Varaha Purana · Chapter 157

atha malayārjunatīrthādisnānādipraśaṃsā //
śrīvarāha uvāca //
yamunāpāramullaṅghya tatraiva ca mahāmune //
malayārjunakaṃ tīrthaṃ kuṇḍaṃ tatra ca vidyate

paryastaṃ tatra śakaṭaṃ bhinnabhāṇḍakuṭīghaṭam //
tatra snānopavāsābhyāmanantaṃ phalamaśrute

dvādaśyāṃ śuklapakṣasya jyeṣṭhamāse vasundhare //
tatra snānena dānena mahāpātakanāśanam

jyeṣṭhasya śukladvādaśyāṃ snātvā suniyatendriyaḥ //
mathurāyāṃ hariṃ dṛṣṭvā prāpnoti paramāṃ gatim

yamunāsalile snātaḥ śucirbhūtvā jitendriyaḥ //
samabhyarcyācyutaṃ samyakprāpnoti paramāṃ gatim

api cāsmatkule jātaḥ kālindīsalile plutaḥ //
arcayiṣyati govindaṃ mathurāyāmupoṣitaḥ

iti gāyanti pitaraḥ paralokagatāḥ sadā //
dvādaśyāṃ jyeṣṭhamāse tu samabhyarcya janārdanam

dhanyo'sau piṇḍanirvāpaṃ yamunāyāṃ kariṣyati //
tatraiva tu mahātīrthe vane bahulasaṃjñake

tatra snāto naro devi rudraloke mahīyate //
dvādaśyāṃ caitramāse tu śuklapakṣe vasundhare

tatra snāto naro yāti mama lokaṃ na saṃśayaḥ //
asti bhāṇḍahradaṃ nāma parapāreṣu durllabham

dṛśyante'harahastatra ādityāḥ śubhakāriṇaḥ //
tatra cārkasthale kuṇḍe snānaṃ yaḥ kurute naraḥ

sarvapāpavinirmuktaḥ sūryalokaṃ vrajennaraḥ //
tatrātha muñcate prāṇānmama lokaṃ sa gacchati

arkasthalasamīpe tu kūpaṃ tu vimalodakam //
saptasāmudrikaṃ nāma devānāmapi durllabham

tatra snānena vasudhe svacchandagamanālayaḥ //
athātra muṃcate prāṇānmama lokaṃ sa gacchati

tatra vīrasthalaṃ nāma kṣetraṃ guhyaṃ paraṃ mama //
āsannasalilaṃ caiva padmotpalavibhūṣitam

yastatra kurute snānamekarātroṣito naraḥ //
sa matprasādātsuśroṇi vīraloke mahīyate

athā'tra muñcate prāṇānmamalokaṃ sa gacchati //
kuśasthalaṃ ca tatraiva puṇyaṃ pāpaharaṃ śubham

tatra snāto naro devi brahmaloke mahīyate//
athātra muṃcate prāṇānmama lokaṃ sa gacchati

tatra puṣpasthalaṃ nāma śivakṣetramanuttamam //
tatra snānena manujaḥ śivaloke mahīyate

khyātā ete pañca deśā mahāpāpavināśanāḥ //
teṣu snāneṣu vasudhe brahmaṇā saha modate

tatra gopīśvaro nāma mahāpātakanāśanaḥ //
kṛṣṇasya ramaṇārthaṃ hi sahasrāṇi ca ṣoḍaśa

gopyo rūpāṇi cakre ca tatra krīḍanake hariḥ //
yadā bālena kṛṣṇena bhagnārjunayugaṃ tathā

śakaṭaṃ ca tadā bhinnaṃ ghaṭabhāṇḍakuṭīrakam //
tābhistatraiva govindaṃ krīḍantaṃ ca yadṛcchayā

pariṣvajya hi dharmeṇa vyājena ca sugopitam //
mātalistatra cāgatya devairuktaṃ yathoditam

gopaveṣadharaṃ devamabhiṣekaṃ cakāra ha //
ānīya sapta kalaśānratnauṣadhipariplutān

gopīmaṇḍalapātena snāpito hemakuṇḍalaḥ //
gopyo gāyanti nṛtyanti kṛṣṇa kṛṣṇa iti bruvan

tatra gopīśvaraṃ devaṃ mātaliḥ sthāpya pūjitam //
kūpaṃ ca sthāpayāmāsa māṃgalyaiḥ kalaśaiḥ śubhaiḥ

saptasāmudrikaṃ nāma kūpaṃ tu vimalodakam //
devasyāgre tu vasudhe gopā yasya mahātmanaḥ

pitaraścāpi nandanti pānīyaṃ piṇḍameva ca //
saptasāmudrike kūpe yaḥ śrāddhaṃ saṃpradāsyati

pitarastāritāstena kulānāṃ saptasaptatiḥ //
somavāre tvamāyāṃ vai piṇḍadānaṃ karoti yaḥ

pitarastasya tṛpyanti koṭivarṣaśatānyalam //
govindasya ca devasya tathā gopīśvarasya ca

madhye tu maraṇaṃ yasya śakrasyaiti salokatām //
tathā bahularudrasya govindasyaiva madhyataḥ

tadvadbrahmāṇamāśāsya gopīśasyaiva madhyataḥ //
eteṣu snānadānena piṇḍapātena bhāmini

narastārayate puṃsāṃ daśa pūrvāndaśāparān //
eṣu snāto naro devi devaiśca saha modate

tatrātha muñcate prāṇānmama lokaṃ sa gacchati//
vasupatraṃ mahātīrthaṃ puṇyaṃ paramamuttamam

mathurādakṣiṇe pārśve kṣetraṃ phālgunakaṃ tathā //
tatra snātvā ca pītvā ca paraloke mahīyate

tatra phālgunake caiva tīrthe paramadurllabhe //
vṛṣabhāñjanakaṃ nāma kṣetraṃ me durllabhaṃ mahat

tatrābhiṣekaṃ yaḥ kuryātsa devaiḥ saha modate //
tatra yo muñcate prāṇānmama lokaṃ sa gacchati

asti tālavanaṃ nāma dhenukāsurarakṣitam //
mathurāpaścime bhāge adūrādarddhayojanam

tatra kuṇḍaṃ svacchajalaṃ nīlotpalavibhūṣitam //
tatra snānena dānena vāñchitaṃ phalamāpnuyāt

asti saṃpīṭhakaṃ nāma asmin kṣetre paraṃ mama //
tatra kuṇḍaṃ viśālākṣi prasannasalilaṃ śubham

tatra snānaṃ ca ye kuryurekarātroṣitā narāḥ//
agniṣṭoma phalaṃ caiva labhante nātra saṃśayaḥ

athātra muñcate prāṇānmama lokaṃ sa gacchati //
devakīgarbhasaṃbhūto vasudevagṛhe śubhe

tatra puṇyena hi mayā ravirārādhitaḥ śubhaḥ //
labdhaḥ prājño mayā putro rūpavāṃśca guṇānvitaḥ

tatraivaṃ tu tato dṛṣṭaḥ padmahasto divākaraḥ //
māsi bhādrapade devī tigmatejā vibhāvasuḥ

saptamyāṃ kṛṣṇapakṣasya ravistiṣṭhati sarvadā //
tasminnahani yaḥ snānaṃ kuryātkuṇḍe samāhitaḥ

na tasya durllabhaṃ loke sarvadātā divākaraḥ //
āditye'hani samprāpte saptamyāṃ tu vasundhare

naro vāpyathavā nārī prāpnotyavikalaṃ phalam //
tatraiva tu tapastaptaṃ rājñā śantanunā purā

ādityaṃ tu puraḥ sthāpya prāpto bhīṣmo mahābalaḥ //
śantanuḥ prāpya taṃ putraṃ gato 'sau hastināpuram

tatra snānena dānena vāñchitaṃ phalamāpnuyāt

iti śrīvarāhapurāṇe mathurāmāhātmye malayārjunatīrthādisnānādi praśaṃsā nāma saptapañcāśadadhikaśatatamodhyāyaḥ