Varaha Purana · Chapter 161

atha devavanaprabhāvaḥ //
dharaṇyuvāca //
ye dharmavimukhā mūḍhāḥ sarvajñānavivarjitāḥ //
kā gatiḥ kṛṣṇa teṣāṃ hi vihitā narake suraiḥ

abhuktvā nārakaṃ duḥkhaṃ sukṛtaiḥ puṇyadairnṛṇām //
prayānti karmaṇā yena tamupāyaṃ bravīhi me

śrīvarāha uvāca //
sarvadharmavihīnānāṃ puruṣāṇāṃ durātmanām //
narakārttiharā devī mathurā pāpaghātinī

mathurāvāsino ye ca tīrthānāṃ copasevakāḥ //
vanānāṃ darśako vātha mathurākramako'pi vā

eṣāṃ madhye kṛtaṃ yaiśca ekaṃ ca śatamojasā //
na te naraka bhoktāraḥ svargabhājo bhavanti te

ādau madhuvanaṃ nāma dvitīyaṃ tālameva ca //
vanaṃ kundavanaṃ caiva tṛtīyaṃ vanamuttamam

caturthaṃ kāmyakavanaṃ vanānāṃ vanamuttamam //
paṃcamaṃ vai bahuvanaṃ ṣaṣṭhaṃ bhadravanaṃ smṛtam

saptamaṃ tu vanaṃ bhūme khādiraṃ lokaviśrutam //
mahāvanaṃ cāṣṭamaṃ tu sadaiva ca mama priyam

lohārgalavanaṃ nāma navamaṃ pātakāpaham //
vanaṃ bilvavanaṃ nāma daśamaṃ devapūjitam

ekādaśaṃ tu bhāṇḍīraṃ dvādaśaṃ vṛndakā vanam //
etāni ye prapaśyanti na te narakabhoginaḥ

yathākrameṇa ye yātrāṃ vanānāṃ ca jitendriyāḥ //
kariṣyanti varārohe indralokaṃ vrajanti te

iti śrīvarāhapurāṇe mathurāmāhātmye devavanaprabhāvo nāmaikaṣaṣṭyadhikaśatatamo'dhyāyaḥ