ્યુત

જય વિશ્વેશ કર્ત્તેશ જય દેવ નમોઽસ્તુ તે ॥
શ્રીવરાહ ઉવાચ ॥
તીર્થૈઃ સ્તુતોઽહં વસુધે વચનં ચેદમબ્રુવમ્

વરં વૃણુત ભદ્રં વો યદ્વો મનસિ વર્ત્તતે ॥
તીર્થાન્યૂચુઃ ॥
વરાહ યદિ દેવેશ અભયં દાતુમર્હસિ

સુપાપિના વિમતિના કૃતસ્ત્રાસઃ સુદારુણઃ ॥
તં નિયચ્છસ્વ પાપિષ્ઠં યદિ પશ્યસિ નઃ સુખમ્

શ્રીવરાહ ઉવાચ ॥
હિતાય સર્વતીર્થાનાં હનિષ્યામિ મહારિપુમ્ ॥
તત્ર તીર્થનિયોગેન આગતો મથુરાં પુરીમ્

તત્રાગતે તુ વસુધે યુદ્ધં કૃત્વા તુ તેન વૈ ॥
તદાસિના તુ દિવ્યેન સ રાજા બલદર્પિતઃ ॥
સૂદિતો હિ મયા દેવિ અસ્યગ્રં નિહિતં ભુવિ

અસેરગ્રેણ તૂદ્ધૃત્ય મૃત્તિકાં વરવર્ણિનિ ॥
તત્ર કુણ્ડં મહદ્દિવ્યં દેવર્ષિવિધિનિર્મિતમ્ ॥
અસિકુણ્ડેતિ સંજ્ઞા ચ પ્રાપ્તા તેન વસુન્ધરે

તત્રાશ્ચર્યં પ્રવક્ષ્યામિ મનઃકર્ણસુખાવહમ્ ॥
પશ્યન્તિ મનુજાઃ સિદ્ધાઃ સર્વપાપવિવર્જિતાઃ

દ્વાદશ્યાં ચ ચતુર્દશ્યાં શ્રદ્દધાના જિતેન્દ્રિયાઃ ॥
ફલાનિ તસ્ય પશ્યન્તિ લભન્તે ન સુનિશ્ચિતાઃ

તસ્મિન્કાલે હ્યહં દેવિ મથુરાયાં સમાગતઃ ॥
તત્ર તિષ્ઠામ્યહં ભદ્રે પશ્ચિમાં દિશમાશ્રિતઃ

તત્ર કૃત્વા ચ હૈરણ્યા મૂર્ત્તયશ્ચ ચતુર્વિધાઃ ॥
તીર્થે વરાહસંજ્ઞે તુ મથુરાયાં વ્યવસ્થિતાઃ

સુદૃઢાઃ સુદૃશઃ સુભ્રૂ યઃ પશ્યતિ સ મુચ્યતે ॥
એકા વરાહસંજ્ઞા ચ તથા નારાયણસ્ય ચ

વામનસ્ય તૃતીયા વૈ ચતુર્થી રાઘવસ્ય ચ ॥
એતાશ્ચતસ્રો યઃ પશ્યેત્સ્નાત્વા કુણ્ડેઽસિસંજ્ઞિતે

ચતુઃસાગરપર્યન્તા ક્રાન્તા તેન ધરા ધ્રુવમ્ ॥
તીર્થાનાં માથુરાણાં ચ સર્વેષાં ફલમશ્નુતે

તત્ર સર્વેષુ તીર્થેષુ અસિકુણ્ડં મહત્તરમ્ ॥
યા સંખ્યા કથિતા પૂર્વં તીર્થાનાં દક્ષિણોત્તરે

અસિકુણ્ડં સમારભ્ય તીર્થાનુક્રમણિકા વરા ॥
સુપ્તોત્થિતોઽપિ દ્વાદશ્યામસિકુણ્ડાપ્લુતો નરઃ

મૂર્ત્તીઃ પશ્યતિ યસ્તાસ્તુ બ્રહ્મભૂયાય કલ્પતે ॥
નાસ્તીહ પુનરાવૃત્તિર્ભવેત્કાલવિપર્યયે

ઇતિ શ્રીવરાહપુરાણે અસિકુણ્ડપ્રભાવો નામ ષટ્ષષ્ટ્યધિકશતતમોઽધ્યાયઃ