Varaha Purana · Chapter 136

atha prāyaścittakarmasūtram//
śrīvarāha uvāca //
dīpaṃ spṛṣṭvā tu yo devi mama karmāṇi kārayet //
tasyāparādhādvai bhūme pāpaṃ prāpnoti mānavaḥ

tacchṛṇuṣva mahābhāge kathyamānaṃ mayā'naghe//
jāyate ṣaṣṭivarṣāṇi kuṣṭhī gātraparipluta

cāṇḍālasya gṛhe tatra evametanna saṃśayaḥ //
evaṃ bhuktvā tu tatkarma mama kṣetre mṛto yadi

madbhaktaścaiva jāyeta śuddhe bhāgavate gṛhe //
prāyaścittaṃ pravakṣyāmi dīpasya sparśanādbhuvi

taranti manujā yena kaṣṭaṃ cāṇḍālayoniṣu //
yasya kasyāpi māsasya śuklapakṣe ca dvādaśī

caturthabhaktamāhāramākāśaśayane svapet //
dīpaṃ dattvāparādhādvai taranti manujā bhuvi

śucirbhūtvā yathānyāyaṃ mama karmapathe sthitaḥ //
etatte kathitaṃ bhadre sparśane dīpakasya tu

saṃsāraśodhanaṃ caiva yatkṛtvā labhate śubham //
śmaśānaṃ yo naro gatvā asnātvaiva tu māṃ spṛśet

mama doṣāparādhasya śṛṇu tattvena yatphalam //
jambuko jāyate bhūmau varṣāṇāṃ nava paṃca ca

gṛdhrastu sapta varṣāṇi jāyate khacareśvaraḥ //
carantau mānuṣaṃ māṃsamubhau tau gṛdhrajambukau

piśāco jāyate tatra varṣāṇi nava paṃca ca //
tatastu kuṇapocchiṣṭaṃ triṃśadvarṣāṇi khādati

tato nārāyaṇācchrutvā dharaṇī vākyamabravīt //
etanme paramaṃ guhyaṃ lokanātha janārdana

paraṃ kautūhalaṃ deva nikhilaṃ vaktumarhasi //
śmaśānaṃ puṇḍarīkākṣa īśvareṇa praśaṃsitam

kintvatra triguṇaṃ deva pavitre śivabhāṣite //
sa tava ramate nityaṃ bhagavāṃstu mahāmatiḥ

kapālaṃ gṛhya devo'tra dīptimantaṃ mahaujasam //
praśaṃsitaṃ ca rudreṇa bhavatā kiṃ vininditam

śmaśānaṃ padmapatrākṣa rudrasya ca niśi priyam //
śrīvarāha uvāca //
śṛṇu tattvena me devi idamākhyānamuttamam

adyāpi te na jānanti hyanaghe saṃśitavratāḥ //
kṛtvā suduṣkaraṃ karma sarvabhūtapatiṃ harim

hatvā ca bālānvṛddhāṃśca tripure rūpiṇīḥ striyaḥ //
tena pāpena sambaddho na śaknoti viceṣṭitum

praṇaṣṭamānasaiśvaryo naṣṭā māyā ca yoginaḥ //
vivarṇavadano bhūtvā tiṣṭhate sa maheśvaraḥ

tatra sthāne śivo bhūme gaṇaiḥ sarvaiḥ samāvṛtaḥ //
naṣṭamāyaṃ tato devi cintayāmi vasundhare

tato dhyāto mayā devi śaṅkaraḥ punareṣyati //
yāvatpaśyāmi taṃ devaṃ devi divyena cakṣuṣā

naṣṭaṃ māyābalaṃ rudraṃ sarvabhūtamaheśvaram //
tato'haṃ tatra gatvā tu yaṣṭukāmaṃ triyambakam

naṣṭasaṃjño hatajñāno naṣṭayogabalo'balaḥ //
tata īśo mayā cokto vākyamevaṃ sukhāvaham

kimidaṃ tiṣṭhase rudra kaśmalena samāvṛtaḥ //
tvaṃ karttā ca vikarttā ca vikārākāra eva ca

tvaṃ vaiśākhyaṃ viyogaṃ ca tvaṃ yonistvaṃ parāyaṇam //
tvamugradevadevādistvaṃ sāma tvaṃ tathā diśaḥ

kiṃ na budhyati cātmānaṃ gaṇaiḥ parivṛto bhavān //
kimidaṃ devadeveśa vivarṇaḥ pṛthulocanaḥ

tanmamācakṣva tattvena yatpṛṣṭosi mayā bhavān //
smara yogaṃ ca māyāṃ ca paśya viṣṇormahātmanaḥ

tava caiva priyārthāya yenāhamiha cāgataḥ //
tato mama vacaḥ śrutvā labdhasaṃjño maheśvaraḥ

uvāca madhuraṃ vākyaṃ pāpasantaptalocanaḥ //
śrṛṇu tattvena me deva ko'nyo'pyevaṃ kariṣyati

devaṃ nārāyaṇaṃ caikaṃ sarvalokamaheśvaram //
he viṣṇo tvatprasādena devatvaṃ caiva mādhava

labdho yogaśca sāṅkhyaṃ ca jāto'smi vigatajvaraḥ //
tvatprasādena jāto'smi pūrṇāmburiva sāgaraḥ

ahaṃ tvāṃ tu vijānāmi māṃ tvaṃ jānāsi mādhava //
āvayorantaraṃ ko'pi na paśyati janārdana

brahmāṇaṃ tu vijānāti nāvayorantareṇa hi //
sādhu viṣṇo mahābhāga sarvamāyākaraṇḍaka

evaṃ mahyaṃ haro vākyamuktvā bhūtamaheśvaraḥ //
muhūrttaṃ dhyānamāsthāya punaḥ provāca mādhavi

tava viṣṇo prasādena mayā tattripuraṃ hatam //
nihatā dānavāstatra garbhiṇyaśca nipātitāḥ

bālavṛddhā hatāstatra visphuranto diśo daśa //
tasya pāpasya doṣeṇa na śaknomi viceṣṭitum

praṇaṣṭayogamāyaśca naṣṭaiśvaryaśca mādhava //
ki karttavyaṃ mayā viṣṇo pāpāvasthena samprati

viṣṇo tattvena me brūhi śodhanaṃ pāpa nāśanam //
yena vai kṛtamātreṇa śuddho mucyeta kilbiṣāt

evaṃ cintātmanastasya mayā rudrasya bhāṣitam //
kapālamālāṃ gṛhītvā samalaṃ gaccha śaṅkara

mamaivaṃ vacanaṃ śrutvā bhagavānparameśvaraḥ //
uvāca māṃ punarvyaktaṃ māṃ bodhaya jagatpate

kīdṛśaḥ samalo viṣṇo yatra gacchāmahe vayam //
tatastasya vacaḥ śrutvā śaṅkarasya maheśvari

tatpāpaśodhanārthāya mayā vākyaṃ prabhāṣitam //
śmaśānaṃ samalaṃ rudra pūtiko vraṇagandhikaḥ

svayaṃ tiṣṭhanti vai tatra manujā vigataspṛhaḥ //
tatra gṛhya kapālāni rama tatraiva śaṅkara

tatra varṣasahasrāṇi divyānyeva dṛḍhavrataḥ //
tato bhakṣaya māṃsāni pāpakṣayacikīrṣukaḥ

hatānāṃ caiva māṃsāni ye ca bhojyāstava priyāḥ //
evaṃ sarvairgaṇaiḥ sārddhaṃ vasa tatra suniścitaḥ

pūrṇe varṣasahasre tu sthitvā tvaṃ samale punaḥ //
gacchāśramapadaṃ paścādgautamasya mahāmuneḥ

tatra jñāsyasi cātmānaṃ gautamāśramasaṃsthitaḥ //
prasādādgautamamunerbhavatā gatakilbiṣaḥ

satataṃ pāpasampannaṃ kapālaṃ śirasi sthitam //
ṛṣiḥ pātayituṃ śaktastvatprasādānna saśaṃyaḥ

evaṃ rudraṃ varaṃ dattvā tatraivāntarhito'bhavam //
rudro'pi bhramate tatra śmaśāne pāpasaṃvṛte

ato na rocate bhūme śmaśānaṃ me kadācana //
yatra rudrakṛtaṃ pāpaṃ sthitaṃ kila bhayāvaham

etatte kathitaṃ bhadre śmaśānaṃ me jugupsitam //
vinā tu kṛtasaṃskāro mama karmaparāyaṇaḥ

prāyaścittaṃ pravakṣyāmi yena śudhyati kilbiṣāt //
kṛtvā caturthabhakṣaṃ tu dināni daśa paṃca ca

ākāśaśayanaṃ kuryādekavastraḥ kuśāsane //
prabhāte paṃcagavyaṃ ca pātavyaṃ karmaśodhanam

vimuktaḥ sarvapāpebhyo mama lokaṃ sa gacchati //
piṇyākaṃ bhakṣayitvā tu yo devamupasarpati

tasya vai śṛṇu suśroṇi prāyaścittaṃ suśodhanam //
ulūko daśa varṣāṇi kacchapastu samāstrayaḥ

jāyate mānavastatra mama karmaparāyaṇaḥ //
yāṃstu doṣānprapaśyante saṃsāre'sminvasundhare

tasya vakṣyāmi suśroṇi prāyaścittaṃ mahaujasam //
kilbiṣādyena mucyeta saṃsārāntaṃ ca gacchati

yāvakena dinaikaṃ tu gomūtreṇa ca kārayet//
rātrau vīrāsanaṃ kuryādākāśaśayane vaset

na sa gacchati saṃsāraṃ mama lokaṃ sa gacchati //
varāhamāṃsena tu yo mama kurvīta prāpaṇam

mūrkhaḥ sa pāpakarmā ca mama karmaparāyaṇaḥ //
yāṃstu doṣānprapadyeta saṃsāraṃ ca vasundhare

yāvadroma varāhasya mama gātreṣu saṃsthitam //
tāvadvarṣasahasrāṇi narake pacyate bhuvi

anyacca te pravakṣyāmi tacchṛṇuṣva vasundhare //
vārāheṇa tu māṃsena yastu kurvīta prāpaṇam

yāvat tattanusaṃsthaṃ tu bhajate tu pratiṣṭhitam //
tāvatsa patate devi saukarīṃ yonimāsthitaḥ

anyacca te pravakṣyāmi tacchṛṇuṣva vasundhare //
yāṃ gatiṃ samprapadyeta mama karmaparāyaṇaḥ

andho bhūtvā tato devi janma caivaṃ pratiṣṭhitam //
evaṃ gatvā tu saṃsāraṃ varāhamāṃsaprāpaṇāt

jāyate vipule siddhe kule bhāgavate śuciḥ //
vinītaḥ kṛtasaṃskāro mama kamarparāyaṇaḥ

dravyavānguṇavāṃścaiva rūpavāñchīlavāñchuciḥ //
prāyaścittaṃ pravakṣyāmi tasya kāyaviśodhanam

kilbiṣādyena mucyeta mama karmaparāyaṇaḥ //
phalāhāro dinānsapta sapta mūlāśanastathā

dināni sapta tiṣṭheta sapta vai pāyasena ca //
takreṇa sapta divasānsapta pāvakabhojanaḥ

prāyaścittānmahābhāge mama lokaṃ sa gacchati //
madyaṃ pītvā varārohe yastu māmupasarpati

tatra doṣaṃ pravakṣyāmi śṛṇu sundari tattvataḥ //
daśavarṣasahasrāṇi daridro jāyate punaḥ

tato bhavetsupūtātmā madbhaktaḥ sa na saṃśayaḥ //
yastu bhāgavato bhūtvā kāmarāgeṇa mohitaḥ

dīkṣitaḥ pibate madyaṃ prāyaścittaṃ na vidyate //
anyacca te pravakṣyāmi tacchṛṇuṣva vasundhare

agnivarṇāṃ surāṃ pītvā tena mucyeta kilbiṣāt //
ya etena vidhānena prāyaścittaṃ samācaret

na sa lipyati pāpena saṃsāraṃ ca na gacchati //
kausumbhaṃ caiva yaḥ śākaṃ bhakṣayenmama pūjakaḥ

narake pacyate ghore daśa paṃca ca sūkaraḥ //
tato gacchecchvayonau ca trīṇi varṣāṇi jambukaḥ

varṣamekaṃ tataḥ śudhyenmatkarmaṇi rataḥ śuciḥ //
mama lokamavāpnoti śuddho bhūtvā vasundhare

tato bhūmirvacaḥ śrutvā pratyuvāca punarharim //
kusumbhaśākanaivedyaprāpaṇena ca kilbiṣāt

kathaṃ mucyeta deveśa prāyaścittaṃ vada prabho //
śrīvarāha uvāca //
yo me kusumbhaśākena prāpaṇaṃ kurute naraḥ

daśavarṣasahasrāṇi narake paripacyate //
prāyaścittaṃ pravakṣyāmi tacca me vadataḥ śṛṇu

bhakṣaṇe tu kṛte kuryāccāndrāyaṇamatandritaḥ //
prāpaṇe tu kṛte kuryāddvādaśāhaṃ payovratam

ya etena vidhānena prāyaścittaṃ samācaret //
na sa lipyeta pāpena mama lokaṃ ca gacchati

yaḥ pārakyeṇa vastreṇa na dhūtena ca mādhavi //
prāyaścittī bhavenmūrkho mama karmaparāyaṇaḥ

karoti mama karmāṇi spṛśate māṃ tadā sthitaḥ //
mṛgo vai jāyate devi varṣāṇi trīṇi sapta ca

hīnapādena jāyeta caikaṃ janma vasundhare //
mūrkhaśca krodhanaścaiva madbhaktaścaiva jāyate

tasya vakṣyāmi suśroṇi prāyaścittaṃ mahaujasam //
yena gacchati saṃsāraṃ mama bhakto vyavasthitaḥ

aṣṭabhaktaṃ tataḥ kṛtvā mama bhaktiparāyaṇaḥ //
māghasyaiva tu māsasya śuklapakṣasya dvādaśīm

tiṣṭhejjalāśaye gatvā śānto dānto yatavrataḥ //
ananyamānaso bhūtvā mama cintāparāyaṇaḥ

prabhātāyāṃ tu śarvaryāmudite tu divākare //
pacagavyaṃ tataḥ pītvā mama karmāṇi kārayet

ya etena vidhānena prāyaścittaṃ samācaret//
sarvapāpavinirmukto mama lokaṃ sa gacchati

( akṛtvā yo navānnāni mama karmaparāyaṇaḥ //)
tato bhāgavato bhūtvā navānnaṃ yo na kārayet

pitarastasya nāśnanti varṣāṇi daśa paṃca ca //
adattvā yastu bhuñjīta navānnāni kadācana

na tasya dharmo vidyeta evametanna saṃśayaḥ //
anyacca te pravakṣyāmi yena tasmātpramucyate

prāyaścittaṃ mahābhāge mama bhaktasukhāvaham //
upavāsaṃ trirātraṃ tu tata ekena vā punaḥ

ākāśaśayanaṃ kṛtvā caturthe'hani śudhyati //
evaṃ tatra vidhiṃ kṛtvā udite ca divākare

paṃcagavyaṃ tataḥ pītvā śīghraṃ mucyeta kilbiṣāt //
ya etena vidhānena prāyaścittaṃ samācaret

sarvasaṅgaṃ parityajya mama lokaṃ sa gacchati //
adattvā gandhamālyāni yo me dhūpaṃ prayacchati

kuṇapo jāyate bhūme yātudhāno na saṃśayaḥ //
varṣāṇi caikaviṃśāni ayaskāranivāsakaḥ

tiṣṭhatyatra mahābhāge evametanna saṃśayaḥ //
anyacca te pravakṣyāmi tacchṛṇuṣva vasundhare

prāyaścittaṃ pravakṣyāmi yena mucyeta kilbiṣāt //
yasya kasyacinmāsasya śuklapakṣasya dvādaśīm

upoṣya cāṣṭabhaktaṃ tu daśaikādaśameva ca //
prabhātāyāṃ tu śarvaryāmudite ravimaṇḍale

paṃcagavyaṃ tataḥ pītvā śīghraṃ mucyati kilbiṣāt //
ya etena vidhānena prāyaścittaṃ samācaret

tāni tāni tarantyeva sarva eva pitāmahāḥ //
vahannupānahau padbhyāṃ yastu māmupacakramet

carmakārastu jāyeta varṣāṇāṃ tu trayodaśa //
tajjanmanaḥ paribhraṣṭaḥ sūkaro jāyate punaḥ

sūkaratvātparibhraṣṭaḥ śvā bhavecca jugupsitaḥ //
tataḥ śvattvātparibhraṣṭo mānuṣeṣūpajāyate

madbhaktaśca vinītaśca aparādhavivarjitaḥ //
muktastu sarvasaṃsārānmama lokaṃ sa gacchati

ya etena vidhānena vasudhe karma kārayet //
na sa lipyeta pāpena evametanna saṃśayaḥ

bherīśabdamakṛtvā tu yastu māṃ pratibodhayet //
badhiro jāyate bhūme ekaṃ janma na saṃśayaḥ

tasya vakṣyāmi suśroṇi prāyaścittaṃ mama priyam //
kilbiṣādyena mucyeta bherītāḍanamohitaḥ

yasya kasyacinmāsasya śuklapakṣe tu dvādaśī //
ākāśaśayanaṃ kṛtvā śīghraṃ mucyeta kilbiṣāt

ya etena vidhānena vasudhe karma kārayet //
aparādhaṃ na gacchettu mama lokaṃ sa gacchati

annaṃ bhuktvā bahutaramajīrṇena pariplutaḥ //
udgāreṇa samāyuktaḥ asnāta upasarpati

ekajanmani śvā caiva vānaraścaiva jāyate //
ekasmiñjanmani cchāgaḥ sṛgālaścaikajanmani

ekajanma bhavedandho mūṣako jāyate punaḥ //
tārito hyeṣa saṃsārājjāyate vipule kule

śuddho bhāgavataḥ śreṣṭhastvaparādhavivarjjita//
prāyaścittaṃ pravakṣyāmi mama bhaktasukhāvaham

kilbiṣādyena mucyeta mama bhaktiparāyaṇaḥ //
tridinaṃ pāvakāhāro mūlāhāro dinatrayam

pāyasena dinatrayyāṃ tridinaṃ saktunā tathā //
tridinaṃ vāyubhakṣo'pi ākāśaśayanastrikam

utthāyāpararātre tu kṛtvā vai dantadhāvanam//
paṃcagavyaṃ pibeccaiva śarīrapariśodhanam

ya etena vidhānena prāyaścittaṃ samācaret //
na sa lipyeta pāpena mama lokaṃ sa gacchati

ākhyānānāṃ mahākhyānaṃ tapasāṃ ca paraṃ tapaḥ //
atrāhaṃ kīrttayiṣyāmi brāhmaṇebhyo maheśvari

eṣa dharmaśca kīrttiśca ācārāṇāṃ mahaujasām //
guṇānāṃ ca paraṃ śreṣṭhaṃ ṛtīnāṃ ca mahā ṛtiḥ

ya etatpaṭhate nityaṃ kalyamutthāya mānavaḥ //
sa pitṝm̐stārayejjanturdaśa pūrvāndaśāparān

ārogyāṇāṃ mahārogyaṃ maṅgalānāṃ tu maṅgalam //
ratnānāṃ paramaṃ ratnaṃ sarvapāpapraṇāśanam

yastu bhāgavato nityaṃ paṭhate ca dṛḍhavrataḥ //
kṛtvā sarvāparādhāni na sa pāpena lipyate

eṣa japyaḥ pramāṇaṃ ca sandhyopāsanameva ca //
kalyamutthāya paṭhate mama lokaṃ sa gacchati

na paṭhenmūrkhamadhye tu kuśiṣyāṇāṃ tathaiva ca //
dadyādbhāgavate śreṣṭhe mama karmaparāyaṇe

etatte kathito devi ācārasya viniścayaḥ //
pūrvaṃ tvayā yatpṛṣṭaṃ tu kimanyacchrotumicchasi

iti śrīvarāhapurāṇe bhagavacchāstre prāyaścittakarmasūtraṃ nāma ṣaṭtriṃśadadhikaśatatamo'dhyāyaḥ