Varaha Purana · Chapter 159

atha mathurāpradakṣiṇā vidhyādikam //
dharaṇyuvāca //
śrutaṃ subahuśo deva tīrthānāṃ guṇavistaram //
procyamānaṃ tu puṇyākhyaṃ tvatprasādājjanārdana

na dānairna tapobhiśca na yajñaistādṛśaṃ phalam//
bhūmeḥ pradakṣiṇāyāśca yādṛśaṃ tīrthasevayā

bhuvaśca caturantāyāstīrthaprakramaṇaṃ hare //
sarvatīrthābhigamanamasti durgataraṃ nṛṇām

asti kaścidupāyo'tra yena samyagavāpyate //
prasādasumukho bhūtvā tatsarvaṃ kathayasva me

śrīvarāha uvāca //
bhadre śṛṇu mahatpuṇyaṃ pṛthivyāṃ sarvatodiśam //
parikramya yathādhvānaṃ pramāṇagaṇitaṃ śubham

bhūmyāḥ parikrame samyakyojanānāṃ pramāṇakam //
ṣaṣṭikoṭisahasrāṇi ṣaṣṭikoṭiśatāni ca

tīrthānyetāni devāśca tārakāśca nabhasthale //
gaṇitāni samastāni vāyunā jagadāyuṣā

brahmaṇā lomaśenaiva nāradena dhruveṇa ca //
jāmbavatyāśca putreṇa rāvaṇena hanūmatā

etairanekadhā devaiḥ sasāgaravanā mahī //
kramitā balinā caiva bāhyamaṇḍalarekhayā

antarā bhramaṇenaiva sugrīveṇa mahātmanā //
tathā ca pūrvaṃ devendraiḥ paṃcabhiḥ pāṇḍunandanaiḥ

yogasiddhaistathā kaiścinmārkaṇḍeyamukhairapi //
kramitā na kramiṣyanti na pūrve nāpare janāḥ

alpasattvabalopetaiḥ prāṇibhiścālpabuddhibhiḥ //
manasāpi na śakyaṃte gamanasya ca kā kathā

saptadvīpe ca tīrthānāṃ bhramaṇādyatphalaṃ bhavet //
prāpyate cādhikaṃ tasmānmathurāyāḥ parikrame

mathurāṃ samanuprāpya yastu kuryātpradakṣiṇam //
pradakṣiṇīkṛtā tena saptadvīpā vasundharā

tasmātsarvaprayatnena sarvakāmānabhīpsubhiḥ//
karttavyā mathurāṃ prāpya naraiḥ samyakpradakṣiṇā

dharaṇyuvāca //
yathāvidhānakramaṇaṃ mathurāyāmavāpyate //
pradakṣiṇāphalaṃ samyaganukramavidhiṃ vada

śrīvarāha uvāca //
purā saptarṣibhiḥ pṛṣṭo brahmā lokapitāmahaḥ //
idameva purā proktaṃ yathā pṛṣṭā tvayā hyaham

śrutvā sarvapurāṇoktaṃ tīrthānukramaṇaṃ param //
pṛthivyāścaturantāyāstathā tadvaktumudyataḥ

sarvadeveṣu yatpuṇyaṃ sarvatīrtheṣu yatphalam //
sarvadāneṣu yatproktamiṣṭāpūrtteṣu caiva hi

yatphalaṃ labhyate viprāstasmācchataguṇottaram //
prakramānmathurāyāstu satyametadvadāmi vaḥ

ityuktvā ṛṣayo jagmurabhivādya svayambhuvam //
āgatya mathurāṃ devīmāśramāṃścakrire dvijāḥ

dhruveṇa sahitāścāsankāmayānāstu taddinam //
kumudasya tu māsasya navamyāṃ śuklapakṣake

mathuropakramaṃ kṛtvā sarvapāpaiḥ pramucyate

iti śrīvarāhapurāṇe mathurāmāhātmye mathurāpradakṣiṇādikaṃ nāmaikonaṣaṣṭyadhikaśatatamo'dhyāyaḥ