Varaha Purana · Chapter 156

atha mathurāprādurbhāvaḥ //
śrīvarāha uvāca //
vatsakrīḍanakaṃ nāma tīrthaṃ vakṣye paraṃ mama //
tatra raktaśilābaddhaṃ raktacandanabhūṣitam

snānamātreṇa tatraiva vāyulokaṃ vrajennaraḥ //
tatrā'tha muñcate prāṇānmama loke mahīyate

punaranyatpravakṣyāmi tacchṛṇuṣva vasundhare //
asti bhāṇḍīrakaṃ nāma yattīrthaṃ paramuttamam

sālaistālaiśca tarubhistamālairarjjunaistathā //
iṅgudaiḥ pīlukaiścaiva karīrairaktapuṣpakaiḥ

tasminbhāṇḍīrake snāto niyato niyatāśanaḥ //
sarvapāpavinirmuktaścendralokaṃ sa gacchati

tatrā'tha muñcate prāṇānmama lokaṃ ca gacchati //
punaranyatpravakṣyāmi kṣetraṃ vṛndāvanaṃ mama

tatrāhaṃ krīḍayiṣyāmi gobhir gopālakaiḥ saha //
ramyaṃ ca supratītaṃ ca devadānavadurlabham

tatra kuṇḍe mahābhāge bahugulmalatāvṛte //
tatra snānaṃ prakurvīta caikarātroṣito naraḥ

gandharvairapsarobhiśca krīḍamānaḥ sa modate //
tatrātha muñcate prāṇānmama lokaṃ ca gacchati

punaranyatpravakṣyāmi mahāpātakanāśanam //
tatra vṛndāvane tīrthe yatra keśī nipātitaḥ

tīrthaṃ śataguṇaṃ puṇyaṃ yatra keśī nipātitaḥ //
keśyaḥ śataguṇaṃ puṇyaṃ yatra viśramate hariḥ

tasmācchataguṇaṃ puṇyaṃ nātra kāryā vicāraṇā //
tatrāpi ca viśeṣo'sti keśītīrthe vasundhare

tasminpiṇḍapradānena gayātulya phalaṃ bhavet//
snāne dāne tathā home agniṣṭomaphalaṃ bhavet

sūryatīrtheṣu vasudhe dvādaśādityasaṃjñike //
kāliyo ramate tatra kāliṃdyāḥ salile śubhe

kāliyo damitastatra ādityāḥ sthāpitā mayā //
varaṃ vṛṇudhvaṃ bhadraṃ vo yadvo manasi varttate

ādityā ūcuḥ //
varaṃ dadāsi no deva varārhā yadi vā vayam //
asmiṃstīrthavare snānamasmākaṃ saṃpradīyatām

ādityānāṃ vacaḥ śrutvā krīḍāṃ kṛtvā vasundhare //
snānamātreṇa tatraiva mucyate sarvakilbiṣaiḥ

athātra muṃcate prāṇānmama lokaṃ sa gacchati //
uttare haridevasya dakṣiṇe kāliyasya tu

anayordevayormadhye ye mṛtāste'punarbhavāḥ

iti śrīvarāhapurāṇe mathurāmāhātmye mathurāprādurbhāvo nāma ṣaṭpaṃcāśadadhikaśatatamo'dhyāyaḥ