Varaha Purana · Chapter 135

atha jālapādabhakṣaṇāparādhaprāyaścittam //
śrīvarāha uvāca //
raktavastreṇa saṃyukto yo hi māmupasarpati //
tasyāpi śṛṇu suśroṇi karma saṃsāramokṣaṇam

rajasvalāsu nārīṣu rajo yattatpravarttate //
tenāsau rajasā puṣṭo karmadoṣeṇa jānataḥ

varṣāṇi daśa pañcaiva vasate tatra niścayāt //
rajo bhūtvā mahābhāge raktavastraparāyaṇaḥ

prāyaścitaṃ pravakṣyāmi tasya kāyaviśodhanam //
yena śudhyanti te bhūme puruṣāḥ śāstraniścitāḥ

ekāhāraṃ tataḥ kṛtvā dināni daśa sapta ca//
vāyubhakṣastrīṇyahāni dinamekaṃ jalāśanaḥ

evaṃ sa mucyate bhūme mama vipriyakārakaḥ //
prāyaścittaṃ tataḥ kṛtvā mamāsau rocate saha

etatte kathitaṃ bhūme raktavastravibhūṣite //
prāyaścittaṃ mahābhāge sarvasaṃsāramokṣaṇam

yastu māmandhakāreṣu vinā dīpena sundari //
spṛśate ca vinā śāstraṃ tvaramāṇo vimohitaḥ

patanaṃ tasya vakṣyāmi śṛṇuṣva tvaṃ vasundhare //
tena kleśaṃ samāsādya kliśyate ca narādhamaḥ

andho bhūtvā mahābhāge ekaṃ janma tamomayaḥ //
sarvāśī sarvabhakṣaśca mānavaḥ so'bhijāyate

ananyamānaso bhūtvā bhūme hyetatprasādhayet //
prāyaścittaṃ pravakṣyāmi andhakāre tu yaḥ purā

saṃspṛśetso'pi dharmātmā yena lokaṃ mama vrajet //
akṣṇorācchādanaṃ kṛtvā dināni daśa pañca ca

ekāhāraṃ tataḥ kṛtvā dinaviṃśaṃ samāhitaḥ //
yasya kasyāpi māsasya ekāmeva ca dvādaśīm

ekāhārastato bhūtvā niṣīdecca jalāśanaḥ //
tato yavānnaṃ bhuñjīta gomūtreṇa tu pācitam

prāyaścittena caitena mucyate pātakāttataḥ //
yaḥ punaḥ kṛṣṇavastreṇa mama karmaparāyaṇaḥ

devi karmāṇi kurvīta tasya vai pātanaṃ śṛṇu //
ghuṇo vai pañcavarṣāṇi lājavāstusamāśrayaḥ

pañca varṣāṇi nakulo daśa varṣāṇi kacchapaḥ //
evaṃ bhramati saṃsāre mama karmaparāyaṇaḥ

pārāvateṣu jāyeta nava varṣāṇi pañca ca //
jāto mamāparādhena sthitaḥ pārāvato bhuvi

mama tiṣṭhati pārśveṣu yatraivāhaṃ pratiṣṭhitaḥ //
prāyaścittaṃ pravakṣyāmi tasya saṃsāramokṣaṇe

yenāsau labhate siddhiṃ kṛṣṇavastrāparādhataḥ //
saptāhaṃ yāvakaṃ bhuktvā trirātraṃ saktupiṇḍikām

trīṇi piṇḍāṃstrirātraṃ tu evaṃ mucyeta kilbiṣāt //
ya etena vidhānena devi karmāṇi kārayet

śucirbhāgavato bhūtvā mama mārgānusārataḥ //
na sa gacchati saṃsāraṃ mama lokaṃ sa gacchati

vāsasā cāpyadhautena yo me karmāṇi kārayet //
śucirbhāgavato bhūtvā mama mārgānusārakaḥ

tasya doṣaṃ pravakṣyāmi aparādhaṃ vasundhare //
patanti yena saṃsāraṃ vāsasocchiṣṭakāriṇaḥ

devi bhūtvā gajo mattastiṣṭhatyekaṃ naro bhuvi //
uṣṭraścaikaṃ bhavejjanma janma caikaṃ vṛkastathā

gomāyurekaṃ janmāpi janma caikaṃ hayastathā //
sāraṅgastvekajanmā vai mṛgo bhavati vai tataḥ

saptajanmāntaraṃ paścāttato bhavati mānuṣaḥ //
madbhaktaśca guṇajñaśca mama karmaparāyaṇaḥ

dakṣo niraparādhaśca ahaṅkāravivarjitaḥ //
dharaṇyuvāca //
śrutametanmayā deva yattvayā samudāhṛtam

saṃsāraṃ vāsasocchiṣṭā yena gacchanti mānuṣāḥ//
prāyaścittaṃ ca me brūhi sarvakarmasukhāvaham

kilbiṣādyena mucyante tava karmaparāyaṇāḥ //
śrīvarāha uvāca //
śṛṇu tattvena me devi kathyamānaṃ mayā'naghe

prāyaścittaṃ pravakṣyāmi mama karmaparāyaṇaḥ //
yāvakena trīṇyahāni piṇyākena dinatrayam

parṇabhakṣastrīṇyahāni payobhakṣo dinatrayam //
pāyasena trirātraṃ tu vāyubhakṣo dinatrayam

evaṃ kṛtvā mahābhāge vāsasocchiṣṭakāriṇaḥ //
aparādhaṃ na vinderansaṃsāraṃ na prayānti ca

śvānocchiṣṭaṃ tu yo dadyānmama karmaparāyaṇaḥ //
pāpaṃ tasya pravakṣyāmi saṃsāre ca mahadbhayam

śvāno vai sapta janmāni gomāyuḥ sapta vai tathā //
ulūkaḥ saptavarṣāṇi paścājjāyeta mānuṣaḥ

viśuddhātmā śrutijñaśca madbhaktaścaiva jāyate //
gṛhe bhāgavatotkṛṣṭe aparādhavivarjitaḥ

śṛṇu tattvena vasudhe prāyaścittaṃ mahaujasam //
taranti mānuṣā yena tyaktvā saṃsārasāgaram

mūlabhakṣo dinatrayyāṃ phalāhāro dinatrayam //
śākabhakṣo dinatrayyāṃ payobhakṣo dinatrayam

dadhyāhāro dinatrayyāṃ pāyasena dinatrayam //
vāyvāhāro dinatrayyāṃ snānaṃ kṛtvā dṛḍhavrataḥ

evaṃ dinānyekaviṃśatkṛtvā vai śubhalakṣaṇam //
aparādhaṃ na vindeta mama lokaṃ sa gacchati

bhuktvā varāhamāṃsaṃ tu yaśca māmiha sarpati //
pātanaṃ tasya vakṣyāmi yathā bhavati sundari

varāho daśa varṣāṇi kṛtvānucarate vane //
vyādho bhūtvā mahābhāge samāḥ pañca ca sapta ca

tataśca mūṣako bhūtvā varṣāṇi ca caturdaśa //
ūnaviṃśativarṣāṇi yātudhānaśca jāyate

sallakī cāṣṭavarṣāṇi jāyate bhavane bahu //
vyāghrastriṃśacca varṣāṇi jāyate piśitāśanaḥ

evaṃ saṃsāritāṃ gatvā varāhāmiṣabhakṣakaḥ //
jāyate vipule siddhe kule bhāgavate tathā

hṛṣīkeśavacaḥ śrutvā sarvaṃ sampūrṇalakṣaṇam //
śirasā cāñjaliṃ kṛtvā vākyaṃ cedamuvāca ha

etanme paramaṃ guhyaṃ tava bhaktasukhāvaham //
varāhamāṃsabhakṣastu yena mucyeta kilbiṣāt

taranti mānuṣā yena tiryaksaṃsārasāgarāt //
gomayena dinaṃ pañca kaṇāhāreṇa sapta vai

pānīyaṃ tu tato bhuktā tiṣṭhetsaptadinaṃ tataḥ //
akṣāralavaṇaṃ sapta saktubhiśca tathā trayaḥ

tilabhakṣo dinānsapta pāṣāṇasya ca bhakṣakaḥ //
payo bhuktvā dinaṃ sapta kārayedbuddhimānmanaḥ

kṣāntaṃ dāntaṃ tathā kṛtvā ahaṅkāravivarjjitaḥ//
dinānyekonapañcāśaccaretkṛtaviniścayaḥ

vimuktaḥ sarvapāpebhyaḥ sasaṃjño vigatajvaraḥ //
kṛtvā mama ca karmāṇi mama lokaṃ sa gacchati

jālapādaṃ bhakṣayitvā yastu māmupasarpati //
jālapādastato bhūtvā varṣāṇi daśa pañca ca

kumbhīro daśa varṣāṇi pañca varṣāṇi sūkaraḥ //
tāvadbhramati saṃsāre mama caivāparādhataḥ

kṛtvā tu duṣkaraṃ karma jāyate vipule kule //
śuddho bhāgavataśreṣṭho hyaparādhavivarjitaḥ

sarvakarmāṇyatikramya mama lokaṃ sa gacchati //
prāyaścitaṃ pravakṣyāmi jālapādasya bhakṣaṇe

taranti manujā yena ghorasaṃsārasāgarāt //
yāvakānnaṃ dinatrayyāṃ vāyubhakṣo dinatrayam

phalabhakṣo dinatrayyāṃ tilabhakṣo dinatrayam //
akṣāralavaṇānnāśī punastatra dinatrayam

daśapañca dinānyevaṃ prāyaścittaṃ samācaret //
jālapādāparādhasya evaṃ kurvīta śodhanam//
vinītātmā śucirbhūtvā ya icchetsuśubhāṃ gatim

iti śrīvarāhapurāṇe jālapādabhakṣaṇāparādhaprāyaścittaṃ nāma pañcatriṃśadadhikaśatatamo'dhyāyaḥ