વરાહ પુરાણ · અધ્યાય 139

અથ સૌકરમાહાત્મ્યમ્ ॥
શ્રીવરાહ ઉવાચ ॥
શૃણુ તત્ત્વેન મે દેવિ લિપ્યમાનસ્ય યત્ફલમ્ ॥
સર્વં તે કથયષ્યામિ યથા પ્રાપ્નોતિ માનવઃ

ગૃહીત્વા ગોમયં ભૂમે મમ વેશ્મોપલેપયેત્ ॥
ન્યસ્તાનિ તત્ર યાવન્તિ પદાનિ ચ વિલિમ્પતઃ

તાવદ્વર્ષસહસ્રાણિ દિવ્યાનિ દિવિ મોદતે ॥
યદિ દ્વાદશવર્ષાણિ લિપ્યતે મમ કર્મસુ

જાયતે વિપુલે શુદ્ધે ધનધાન્યસમાકુલે ॥
દિવ્યૈર્નમસ્કૃતો દેવિ કુશદ્વીપં ચ ગચ્છતિ

કુશદ્વીપમનુપ્રાપ્ય સહસ્રાણિ ચ જીવતિ ॥
દશ ચૈવ તુ વર્ષાણાં મમ ભક્તો મહાઞ્છુચિઃ

કુશદ્વીપાત્પરિભ્રષ્ટો મમ કર્મપરાયણઃ॥
રાજા વૈ જાયતે સુભ્રુ સર્વધર્મેષુ નિષ્ઠિતઃ

તેન તસ્ય પ્રભાવેણ મમ કર્મપરાયણઃ ॥
ભક્તૌ વ્યવસ્થિતશ્ચાપિ સર્વશાસ્ત્રાણિ પૃચ્છતિ

દેવિ કારયતે સર્વં મમ ચાયતનાનિ ચ॥
કારયિત્વા યથાન્યાયં મમ લોકં સ ગચ્છતિ

ગોમયસ્ય તુ વક્ષ્યામિ તચ્છૃણુષ્વ વસુન્ધરે॥
ગોમયન્તુ સમાસાદ્ય યાવલ્લોકોઽનુગચ્છતિ

સમીપે યદિ વા દૂરે ગત્વા નયતિ ગોમયમ્॥
યાવન્તિ તત્પદાન્યસ્ય તાવદ્વર્ષ સહસ્રકમ્

ગોમયાનાં ચ નેતા વૈ સ્વર્ગલોકે મહીયતે॥
તતઃ સ શાલ્મલે દ્વીપે રમતે ચ મુદા યુતઃ

એકાદશસહસ્રાણિ એકાદશશતાનિ ચ ॥
શાલ્મલાત્તુ પરિભ્રષ્ટો રાજા ભવતિ ધાર્મિકઃ

મદ્ભક્તશ્ચૈવ જાયેત સર્વધર્મવિદાં વરઃ ॥
અથ દ્વાદશવર્ષાણિ મચ્છ્રિતઃ સુદૃઢવ્રતઃ

વહતે ગોમયં સુષ્ઠુ મમ લોકં સ ગચ્છતિ ॥
સ્નાનોપલેપને ભૂમે સલિલં યો દદાતિ ચ

તસ્ય પુણ્યં મહાભાગે શૃણુ તત્વેન નિષ્કલમ્ ॥
યાવન્તો બિન્દવસ્તત્ર પાનીયસ્ય વસુન્ધરે

તાવદ્વર્ષસહસ્રાણિ સ્વર્ગલોકે મહીયતે ॥
સ્વર્ગલોકાત્પરિભ્રષ્ટઃ ક્રૌચદ્વીપં ચ ગચ્છતિ

ક્રૌંચદ્વીપાત્પરિભ્રષ્ટો રાજા ભવતિ ધાર્મિકઃ ॥
તેનૈવ ગુણયોગેન શ્વેતદ્વીપં ચ ગચ્છતિ

સંમાર્જ્જનં પ્રવક્ષ્યામિ તચ્છૃણુષ્વ વસુન્ધરે ॥
યાં ગતિં પુરુષા યાન્તિ સ્ત્રિયો વા કર્મસુ સ્થિતાઃ

શુચિર્ભાગવતઃ શુદ્ધો અપરાધવિવર્જિતઃ ॥
યાવન્તઃ પાંસવો ભૂમેરુડ્ડીયન્તે તુ ચાલિતાઃ

તાવદ્વર્ષશતાન્યાશુ સ્વર્ગલોકે મહીયતે ॥
સ્વર્ગલોકાત્પરિભ્રષ્ટઃ શાકદ્વીપં સ ગચ્છતિ

તત્ર સ્થિત્વા ચિરઙ્કાલં રાજા ભવતિ ધાર્મિકઃ ॥
તતો ભુક્ત્વા સર્વભોગાન્સ્થિત્વા સંસારસાગરે

શ્વેતદ્વીપં તતો ગચ્છેન્મત્કર્મનિરતઃ શુચિઃ ॥
અન્યચ્ચ તે પ્રવક્ષ્યામિ શૃણુષ્વ ગદતો મમ

ગાયનં યે પ્રકુર્વન્તિ મમ કર્મપરાયણાઃ ॥
તેષાં યદ્યત્ફલં ભૂમે શૃણુષ્વ ગદતો મમ

ગીયમાનસ્ય ગીતસ્ય યાવદક્ષરપઙ્ક્તયઃ ॥
તાવદ્વર્ષસહસ્રાણિ ઇન્દ્રલોકે મહીયતે

રૂપવાન્ગુણવાન્ સિદ્ધઃ સર્વવેદવિદાં વરઃ ॥
નિત્યં પશ્યતિ તત્રસ્થો દેવરાજં ન સંશયઃ

મદ્ભક્તશ્ચૈવ જાયેત ઇન્દ્રલોકપથે સ્થિતઃ ॥
સર્વકર્મગુણશ્રેષ્ઠસ્તત્રાપિ મમ પૂજકઃ

ઇન્દ્રલોકાત્પરિભ્રષ્ટો મમ ગીતપરાયણઃ ॥
નન્દનોપવને રમ્યે રમન્દેવગણૈઃ સહ

તતઃ સ ભૂમૌ જાયેત વૈષ્ણવૈઃ સહ સંસ્થિતઃ ॥
ગાયન્મમ યશો નિત્યં ભક્ત્યા પરમયા યુતઃ

મત્પ્રસાદાત્સ શુદ્ધાત્મા મમ લોકં હિ ગચ્છતિ

સૂત ઉવાચ ॥
તસ્ય તદ્વચનં શ્રુત્વા માધવસ્ય યશસ્વિની ॥
કૃતાઞ્જલિપુટા ભૂયઃ પ્રત્યુવાચ વસુન્ધરા

ધરણ્યુવાચ ॥
અહો ગીતપ્રભાવો વૈ યસ્ત્વયા કીર્ત્તિતો મહાન્ ॥
કે ચ ગીતપ્રભાવેણ સિદ્ધિં પ્રાપ્તા મહૌજસઃ

વરાહ ઉવાચ ॥
તત્રૈવ ચાશ્રમે ભદ્રે ચાણ્ડાલઃ કૃતનિશ્ચયઃ ॥
દૂરાજ્જાગરણે યાતિ મમ ભક્તૌ વ્યવસ્થિતઃ

ગાયમાનશ્ચ ગીતાનિ સંવત્સરગણાન્બહૂન્ ॥
શ્વપાકઃ સ ગુણજ્ઞશ્ચ મદ્ભક્તશ્ચૈવ સુન્દરિ

કૌમુદસ્ય તુ માસસ્ય શુક્લપક્ષે તુ દ્વાદશી ॥
સુપ્તે ગતે યેન જાતે વીણામાદાય ચંક્રમત્

જાગ્રંસ્તત્ર સ ચાણ્ડાલો ગૃહીતો બ્રહ્મરક્ષસા ॥
અલ્પપ્રાણઃ શ્વપાકો વૈ બલવાન્બ્રહ્મરાક્ષસઃ

દુઃખશોકેન સન્તપ્તો ન શક્નોતિ વિચેષ્ટિતુમ્ ॥
તેન પ્રોક્તઃ શ્વપાકેન બલવાન્બ્રહ્મરાક્ષસઃ

કિં ત્વયા ચેષ્ટિતં મહ્યં યસ્ત્વેવં પરિધાવસિ ॥
શ્વપાકવચનં શ્રુત્વા તેન વૈ બ્રહ્મરક્ષસા

તતઃ પ્રોવાચ તં શ્વાદં માનુષાહારલોલુપઃ ॥
અથેહ દશરાત્રં મે નિરાહારસ્ય તિષ્ઠતઃ

વિધાત્રા વિહિતસ્ત્વં વ આહારઃ પારણાવિધૌ ॥
અદ્ય તાં ભક્ષયિષ્યામિ સવસામાંસશોણિતૈઃ

તૃપ્તિં યાસ્યામિ પરમાં વિધાત્રા વિહિતાં મમ ॥
બ્રહ્મરક્ષોવચઃ શ્રુત્વા શ્વપાકો ગીતલાલસઃ

રાક્ષસં છન્દયામાસ મમ ભક્ત્યા વ્યવસ્થિતઃ ॥
એવમેતન્મહાભાગ ભક્ષ્યોઽહં સમુપાગતઃ

અવશ્યમેતત્કર્તવ્યં ધાત્રા દત્તં યથા તવ ॥
કિં ત્વહં દેવદેવસ્ય ભક્ત્યા ગાતું ચ જાગરે

ઉદ્યંસ્તત્ર ગત્વાહમુપાસ્ય વિધિના હરિમ્ ॥
પશ્ચાત્ખાદસ્વ માં રક્ષો જાગરાદ્વિનિવર્તિતમ્

વિષ્ણોઃ સન્તોષણાર્થાય યતો મે વ્રતમાસ્થિતમ્ ॥
જાગરે વિનિવૃત્તે માં ભક્ષય ત્વં યદીચ્છતિ

શ્વપાકસ્ય વચઃ શ્રુત્વા બ્રહ્મરક્ષઃ ક્ષુધાર્દિતઃ ॥
ઉવાચ પુરુષં વાક્યં શ્વપાકં તદનન્તરમ્

મિથ્યા કિં ભાષસે મૂઢ પુનરેષ્યામિ તેઽન્તિકમ્ ॥
મૃત્યોર્મુખમનુપ્રાપ્ય પુનર્જીવતિ માનવઃ

રક્ષસો મુખવિભ્રષ્ટઃ પુનરાગન્તુમિચ્છસિ ॥
રાક્ષસસ્ય વચઃ શ્રુત્વા ચાણ્ડાલસ્તમથાબ્રવીત્

યદ્યપ્યહં હિ ચાણ્ડાલઃ પૂર્વકર્મવિદૂષિતઃ ॥
સમ્પ્રાપ્તો માનુષં ભાવં વિહિતેનાન્તરાત્મના

શૃણુ મત્સમયં રક્ષો યેનાહં પુનરાગમમ્ ॥
દૂરાજ્જાગરણં કૃત્વા લોકસ્ય દ્વિજરાક્ષસ

સત્યેન પુનરેષ્યામિ મન્યસે યદિ મુંચ મામ્ ॥
સત્યમૂલં જગત્સર્વં લોકાઃ સત્યે પ્રતિષ્ઠિતાઃ

સત્યેન સિદ્ધિં પ્રાપ્તા હિ ઋષયો બ્રહ્મવાદિનઃ ॥
સત્યેન દીયતે કન્યા સત્યં જલ્પન્તિ બ્રાહ્મણાઃ

સત્યં જયન્તિ રાજાનસ્ત્રીણ્યેતાન્યબ્રુવન્નૃતમ્ ॥
સત્યેન ગમ્યતે સ્વર્ગો મોક્ષઃ સત્યેન ચાપ્યતે

સત્યેન તપતે સૂર્યઃ સોમઃ સત્યેન રજ્યતે ॥
ષષ્ઠ્યષ્ટમીમમાવાસ્યામુભે પક્ષે ચતુર્દશી

અસ્નાતાનાં ગતિં યાસ્યે યદ્યહં નાગમે પુનઃ ॥
ગુરુપત્નીં રાજપત્નીં યોઽભિગચ્છતિ મોહિતઃ

તાં ગતિં સમ્પ્રપદ્યેઽહં યદ્યહં નાગમે પુનઃ॥
યાજકાનાં ચ યે લોકા યે ચ મિથ્યાભિભાષિણામ્

તાં ગતિં સમ્પ્રપદ્યેઽહં યદ્યં નાગમે પુનઃ॥
બ્રહ્મઘ્ને ચ સુરાપે વા સ્તેને ભગ્નવ્રતે તથા

તેષાં ગતિં પ્રપદ્યેઽહં યદ્યહં નાગમે પુનઃ॥
શ્વપાકવચનં શ્રુત્વા તુષ્ટો બ્રાહ્મણરાક્ષસઃ

ઉવાચ મધુરં વાક્યં ગચ્છ શીઘ્રં નમોઽસ્તુ તે॥
બ્રહ્મરાક્ષસમુક્ત્વા તુ શ્વપાકઃ કૃતનિશ્ચયઃ

પુનર્ગાયતિ મહ્યં વૈ મમ ભક્તૌ વ્યવસ્થિતઃ॥
અથ પ્રભાતે વિમલે ગીતે નૃત્યે ચ જાગરે

નમો નારાયણાયેતિ શ્વપાકઃ પરિવર્ત્તતે॥
તતસ્ત્વરિતમાગત્ય પુમાંસ્તસ્યાગ્રતઃ સ્થિતઃ

ઉવાચ મધુરં વાક્યં ચાણ્ડાલં કૃતનિશ્ચયમ્॥
ક્વ યાસિ ત્વરિતઃ સાધો ન ચ ત્વં ગન્તુમર્હસિ

જાનન્કૌણપપં તં ચ ન ત્વં મર્ત્તુમિહાર્હસિ॥
પુરુષસ્ય વચઃ શ્રુત્વા ચાણ્ડાલઃ પુનરબ્રવીત્

સમયો મે કૃતઃ પૂર્વં રાક્ષસેન હિ ભક્ષતા॥
તેન તત્ર ગમિષ્યામિ સત્યં ચ પરિપાલયન્

તતઃ સ પદ્મપત્રાક્ષઃ શ્વપાકં પ્રત્યુવાચ હ॥
મધુરાં ગિરમાદાય વિહિતેનાન્તરાત્મના

મા ગચ્છ તત્ર ચાણ્ડાલ યત્રાસૌ પાપરાક્ષસઃ॥
જીવિતાર્થાય સત્યસ્ય ન દોષઃ પરિહાપનાત્

તતસ્તસ્ય વચઃ શ્રુત્વા શ્વપાકઃ સંશિતવ્રતઃ॥
ઉવાચ મધુરં વાક્યં મરણે કૃતનિશ્ચયઃ

નાહમેવં કરિષ્યામિ યન્માં ત્વં પરિભાષસે॥
ન ચાહં નાશયે સત્યમેતન્મે નિશ્ચિતં વ્રતમ્

સત્યમૂલં જગત્સર્વં કુલં સત્યે પ્રતિષ્ઠિતમ્॥
સત્યમેવ પરો ધર્મ આત્મા સત્યે પ્રતિષ્ઠિતઃ

ન ચૈવાહં તદુત્સૃજ્ય અસત્યઃ સ્યાં કદાચન॥
નાહં મિથ્યા ચરિષ્યામિ ગચ્છ તાત નમોઽસ્તુ તે

એવમુક્ત્વા શ્વપાકોપિ નિત્યં સત્યવ્રતે સ્થિતઃ॥
રાક્ષસં સમનુપ્રાપ્તસ્તમુવાચાથ પૂજયન્

આગતોઽસ્મિ મહાભાગ મા વિલમ્બય ભક્ષય॥
ત્વત્પ્રસાદાદહં ગન્તા વૈષ્ણવં સ્થાનમુત્તમમ્

એતાનિ મમ ગાત્રાણિ ભક્ષયસ્વ યથેષ્ટતઃ॥
પિબોષ્ણં રુધિરં મહ્યં પીડિતોઽસિ ક્ષુધા ભૃશમ્

તર્પયસ્વ સ્વમાત્માનં કુરુષ્વ મમ વૈ હિતમ્॥
શ્વપાકસ્ય વચઃ શ્રુત્વા તતઃ સ બ્રહ્મરાક્ષસઃ

ઉવાચ મધુરં વાક્યં શ્વપાકં તદનન્તરમ્॥
સાધુ તુષ્ટોઽસ્મ્યહં વત્સ સત્યં ધર્મં ચ પાલિતમ્

ચણ્ડાલસ્યાવિધિજ્ઞસ્ય યસ્ય તે મતિરીદૃશી॥
બ્રહ્મરક્ષોવચઃ શ્રુત્વા શ્વપાકઃ સત્યસઙ્ગરઃ

ઉવાચ મધુરં વાક્યં બ્રહ્મરાક્ષસમેવ તુ॥
યદ્યપ્યહં વૈ ચાણ્ડાલઃ સર્વકર્મવિવર્જિતઃ

તથાપિ સત્યં વક્તવ્યં બ્રહ્મરાક્ષસ નિત્યશઃ॥
શ્વપાકવચનં શ્રુત્વા બ્રહ્મરક્ષો ભયાનકમ્

ઉવાચ મધુરં વાક્યં શ્વપાકં સંશિતવ્રતમ્ ॥
યત્ત્વયા ગીયતે રાત્રૌ વિષ્ણોર્જાગરણં પ્રતિ

ફલં ગીતસ્ય મે દેહિ યદીચ્છેર્જીવિતં સ્વકમ્ ॥
તતો મોક્ષ્યામિ કલ્યાણ ભક્ષ્યામિ ન ચ ભીષણઃ

બ્રહ્મરક્ષોવચઃ શ્રુત્વા શ્વપાકઃ પ્રત્યુવાચ હ॥
મનોઽજ્ઞાતમિદં વાક્યં બ્રહ્મરક્ષો નિભાષસે

ભક્ષયામીતિ ચોક્ત્વા માં ગીતપુણ્યં કિમિચ્છસિ ॥
શ્વપાકવચનં શ્રુત્વા બ્રહ્મરક્ષોઽબ્રવીત્પુનઃ

દેહિ મે ત્વેકયામીયં પુણ્યં ગીતસ્ય વૈ પરમ્ ॥
તતો મોક્ષ્યસિ ભક્ષ્યેણ સંગતઃ પુત્રદારકૈઃ

શ્રુત્વા રાક્ષસવાક્યાનિ ચાણ્ડાલો ગીતલોભિતઃ ॥
ઉવાચ મધુરં વાક્યં રાક્ષસં કૃતનિશ્ચયઃ

ન ગાયનફલં દદ્મિ બ્રહ્મરક્ષસ્તવેપ્સિતમ્ ॥
ભક્ષયસ્વ યથાન્યાયં રુધિરં પિબ ચેપ્સિતમ્

શ્વપાકવચનં શ્રુત્વા રાક્ષસઃ પુનરબ્રવીત્ ॥
એકગીતસ્ય મે દેહિ યત્ત્વયા વિષ્ણુસંસદિ

એતેન તારિતોઽસ્મીતિ તવ ગીતફલેન વૈ ॥
શ્રુત્વા વાક્યાનિ ચાણ્ડાલો રાક્ષસસ્ય નિવારયન્

ઉવાચ મધુરં વાક્યં ચાણ્ડાલો વિસ્મયાન્વિતઃ ॥
કિં ત્વયા વિકૃતં કર્મ તદ્બ્રૂહિ મમ રાક્ષસ

કર્મણો યસ્ય દોષેણ રાક્ષસત્વં સમાગતઃ ॥
શ્વપાકવચનં શ્રુત્વા બ્રહ્મરક્ષો મહાયશાઃ

ઉવાચ મધુરં વાક્યં દુઃખસન્તપ્તમાનસઃ ॥
નામ્ના વૈ સોમશર્માહં ચરકો બ્રહ્મયોનિજઃ

સૂત્રમન્ત્રપરિભ્રષ્ટો યજ્ઞકર્મસુ નિષ્ઠિતઃ ॥
તતોઽહં યાજયામ્યજ્ઞાન્ લોભમોહપ્રપીડિતઃ

પ્રવર્તમાને યજ્ઞે તુ કદાચિદ્દૈવયોગતઃ ॥
ઉદરે જાતશૂલોઽહં તેન પંચત્વમાગતઃ

અથ પઞ્ચમહારાત્રે હ્યસમાપ્તે ક્રતૌ તથા ॥
અસ્ય યજ્ઞસ્ય દોષેણ માતંગ શૃણુ મે વચઃ

રાક્ષસત્વમનુપ્રાપ્તસ્તેન દુષ્ટેન કર્મણા ॥
મંત્રહીનં મયા તત્ર સ્વરહીનં ચ તત્કૃતમ્

સૂત્રહીનં તથા તત્ર પ્રાગ્વંશાદિ કૃતં મયા ॥
પરિમાણં ચ રૂપં ચ મયા તત્રોપલક્ષિતમ્

કૃતસ્ય તસ્ય દોષેણ યોનિં પ્રાપ્તોઽસ્મિ રાક્ષસીમ્ ॥
સ્વગીતફલદાનેન નિસ્તારયિતુમર્હસિ

મોચયસ્વાધમં પાપાદ્વિષ્ણુગીતેન સત્વરમ્ ॥
બ્રહ્મરક્ષોવચઃ શ્રુત્વા શ્વપાકઃ સંશિતવ્રતઃ

બાઢમિત્યેવ તદ્વાક્યં રાક્ષસં પ્રાબ્રવીત્તદા ॥
એતસ્ય મમ ગીતસ્ય સુસ્વરસ્ય ફલં તુ યત્

દદામિ રાક્ષસ ત્વં ચેન્મુચ્યસે શુદ્ધમાનસઃ ॥
યસ્તુ ગાયતિ સંયુક્તં ગીતકં વિષ્ણુસન્નિધૌ

સ તારયતિ દુર્ગાણીત્યુક્ત્વા તદ્દત્તવાન્ ફલમ્ ॥
એવં તસ્માત્ફલં પ્રાપ્ય શ્વપાકાદ્રાક્ષસસ્તદા

જાતઃ સુવિમલો ભદ્રે શરદીવ યથા શશી॥
શ્વપકશ્ચાપિ સુશ્રોણિ મમ ચૈવોપગાયકઃ

કૃત્વા સુવિપુલં કર્મ સ બ્રહ્મત્વમુપાગતઃ॥
એતદ્ગીતફલં દેવિ પ્રાપ્નોતિ મનુજો ભુવિ

મહ્યં જાગરતો ભદ્રે ગીયમાનં મનસ્વિનિ॥
યસ્તુ ગાયતિ સુશ્રોણિ કૌમુદીં દ્વાદશીં પ્રતિ

સર્વસંગં પરિત્યજ્ય મમ લોકં સ ગચ્છતિ॥
યસ્તુ ગાયતિ ગીતાનિ મમ જાગરણે સદા

સર્વસંગાત્પ્રમુક્તો વૈ મમ લોકં સ ગચ્છતિ॥
એતત્તે કથિતં દેવિ ગાયનસ્ય ફલં મહત્

યસ્ય ગીતસ્ય શબ્દેન તરેત્સંસારસાગરમ્॥
વાદિત્રસ્ય પ્રવક્ષ્યામિ તચ્છૃણુષ્વ વસુન્ધરે

પ્રાપ્તવાન્માનુષો યેન દેવેભ્યઃ સબલાં સ્વયમ્॥
શમ્પાતાલપ્રયોગેણ સન્નિપાતેન વા પુનઃ

નવવર્ષસહસ્રાણિ નવવર્ષશતાનિ ચ ॥
કુબેરભવનં ગત્વા મોદતે વૈ યદૃચ્છયા

કુબેરભવનાદ્ભ્રષ્ટઃ સ્વચ્છન્દગમનાલયઃ॥
શમ્યાદિતાલસમ્પાતૈર્મમ લોકં સ ગચ્છતિ

નૃત્યમાનસ્ય વક્ષ્યામિ તચ્છૃણુષ્વ વસુન્ધરે।.
માનવો યેન ગચ્છેત્તુ ચ્છિત્ત્વા સંસારબન્ધનમ્

ત્રિંશદ્વર્ષસહસ્રાણિ ત્રિંશદ્વર્ષશતાનિ ચ॥
પુષ્કરદ્વીપમાસાદ્ય સ્વચ્છન્દગમનાલયઃ

ફલં પ્રાપ્નોતિ સુશ્રોણિ મમ કર્મપરાયણઃ॥
રૂપવાન્ ગુણવાઞ્છૂરઃ શીલવાન્સત્પથે સ્થિતઃ

મદ્ભક્તશ્ચૈવ જાયેત સંસારપરિમોચિતઃ॥
યસ્તુ જાગરિતો નિત્યં ગીતવાદ્યેન નર્ત્તકઃ

જમ્બૂદ્વીપં સમાસાદ્ય રાજરાજસ્તુ જાયતે॥
સર્વકર્મસમાયુક્તો રક્ષિતા વૈ મહીપતિઃ

મદ્ભક્તશ્ચૈવ જાયેત મમ કર્મપરાયણઃ॥
ઉપહાર્યાણિ પુષ્પાણિ મમ કર્મપરાયણઃ

યો મામુપનયેદ્ભૂમે મમ કર્મપથે સ્થિતઃ॥
પુષ્પાણિ તત્ર યાવન્તિ મમ મૂર્દ્ધનિ ધારયેત્

સ કૃત્વા પુષ્કલં કર્મ મમ લોકં સ ગચ્છતિ॥
એતત્તે કથિતં દેવિ ભક્તાનાં તુ મહૌજસામ્

મમ ભક્તસુખાર્થાય સર્વસંસારમોક્ષણમ્॥
ય એતત્પઠતે ભૂમે કલ્યમુત્થાય માનવઃ

સ તુ તારયતે જન્તુર્દશ પૂર્વાન્દશાપરાન્॥
ન પઠેન્મૂર્ખમધ્યે તુ પિશુનાનાં પુરો ન ચ

પઠેદ્ભાગવતાનાં ચ મધ્યે મુક્તિરતાત્મનામ્॥
અશ્રદ્દધાને ક્રૂરે વા ન પઠેદ્દેવલે તથા

યદીચ્છેત્સિદ્ધિકલ્યાણં મંગલં ચ મમ પ્રિયમ્॥
ધર્માણાં પરમો ધર્મઃ ક્રિયાણાં પરમા ક્રિયા

મા પઠેચ્છાસ્ત્રદૂષાય અધ્યાયં વા કદાચન॥
યદીચ્છેત્પરમાં સિદ્ધિં મમ લોકે મહીયતે

ઇતિ શ્રીવરાહપુરાણે ભગવચ્છાસ્ત્રે સૌકરે ચાણ્ડાલબ્રહ્મરાક્ષસસંવાદે સૌકરમાહાત્મ્યં નામૈકોનચત્વારિંશદધિકશતતમોઽધ્યાયઃ