Varaha Purana · Chapter 123

atha sumanogandhādimāhātmyam //
sūta uvāca //
śrutvā tu kokāmāhātmyaṃ pṛthivī dharmasaṃhitam //
vismayaṃ paramaṃ yātā śrutvā dharmaṃ mahaujasam

dharaṇyuvāca //
aho prabhāvaḥ kokāyā māhātmyaṃ kroḍarūpiṇaḥ //
tiryagyonigato vāpi prāpto yatparamāṃ gatim

tava deva prasādena kiṃcidicchāmi veditum //
yanmayā pūrvapṛṣṭo'si kena dharmeṇa mānavāḥ

tapasā karmaṇā vāpi paśyanti tvāṃ hi mādhava //
prasādasumukho bhūtvā nikhilaṃ vaktumarhasi

evaṃ pṛṣṭastadā devyā mādhavyā sa tu mādhavaḥ //
prahasya punarevedaṃ vaktuṃ samupacakrame

śrīvarāha uvāca //
evametanmahābhāge yathā tvaṃ bhīru bhāṣase //
kathayiṣyāmi te dharmaṃ guhyaṃ saṃsāramokṣaṇam

gate meghāgame kāle prasannaśaradāśaye //
ambare vimale jāte vimale śaśimaṇḍale

nātiśītaṃ na cātyuṣṇe kāle haṃsavirāviṇi //
kumudotpalakahlārapadmasaurabhanirbhare

kumudasya ca māsasya bhavedyā dvādaśī śubhā //
tasyāṃ māmarcayedyastu tatprabhāvaṃ śṛṇuṣva me

yāvallokāśca dhāryante tāvatkālaṃ vasundhare //
madbhakto jāyate dhanyo nānyabhaktaḥ kadācana

kṛtvā mamaiva kāryāṇi dvādaśyāṃ tatra mādhavi//
mamaivārādhanārthāya imaṃ mantramudīrayet

mantraḥ –
brahmaṇā ca rudreṇa yaḥ stūyamānā bhavānṛṣivandito vandanīyaśca prāptā dvādaśīyaṃ te prabudhyasva jāgṛṣva meghā gatāḥ pūrṇaścandraḥ śāradāni puṣpāṇi lokanātha tubhyamahaṃ dadānīti dharmahetostava prītaye prabuddhaṃ jāgrataṃ lokanātha tvāṃ bhajamānā yajñena yajante satreṇa satriṇo vedaiḥ paṭhanti bhagavantaḥ śuddhāḥ prabuddhā jāgrato lokanātha

evaṃ karmāṇi kurvanti dvādaśyāṃ vai yaśasvini//
mama bhaktā vrataṃ śreṣṭhaṃ te yānti paramāṃ gatim

evaṃ vai śāradaṃ karma nikhilaṃ kathitaṃ mayā //
devi saṃsāramokṣārthaṃ mama bhaktasukhāvaham

iti prabodhinīkarma //
anyacca te pravakṣyāmi śaiśiraṃ karma śobhanam //
yāni karmāṇi kurvanti puṃso yānti parāṃ gatim

śītavātābhisantaptā mama bhaktyā vyavasthitāḥ //
ananyamanaso bhūtvā yogāya kṛtaniścayāḥ

śiśire yāni karmāṇi puṣpitāśca vanaspatīḥ //
taireva cārccanaṃ kṛtvā jānubhyāṃ patitaḥ kṣitau

karābhyāmañjaliṃ kṛtvā imaṃ maṃtramudīrayet

mantraḥ –
śiśiro bhavān dhātarimaṃ lokanātha himaṃ dustaraṃ duṣpraveśaṃ kālaṃ saṃsārānmāṃ tārayemaṃ dharttā trilokanātha

yastvathaitena mantreṇa śiśire karma kārayet //
sa gacchetparamāṃ siddhiṃ mama bhaktyā vyavasthitaḥ

anyacca te pravakṣyāmi tacchṛṇuṣva vasundhare //
māsaṃ mārgaśiraṃ caiva vaiśākhaṃ ca mama priyam

ahaṃ tatra pravakṣyāmi puṣpādīnāṃ ca yatphalam //
navavarṣa sahasrāṇi navavarṣaśatāni ca

tiṣṭhate viṣṇuloke'sminyo dadāti sma niścalam //
ekaikaṃ gandhapatraṃ ca dānametanmahatphalam

matimāndhṛtimānbhūtvā gandhapuṣpāṇi dāpayet //
punaranyatpravakṣyāmi gandhapatrasya yatphalam

dvādaśyāṃ caiva yo dadyāttrīnmāsāṃśca samāhitaḥ //
kaumudasya tu māsasya mārgaśīrṣasya vai tathā

vaiśākhasya tu māsasya vanamālāṃ supuṣpitām //
ekacittaṃ samādhāya gandhapuṣpāṇi yo nyaset

varṣāṇi dvādaśaiveha tena pūjā kṛtā bhavet //
śālapuṣpeṇa miśreṇa kaumudyāṃ gandhakena ca

māsi mārgaśire bhadre dadyādutpalamiśritam //
evaṃ mahatphalaṃ bhadre gandhapatrasya ca smṛtam

śrutveti vacanaṃ tasya praśrayeṇa tu mādhavi //
prahasya praṇayādvākyamityuvāca vasundharā

prabho dvādaśa māsāśca ṣaṣṭyuttaraśatatrayam //
tatra dvāveva kiṃ mahyaṃ bhagavan kiṃ praśaṃsasi

dvādaśīṃ cāpi deveśa praśaṃsasi sadā mama //
iti pṛṣṭastadā devyā dharaṇyā sa tu mādhavaḥ

prahasya tāmuvācedaṃ vacanaṃ dharmasaṃśritam //
śṛṇu tattvena me devi yenemau mama ca priyau

tithīnāṃ dvādaśī cāpi sarvayajñaphalādhikā //
tvayā dvijasahasrebhyo yatphalaṃ prāpnuyānnaraḥ

tadekaṃ saṃpradāyaiva dvādaśyāmabhivindati //
kaumudyāṃ ca prabuddho'smi vaiśākhyāṃ ca samuddhṛtaḥ

mahānādhiharo yogastenaitatprabhavo dhare //
ataḥ kaumudikāyāṃ tu vaiśākhyāṃ yatamānasaḥ

gandhapatraṃ kare gṛhya imaṃ mantramudīrayet //
mantraḥ –
bhagavannājñāpaya imaṃ bahutaraṃ nityaṃ vaiśākhaṃ caiva kārtikam

gṛhāṇa gandhapatrāṇi dharmameva pravarddhaya //
namo nārāyaṇetyuktvā gandhapatraṃ pradāpayet

puṣpāṇāṃ ca pravakṣyāmi yo guṇo yacca vai phalam //
dattvā vai gandhapatrāṇi puṣpahastaḥ śucirnaraḥ //
ॐ namo vāsudevāyetyuktvā mantramudīrayet

mantraḥ –
bhagavannājñāpaya sumanāṃsīmāni arccayituṃ māṃ sumanasaṅkuru gṛhṇīṣva sumanaskaṃ deva sugandhena te namaḥ

prāpnoti dadamānastu mama karmaparāyaṇaḥ //
na janmamaraṇaṃ caiva na glāniṃ na ca vai kṣudhām

divyaṃ varṣasahasraṃ vai mama lokeṣu tiṣṭhati //
ekaikasya tu puṣpasya puṇyametanmahāphalam

sumano gandhasambhūtaṃ yattvayā pūrvapṛcchitam

iti śrīvarāhapurāṇe sumanogandhādimāhātmyaṃ nāma trayoviṃśatyadhikaśatatamo'dhyāyaḥ