Varaha Purana · Chapter 158

atha mathurātīrthaprādurbhāvaḥ //
śrīvarāha uvāca //
viṃśatiryojanānāṃ tu māthuraṃ mama maṇḍalam //
yatratatra naraḥ snāto mucyate sarvakilbiṣaiḥ

varṣākāle tu sthātavyaṃ yacca sthānaṃ tu harṣadam //
puṇyātpuṇyataraṃ caiva māthure mama maṇḍale

saptadvīpeṣu tīrthāni puṇyānyāyatanāni ca //
mathurāyāṃ gamiṣyanti prasupte tu sadā mayi

suptotthitaṃ tu dṛṣṭvā māṃ mathurāyāṃ vasundhare //
te narā māṃ prapaśyanti sarvakālaṃ na saṃśayaḥ

suptotthitaṃ tu vasudhe dṛṣṭvā me mukhapaṅkajam //
saptajanmakṛtaṃ pāpaṃ tatkṣaṇādeva muñcati

mathurāvāsino lokāḥ sarve te muktibhājanāḥ //
mathurāṃ samanuprāpya dṛṣṭvā devaṃ tu keśavam

snātvā punastu kālindyāṃ mama loke mahīyate //
sa tatphalamavāpnoti rājasūyāśvamedhayoḥ

pradakṣiṇīkṛto yena mathurāyāṃ tu keśavaḥ //
pradakṣiṇīkṛtā tena saptadvīpā vasundharā

ghṛtapūrṇena pātreṇa samagreṇa ca vāsasā //
keśavasyāgrato dattvā dīpakaṃ tu vasundhare

paṃcayojanavistāramāyāmaṃ paṃca vistaram //
dīpamālāsamākīrṇaṃ vimānaṃ labhate naraḥ

sarvakāmasamṛddhaṃ tadapsarogaṇasevitam //
ramyamālāsamākīrṇaṃ bhogāḍhyaṃ sarvakāmikam

samārohati vai nityaṃ prabhāmaṇḍalamaṇḍitam //
ye devā ye ca gandharvāḥ siddhāścāraṇapannagāḥ

taṃ spṛhanti sadā devi puṇyamasti kṛtaṃ bhuvi //
yadi kālāntare puṇyaṃ hīyate'sya purā kṛtam

satāṃ puṇyagṛhe devi jāyate mānavo hi saḥ //
dharaṇyuvāca //
kṣetraṃ hi rakṣate deva kastvidaṃ pāpanāśanam

paśubhūtapiśācaiśca rakṣobhūtavināyakaiḥ //
evamādibhirākṛṣṭaṃ tatkṣetraṃ phaladaṃ bhavet

śrīvarāha uvāca //
matkṣetraṃ te na paśyanti matprabhāvātkadācana //
na vikurvanti te dṛṣṭvā matparāṇāṃ hi dehinām

rakṣārthaṃ hi mayā dattā dikpālāstu varānane //
lokapālāstu catvārastīrthaṃ rakṣanti ye sadā

pūrvāṃ rakṣati indrastu yamo rakṣati dakṣiṇām //
paścimāṃ rakṣate nityaṃ varuṇaḥ pāśabhṛtsvayam

uttarāṃ vai kuberastu mahābalaparākramaḥ //
madhyaṃ tu rakṣate nityaṃ śivo deva umāpatiḥ

mathurāyāṃ gṛhaṃ yastu prāsādaṃ kurute naraḥ //
caturbhujastu vijñeyo jīvanmukto na saṃśayaḥ

mathurāyā mahābhāge kuṇḍe ca vimalodake //
gambhīre sarvadā devi tiṣṭhate ca caturbhujaḥ

tatra muñceta yaḥ prāṇān snānaṃ kṛtvā vasundhare //
vaiṣṇavaṃ lokamāsādya krīḍate sa sukhādiva

tatraiva tu sadāścaryaṃ kathyamānaṃ mayā śṛṇu //
yaducyate vai suśroṇi kuṇḍe tu vimalodake

hemante tu bhaveccoṣṇaṃ śītalaṃ grīṣmake bhavet //
tejasā mama suśroṇi tuṣāratadṛśopamam

na varddhate ca varṣāsu grīṣme cāpi na hīyate //
etacca mahadāścaryaṃ tasminkuṇḍe paraṃ mama

pade pade tīrthaphalaṃ mathurāyāṃ vasuṃdhare//
tatra tatra naraḥ snāto mucyate sarvapātakaiḥ

varṣāsu sthūlatīrtheṣu snātavyaṃ tu prayatnataḥ //
kūpe hrade devakhāte garteṣu ca nadīṣu ca

pravāheṣu ca divyeṣu nadīnāṃ saṅmeṣu ca //
varṣāsu sarvataḥ snāyādyadīcchetparamāṃ gatim

asti kṣetraṃ paraṃ divyaṃ mucukundaṃ tu nāmataḥ //
mucukuṃdaḥ svapityatra dānavāsurapātanaḥ

tatra kuṇḍe naraḥ snātvā prāpnotyabhimataṃ jalam //
athātra muñcate prāṇānmama lokaṃ sa gacchati

27
ihajanmakṛtaṃ pāpamanyajanmakṛtaṃ ca yat //
śīghraṃ naśyati tatsarvaṃ kīrttanātkeśavasya tu

kiṃ tasya bahubhirmaṃtrairbhaktiryasya janārdane//
narake pacyamānasya gatirdevi janārdanaḥ

kṛtvā pradakṣiṇaṃ devi viśrāmaṃ kurute tu yaḥ //
nārāyaṇasamīpe tu so'nantaphalamaśnute

suptotthitaṃ hariṃ dṛṣṭvā mathurāyāṃ vasundhare //
na tasya punarāvṛttirjāyate sa caturbhujaḥ

kumudasya tu māsasya navamyāṃ tu vasundhare //
pradakṣiṇīkṛtya bhuvaṃ sarvapāpaiḥ pramucyate

brahmaghnaśca surāpaśca goghno bhagnavratastathā //
mathurāṃ tu parikramya pūto bhavati mānavaḥ

aṣṭamyāṃ prāpya mathurāṃ dantadhāvanapūrvakam //
brahmacaryeṇa tāṃ rātriṃ kṛtasaṃkalpamānasaḥ

dhautavastrastu susnāto maunavrataparāyaṇaḥ //
pradakṣiṇaṃ tu kurvīta sarvapātaka nāśanam

pradakṣiṇāṃ prakurvāṇamanyo yaḥ spṛśate naraḥ //
sarvān kāmānavāpnoti nātra kāryā vicāraṇā

mathurāyāṃ naro gatvā dṛṣṭvā devaṃ svayambhuvam //
pradakṣiṇāyāṃ yatpuṇyaṃ tatpuṇyaṃ labhate naraḥ

devasyāgre tu vasudhe kūpaṃ tu vimalodakam//
pitaraścābhinandanti pānīyaṃ piṇḍameva ca

catuḥsāmudrikaṃ nāma triṣu lokeṣu viśrutam //
tatra snāto naro bhadre devaiśca saha modate

tatrātha muñcate prāṇānmama lokaṃ sa gacchati

iti śrīvarāhapurāṇe mathurāmāhātmye mathurātīrthaprabhāvo nāmāṣṭapaṃcāśadadhikaśatatamo'dhyāyaḥ