Varaha Purana · Chapter 139

atha saukaramāhātmyam //
śrīvarāha uvāca //
śṛṇu tattvena me devi lipyamānasya yatphalam //
sarvaṃ te kathayaṣyāmi yathā prāpnoti mānavaḥ

gṛhītvā gomayaṃ bhūme mama veśmopalepayet //
nyastāni tatra yāvanti padāni ca vilimpataḥ

tāvadvarṣasahasrāṇi divyāni divi modate //
yadi dvādaśavarṣāṇi lipyate mama karmasu

jāyate vipule śuddhe dhanadhānyasamākule //
divyairnamaskṛto devi kuśadvīpaṃ ca gacchati

kuśadvīpamanuprāpya sahasrāṇi ca jīvati //
daśa caiva tu varṣāṇāṃ mama bhakto mahāñchuciḥ

kuśadvīpātparibhraṣṭo mama karmaparāyaṇaḥ//
rājā vai jāyate subhru sarvadharmeṣu niṣṭhitaḥ

tena tasya prabhāveṇa mama karmaparāyaṇaḥ //
bhaktau vyavasthitaścāpi sarvaśāstrāṇi pṛcchati

devi kārayate sarvaṃ mama cāyatanāni ca//
kārayitvā yathānyāyaṃ mama lokaṃ sa gacchati

gomayasya tu vakṣyāmi tacchṛṇuṣva vasundhare//
gomayantu samāsādya yāvalloko'nugacchati

samīpe yadi vā dūre gatvā nayati gomayam//
yāvanti tatpadānyasya tāvadvarṣa sahasrakam

gomayānāṃ ca netā vai svargaloke mahīyate//
tataḥ sa śālmale dvīpe ramate ca mudā yutaḥ

ekādaśasahasrāṇi ekādaśaśatāni ca //
śālmalāttu paribhraṣṭo rājā bhavati dhārmikaḥ

madbhaktaścaiva jāyeta sarvadharmavidāṃ varaḥ //
atha dvādaśavarṣāṇi macchritaḥ sudṛḍhavrataḥ

vahate gomayaṃ suṣṭhu mama lokaṃ sa gacchati //
snānopalepane bhūme salilaṃ yo dadāti ca

tasya puṇyaṃ mahābhāge śṛṇu tatvena niṣkalam //
yāvanto bindavastatra pānīyasya vasundhare

tāvadvarṣasahasrāṇi svargaloke mahīyate //
svargalokātparibhraṣṭaḥ kraucadvīpaṃ ca gacchati

krauṃcadvīpātparibhraṣṭo rājā bhavati dhārmikaḥ //
tenaiva guṇayogena śvetadvīpaṃ ca gacchati

saṃmārjjanaṃ pravakṣyāmi tacchṛṇuṣva vasundhare //
yāṃ gatiṃ puruṣā yānti striyo vā karmasu sthitāḥ

śucirbhāgavataḥ śuddho aparādhavivarjitaḥ //
yāvantaḥ pāṃsavo bhūmeruḍḍīyante tu cālitāḥ

tāvadvarṣaśatānyāśu svargaloke mahīyate //
svargalokātparibhraṣṭaḥ śākadvīpaṃ sa gacchati

tatra sthitvā ciraṅkālaṃ rājā bhavati dhārmikaḥ //
tato bhuktvā sarvabhogānsthitvā saṃsārasāgare

śvetadvīpaṃ tato gacchenmatkarmanirataḥ śuciḥ //
anyacca te pravakṣyāmi śṛṇuṣva gadato mama

gāyanaṃ ye prakurvanti mama karmaparāyaṇāḥ //
teṣāṃ yadyatphalaṃ bhūme śṛṇuṣva gadato mama

gīyamānasya gītasya yāvadakṣarapaṅktayaḥ //
tāvadvarṣasahasrāṇi indraloke mahīyate

rūpavānguṇavān siddhaḥ sarvavedavidāṃ varaḥ //
nityaṃ paśyati tatrastho devarājaṃ na saṃśayaḥ

madbhaktaścaiva jāyeta indralokapathe sthitaḥ //
sarvakarmaguṇaśreṣṭhastatrāpi mama pūjakaḥ

indralokātparibhraṣṭo mama gītaparāyaṇaḥ //
nandanopavane ramye ramandevagaṇaiḥ saha

tataḥ sa bhūmau jāyeta vaiṣṇavaiḥ saha saṃsthitaḥ //
gāyanmama yaśo nityaṃ bhaktyā paramayā yutaḥ

matprasādātsa śuddhātmā mama lokaṃ hi gacchati

sūta uvāca //
tasya tadvacanaṃ śrutvā mādhavasya yaśasvinī //
kṛtāñjalipuṭā bhūyaḥ pratyuvāca vasundharā

dharaṇyuvāca //
aho gītaprabhāvo vai yastvayā kīrttito mahān //
ke ca gītaprabhāveṇa siddhiṃ prāptā mahaujasaḥ

varāha uvāca //
tatraiva cāśrame bhadre cāṇḍālaḥ kṛtaniścayaḥ //
dūrājjāgaraṇe yāti mama bhaktau vyavasthitaḥ

gāyamānaśca gītāni saṃvatsaragaṇānbahūn //
śvapākaḥ sa guṇajñaśca madbhaktaścaiva sundari

kaumudasya tu māsasya śuklapakṣe tu dvādaśī //
supte gate yena jāte vīṇāmādāya caṃkramat

jāgraṃstatra sa cāṇḍālo gṛhīto brahmarakṣasā //
alpaprāṇaḥ śvapāko vai balavānbrahmarākṣasaḥ

duḥkhaśokena santapto na śaknoti viceṣṭitum //
tena proktaḥ śvapākena balavānbrahmarākṣasaḥ

kiṃ tvayā ceṣṭitaṃ mahyaṃ yastvevaṃ paridhāvasi //
śvapākavacanaṃ śrutvā tena vai brahmarakṣasā

tataḥ provāca taṃ śvādaṃ mānuṣāhāralolupaḥ //
atheha daśarātraṃ me nirāhārasya tiṣṭhataḥ

vidhātrā vihitastvaṃ va āhāraḥ pāraṇāvidhau //
adya tāṃ bhakṣayiṣyāmi savasāmāṃsaśoṇitaiḥ

tṛptiṃ yāsyāmi paramāṃ vidhātrā vihitāṃ mama //
brahmarakṣovacaḥ śrutvā śvapāko gītalālasaḥ

rākṣasaṃ chandayāmāsa mama bhaktyā vyavasthitaḥ //
evametanmahābhāga bhakṣyo'haṃ samupāgataḥ

avaśyametatkartavyaṃ dhātrā dattaṃ yathā tava //
kiṃ tvahaṃ devadevasya bhaktyā gātuṃ ca jāgare

udyaṃstatra gatvāhamupāsya vidhinā harim //
paścātkhādasva māṃ rakṣo jāgarādvinivartitam

viṣṇoḥ santoṣaṇārthāya yato me vratamāsthitam //
jāgare vinivṛtte māṃ bhakṣaya tvaṃ yadīcchati

śvapākasya vacaḥ śrutvā brahmarakṣaḥ kṣudhārditaḥ //
uvāca puruṣaṃ vākyaṃ śvapākaṃ tadanantaram

mithyā kiṃ bhāṣase mūḍha punareṣyāmi te'ntikam //
mṛtyormukhamanuprāpya punarjīvati mānavaḥ

rakṣaso mukhavibhraṣṭaḥ punarāgantumicchasi //
rākṣasasya vacaḥ śrutvā cāṇḍālastamathābravīt

yadyapyahaṃ hi cāṇḍālaḥ pūrvakarmavidūṣitaḥ //
samprāpto mānuṣaṃ bhāvaṃ vihitenāntarātmanā

śṛṇu matsamayaṃ rakṣo yenāhaṃ punarāgamam //
dūrājjāgaraṇaṃ kṛtvā lokasya dvijarākṣasa

satyena punareṣyāmi manyase yadi muṃca mām //
satyamūlaṃ jagatsarvaṃ lokāḥ satye pratiṣṭhitāḥ

satyena siddhiṃ prāptā hi ṛṣayo brahmavādinaḥ //
satyena dīyate kanyā satyaṃ jalpanti brāhmaṇāḥ

satyaṃ jayanti rājānastrīṇyetānyabruvannṛtam //
satyena gamyate svargo mokṣaḥ satyena cāpyate

satyena tapate sūryaḥ somaḥ satyena rajyate //
ṣaṣṭhyaṣṭamīmamāvāsyāmubhe pakṣe caturdaśī

asnātānāṃ gatiṃ yāsye yadyahaṃ nāgame punaḥ //
gurupatnīṃ rājapatnīṃ yo'bhigacchati mohitaḥ

tāṃ gatiṃ samprapadye'haṃ yadyahaṃ nāgame punaḥ//
yājakānāṃ ca ye lokā ye ca mithyābhibhāṣiṇām

tāṃ gatiṃ samprapadye'haṃ yadyaṃ nāgame punaḥ//
brahmaghne ca surāpe vā stene bhagnavrate tathā

teṣāṃ gatiṃ prapadye'haṃ yadyahaṃ nāgame punaḥ//
śvapākavacanaṃ śrutvā tuṣṭo brāhmaṇarākṣasaḥ

uvāca madhuraṃ vākyaṃ gaccha śīghraṃ namo'stu te//
brahmarākṣasamuktvā tu śvapākaḥ kṛtaniścayaḥ

punargāyati mahyaṃ vai mama bhaktau vyavasthitaḥ//
atha prabhāte vimale gīte nṛtye ca jāgare

namo nārāyaṇāyeti śvapākaḥ parivarttate//
tatastvaritamāgatya pumāṃstasyāgrataḥ sthitaḥ

uvāca madhuraṃ vākyaṃ cāṇḍālaṃ kṛtaniścayam//
kva yāsi tvaritaḥ sādho na ca tvaṃ gantumarhasi

jānankauṇapapaṃ taṃ ca na tvaṃ marttumihārhasi//
puruṣasya vacaḥ śrutvā cāṇḍālaḥ punarabravīt

samayo me kṛtaḥ pūrvaṃ rākṣasena hi bhakṣatā//
tena tatra gamiṣyāmi satyaṃ ca paripālayan

tataḥ sa padmapatrākṣaḥ śvapākaṃ pratyuvāca ha//
madhurāṃ giramādāya vihitenāntarātmanā

mā gaccha tatra cāṇḍāla yatrāsau pāparākṣasaḥ//
jīvitārthāya satyasya na doṣaḥ parihāpanāt

tatastasya vacaḥ śrutvā śvapākaḥ saṃśitavrataḥ//
uvāca madhuraṃ vākyaṃ maraṇe kṛtaniścayaḥ

nāhamevaṃ kariṣyāmi yanmāṃ tvaṃ paribhāṣase//
na cāhaṃ nāśaye satyametanme niścitaṃ vratam

satyamūlaṃ jagatsarvaṃ kulaṃ satye pratiṣṭhitam//
satyameva paro dharma ātmā satye pratiṣṭhitaḥ

na caivāhaṃ tadutsṛjya asatyaḥ syāṃ kadācana//
nāhaṃ mithyā cariṣyāmi gaccha tāta namo'stu te

evamuktvā śvapākopi nityaṃ satyavrate sthitaḥ//
rākṣasaṃ samanuprāptastamuvācātha pūjayan

āgato'smi mahābhāga mā vilambaya bhakṣaya//
tvatprasādādahaṃ gantā vaiṣṇavaṃ sthānamuttamam

etāni mama gātrāṇi bhakṣayasva yatheṣṭataḥ//
piboṣṇaṃ rudhiraṃ mahyaṃ pīḍito'si kṣudhā bhṛśam

tarpayasva svamātmānaṃ kuruṣva mama vai hitam//
śvapākasya vacaḥ śrutvā tataḥ sa brahmarākṣasaḥ

uvāca madhuraṃ vākyaṃ śvapākaṃ tadanantaram//
sādhu tuṣṭo'smyahaṃ vatsa satyaṃ dharmaṃ ca pālitam

caṇḍālasyāvidhijñasya yasya te matirīdṛśī//
brahmarakṣovacaḥ śrutvā śvapākaḥ satyasaṅgaraḥ

uvāca madhuraṃ vākyaṃ brahmarākṣasameva tu//
yadyapyahaṃ vai cāṇḍālaḥ sarvakarmavivarjitaḥ

tathāpi satyaṃ vaktavyaṃ brahmarākṣasa nityaśaḥ//
śvapākavacanaṃ śrutvā brahmarakṣo bhayānakam

uvāca madhuraṃ vākyaṃ śvapākaṃ saṃśitavratam //
yattvayā gīyate rātrau viṣṇorjāgaraṇaṃ prati

phalaṃ gītasya me dehi yadīccherjīvitaṃ svakam //
tato mokṣyāmi kalyāṇa bhakṣyāmi na ca bhīṣaṇaḥ

brahmarakṣovacaḥ śrutvā śvapākaḥ pratyuvāca ha//
mano'jñātamidaṃ vākyaṃ brahmarakṣo nibhāṣase

bhakṣayāmīti coktvā māṃ gītapuṇyaṃ kimicchasi //
śvapākavacanaṃ śrutvā brahmarakṣo'bravītpunaḥ

dehi me tvekayāmīyaṃ puṇyaṃ gītasya vai param //
tato mokṣyasi bhakṣyeṇa saṃgataḥ putradārakaiḥ

śrutvā rākṣasavākyāni cāṇḍālo gītalobhitaḥ //
uvāca madhuraṃ vākyaṃ rākṣasaṃ kṛtaniścayaḥ

na gāyanaphalaṃ dadmi brahmarakṣastavepsitam //
bhakṣayasva yathānyāyaṃ rudhiraṃ piba cepsitam

śvapākavacanaṃ śrutvā rākṣasaḥ punarabravīt //
ekagītasya me dehi yattvayā viṣṇusaṃsadi

etena tārito'smīti tava gītaphalena vai //
śrutvā vākyāni cāṇḍālo rākṣasasya nivārayan

uvāca madhuraṃ vākyaṃ cāṇḍālo vismayānvitaḥ //
kiṃ tvayā vikṛtaṃ karma tadbrūhi mama rākṣasa

karmaṇo yasya doṣeṇa rākṣasatvaṃ samāgataḥ //
śvapākavacanaṃ śrutvā brahmarakṣo mahāyaśāḥ

uvāca madhuraṃ vākyaṃ duḥkhasantaptamānasaḥ //
nāmnā vai somaśarmāhaṃ carako brahmayonijaḥ

sūtramantraparibhraṣṭo yajñakarmasu niṣṭhitaḥ //
tato'haṃ yājayāmyajñān lobhamohaprapīḍitaḥ

pravartamāne yajñe tu kadāciddaivayogataḥ //
udare jātaśūlo'haṃ tena paṃcatvamāgataḥ

atha pañcamahārātre hyasamāpte kratau tathā //
asya yajñasya doṣeṇa mātaṃga śṛṇu me vacaḥ

rākṣasatvamanuprāptastena duṣṭena karmaṇā //
maṃtrahīnaṃ mayā tatra svarahīnaṃ ca tatkṛtam

sūtrahīnaṃ tathā tatra prāgvaṃśādi kṛtaṃ mayā //
parimāṇaṃ ca rūpaṃ ca mayā tatropalakṣitam

kṛtasya tasya doṣeṇa yoniṃ prāpto'smi rākṣasīm //
svagītaphaladānena nistārayitumarhasi

mocayasvādhamaṃ pāpādviṣṇugītena satvaram //
brahmarakṣovacaḥ śrutvā śvapākaḥ saṃśitavrataḥ

bāḍhamityeva tadvākyaṃ rākṣasaṃ prābravīttadā //
etasya mama gītasya susvarasya phalaṃ tu yat

dadāmi rākṣasa tvaṃ cenmucyase śuddhamānasaḥ //
yastu gāyati saṃyuktaṃ gītakaṃ viṣṇusannidhau

sa tārayati durgāṇītyuktvā taddattavān phalam //
evaṃ tasmātphalaṃ prāpya śvapākādrākṣasastadā

jātaḥ suvimalo bhadre śaradīva yathā śaśī//
śvapakaścāpi suśroṇi mama caivopagāyakaḥ

kṛtvā suvipulaṃ karma sa brahmatvamupāgataḥ//
etadgītaphalaṃ devi prāpnoti manujo bhuvi

mahyaṃ jāgarato bhadre gīyamānaṃ manasvini//
yastu gāyati suśroṇi kaumudīṃ dvādaśīṃ prati

sarvasaṃgaṃ parityajya mama lokaṃ sa gacchati//
yastu gāyati gītāni mama jāgaraṇe sadā

sarvasaṃgātpramukto vai mama lokaṃ sa gacchati//
etatte kathitaṃ devi gāyanasya phalaṃ mahat

yasya gītasya śabdena taretsaṃsārasāgaram//
vāditrasya pravakṣyāmi tacchṛṇuṣva vasundhare

prāptavānmānuṣo yena devebhyaḥ sabalāṃ svayam//
śampātālaprayogeṇa sannipātena vā punaḥ

navavarṣasahasrāṇi navavarṣaśatāni ca //
kuberabhavanaṃ gatvā modate vai yadṛcchayā

kuberabhavanādbhraṣṭaḥ svacchandagamanālayaḥ//
śamyāditālasampātairmama lokaṃ sa gacchati

nṛtyamānasya vakṣyāmi tacchṛṇuṣva vasundhare/.
mānavo yena gacchettu cchittvā saṃsārabandhanam

triṃśadvarṣasahasrāṇi triṃśadvarṣaśatāni ca//
puṣkaradvīpamāsādya svacchandagamanālayaḥ

phalaṃ prāpnoti suśroṇi mama karmaparāyaṇaḥ//
rūpavān guṇavāñchūraḥ śīlavānsatpathe sthitaḥ

madbhaktaścaiva jāyeta saṃsāraparimocitaḥ//
yastu jāgarito nityaṃ gītavādyena narttakaḥ

jambūdvīpaṃ samāsādya rājarājastu jāyate//
sarvakarmasamāyukto rakṣitā vai mahīpatiḥ

madbhaktaścaiva jāyeta mama karmaparāyaṇaḥ//
upahāryāṇi puṣpāṇi mama karmaparāyaṇaḥ

yo māmupanayedbhūme mama karmapathe sthitaḥ//
puṣpāṇi tatra yāvanti mama mūrddhani dhārayet

sa kṛtvā puṣkalaṃ karma mama lokaṃ sa gacchati//
etatte kathitaṃ devi bhaktānāṃ tu mahaujasām

mama bhaktasukhārthāya sarvasaṃsāramokṣaṇam//
ya etatpaṭhate bhūme kalyamutthāya mānavaḥ

sa tu tārayate janturdaśa pūrvāndaśāparān//
na paṭhenmūrkhamadhye tu piśunānāṃ puro na ca

paṭhedbhāgavatānāṃ ca madhye muktiratātmanām//
aśraddadhāne krūre vā na paṭheddevale tathā

yadīcchetsiddhikalyāṇaṃ maṃgalaṃ ca mama priyam//
dharmāṇāṃ paramo dharmaḥ kriyāṇāṃ paramā kriyā

mā paṭhecchāstradūṣāya adhyāyaṃ vā kadācana//
yadīcchetparamāṃ siddhiṃ mama loke mahīyate

iti śrīvarāhapurāṇe bhagavacchāstre saukare cāṇḍālabrahmarākṣasasaṃvāde saukaramāhātmyaṃ nāmaikonacatvāriṃśadadhikaśatatamo'dhyāyaḥ