વરાહ પુરાણ · અધ્યાય 159
અથ મથુરાપ્રદક્ષિણા વિધ્યાદિકમ્ ॥
ધરણ્યુવાચ ॥
શ્રુતં સુબહુશો દેવ તીર્થાનાં ગુણવિસ્તરમ્ ॥
પ્રોચ્યમાનં તુ પુણ્યાખ્યં ત્વત્પ્રસાદાજ્જનાર્દન
ન દાનૈર્ન તપોભિશ્ચ ન યજ્ઞૈસ્તાદૃશં ફલમ્॥
ભૂમેઃ પ્રદક્ષિણાયાશ્ચ યાદૃશં તીર્થસેવયા
ભુવશ્ચ ચતુરન્તાયાસ્તીર્થપ્રક્રમણં હરે ॥
સર્વતીર્થાભિગમનમસ્તિ દુર્ગતરં નૃણામ્
અસ્તિ કશ્ચિદુપાયોઽત્ર યેન સમ્યગવાપ્યતે ॥
પ્રસાદસુમુખો ભૂત્વા તત્સર્વં કથયસ્વ મે
શ્રીવરાહ ઉવાચ ॥
ભદ્રે શૃણુ મહત્પુણ્યં પૃથિવ્યાં સર્વતોદિશમ્ ॥
પરિક્રમ્ય યથાધ્વાનં પ્રમાણગણિતં શુભમ્
ભૂમ્યાઃ પરિક્રમે સમ્યક્યોજનાનાં પ્રમાણકમ્ ॥
ષષ્ટિકોટિસહસ્રાણિ ષષ્ટિકોટિશતાનિ ચ
તીર્થાન્યેતાનિ દેવાશ્ચ તારકાશ્ચ નભસ્થલે ॥
ગણિતાનિ સમસ્તાનિ વાયુના જગદાયુષા
બ્રહ્મણા લોમશેનૈવ નારદેન ધ્રુવેણ ચ ॥
જામ્બવત્યાશ્ચ પુત્રેણ રાવણેન હનૂમતા
એતૈરનેકધા દેવૈઃ સસાગરવના મહી ॥
ક્રમિતા બલિના ચૈવ બાહ્યમણ્ડલરેખયા
અન્તરા ભ્રમણેનૈવ સુગ્રીવેણ મહાત્મના ॥
તથા ચ પૂર્વં દેવેન્દ્રૈઃ પંચભિઃ પાણ્ડુનન્દનૈઃ
યોગસિદ્ધૈસ્તથા કૈશ્ચિન્માર્કણ્ડેયમુખૈરપિ ॥
ક્રમિતા ન ક્રમિષ્યન્તિ ન પૂર્વે નાપરે જનાઃ
અલ્પસત્ત્વબલોપેતૈઃ પ્રાણિભિશ્ચાલ્પબુદ્ધિભિઃ ॥
મનસાપિ ન શક્યંતે ગમનસ્ય ચ કા કથા
સપ્તદ્વીપે ચ તીર્થાનાં ભ્રમણાદ્યત્ફલં ભવેત્ ॥
પ્રાપ્યતે ચાધિકં તસ્માન્મથુરાયાઃ પરિક્રમે
મથુરાં સમનુપ્રાપ્ય યસ્તુ કુર્યાત્પ્રદક્ષિણમ્ ॥
પ્રદક્ષિણીકૃતા તેન સપ્તદ્વીપા વસુન્ધરા
તસ્માત્સર્વપ્રયત્નેન સર્વકામાનભીપ્સુભિઃ॥
કર્ત્તવ્યા મથુરાં પ્રાપ્ય નરૈઃ સમ્યક્પ્રદક્ષિણા
ધરણ્યુવાચ ॥
યથાવિધાનક્રમણં મથુરાયામવાપ્યતે ॥
પ્રદક્ષિણાફલં સમ્યગનુક્રમવિધિં વદ
શ્રીવરાહ ઉવાચ ॥
પુરા સપ્તર્ષિભિઃ પૃષ્ટો બ્રહ્મા લોકપિતામહઃ ॥
ઇદમેવ પુરા પ્રોક્તં યથા પૃષ્ટા ત્વયા હ્યહમ્
શ્રુત્વા સર્વપુરાણોક્તં તીર્થાનુક્રમણં પરમ્ ॥
પૃથિવ્યાશ્ચતુરન્તાયાસ્તથા તદ્વક્તુમુદ્યતઃ
સર્વદેવેષુ યત્પુણ્યં સર્વતીર્થેષુ યત્ફલમ્ ॥
સર્વદાનેષુ યત્પ્રોક્તમિષ્ટાપૂર્ત્તેષુ ચૈવ હિ
યત્ફલં લભ્યતે વિપ્રાસ્તસ્માચ્છતગુણોત્તરમ્ ॥
પ્રક્રમાન્મથુરાયાસ્તુ સત્યમેતદ્વદામિ વઃ
ઇત્યુક્ત્વા ઋષયો જગ્મુરભિવાદ્ય સ્વયમ્ભુવમ્ ॥
આગત્ય મથુરાં દેવીમાશ્રમાંશ્ચક્રિરે દ્વિજાઃ
ધ્રુવેણ સહિતાશ્ચાસન્કામયાનાસ્તુ તદ્દિનમ્ ॥
કુમુદસ્ય તુ માસસ્ય નવમ્યાં શુક્લપક્ષકે
મથુરોપક્રમં કૃત્વા સર્વપાપૈઃ પ્રમુચ્યતે
ઇતિ શ્રીવરાહપુરાણે મથુરામાહાત્મ્યે મથુરાપ્રદક્ષિણાદિકં નામૈકોનષષ્ટ્યધિકશતતમોઽધ્યાયઃ
મૂળ પાઠ: varāhapurāṇam · Sanskrit Wikisource contributors · Sanskrit Wikisource · CC BY-SA 4.0