Varaha Purana · Chapter 118

atha devopacāravidhiḥ //
śrīvarāha uvāca //
śṛṇu tattvena me bhadre prāyaścittaṃ yathāvidhi //
yathāvatsa ca dātavyo mama bhaktena vidyayā

vakṣyamāṇena mantreṇa uddhṛtya dantakāṣṭhakam //
dīpaṃ na jvālayettāvadyāvanna spṛśyate dharā

dīpe prajvālite tatra hastaśaucaṃ tu kārayet //
tataḥ prakṣālya hastau tu punarevamupāgataḥ

vandayitvāsya caraṇau dantadhāvanamānayet //
anenaiva tu mantreṇa dadyādvai dantakāṣṭhakam

mantraśca –
bhuvanabhavana ravisaṃharaṇa ananto madhyaśceti gṛhṇemaṃ bhuvanaṃ dantadhāvanam

yattvayā bhāṣitaṃ sarvamevaṃ dharmaviniścayam //
dantadhāvanaṃ dante dadyādyāvatkarma vasundhare

nityaṃ śirasottārya dhṛtvā śirasi cātmanaḥ //
paścāttu jalapūtena tato hastena sundari

kāryāṇi mukhakarmāṇi svalpena salilena ca //
mukhaprakṣālane cemaṃ śṛṇu mantraṃ ca sundari

iṣṭvemamuktamantreṇa saṃsārāttu pramucyate

mantraśca-
tadbhagavantvāṃ guṇaśca ātmanaścāpi gṛhṇa vāriṇaḥ sarvadevatānāṃ mukhameva prakṣālayet //
etena mantreṇa sugandhadhūpadīpanaivedyaṃ punarevaṃ samarpayet

tataḥ puṣpāñjaliṃ dattvā bhagavan bhaktavatsala //
namo nārāyaṇetyuktvā imaṃ mantramudīrayet

mantrajñānāṃ yajñayaṣṭāraṃ bhūtasraṣṭārameva ca //
anya puṣpāṇi saṃgṛhya kalyamutthāya mādhavi

pūjayeddevadeveśaṃ jñānī bhāgavataḥ śuciḥ //
nipateddaṇḍavadbhūmau sarvakarmasamanvitaḥ // १ ३//
kāyaṃ nipatitaṃ kṛtvā prasīdeti janārddanam //
śirasā cāñjaliṃ kṛtvā imaṃ maṃtramudāharet

mantrairlabdhvā saṃjñāṃ tvayi nātha prasanne tvadicchāto hyapi yogināṃ caiva muktiḥ

.
yatastvadīyaḥ karmakaro'hamasmi tvayoktaṃ yattena devaḥ prasīdatu

evaṃ mantravidhiṃ kṛtvā mama bhaktivyavasthitaḥ //
pṛṣṭhato'nupadaṃ gatvā śīghraṃ yāvanna hīyate

evaṃ sarvaṃ samādāya mama karma dṛḍhavrataḥ //
śīghraṃ me'bhyañjanaṃ dadyāttailenātha ghṛtena vā

tataḥ snehaṃ samuddiśya maṃtrajñaḥ karmakārakaḥ //
evaṃ cittaṃ samādhāya imaṃ maṃtramudīrayet

maṃtrā ūcuḥ //
snehaṃ snehena saṃgṛhya lokanātha mayā hṛtam //
sarvalokeṣu siddhātmā dadāmyātmakareṇa ca

mayā proktaḥ kṣamasveti tubhyaṃ caiva namo namaḥ //
evaṃ maṃtraḥ samākhyātastenājyātprathamaṃ śiraḥ

dakṣiṇāṅgaṃ tato'bhyajyādvāmamaṅgaṃ tato'nu ca //
paścātpṛṣṭhaṃ samabhyajya tato'bhyajyātkaṭiṃ tathā

paścālimpettato bhūmiṃ gomayena dṛḍhavrataḥ//
tasya dṛṣṭvā śrutaṃ bhadre gomayena suniścitam

yāni puṇyānyavāpnoti tāni me gadataḥ śṛṇu //
ājyamānamapi tathā yāvantastailabindavaḥ

tāvadvarṣasahasrāṇi svargaloke mahīyate //
tataḥ puṇyakṛtām̐llokānpuruṣo yo'nulipyate

ekaikakaṇasaṃkhyātaḥ svargaloke mahīyate //
evaṃ yo'bhyañjayedgātraṃ tailena tu ghṛtena vā

tāvadvarṣasahasrāṇi mama loke pratiṣṭhati //
atha codvarttanaṃ bhadre pravakṣyāmi priyaṃ mama

yena śudhyanti cāṅgāni mama prītiśca jāyate //
bhoginā yadi vā rodhraṃ yadi pippalikāmadhu

madhūkamaśvaparṇaṃ vā rohiṇaṃ caiva karkaṭam //
eteṣāṃ prāpya labhate śāstrajñaḥ karmakārakaḥ

kareṇa tasya cūrṇena piṣṭacūrṇena vā punaḥ //
etadudvarttanaṃ kuryānmama gātrasukhāvaham

yadīcchetparamāṃ siddhiṃ mama karmānusārakaḥ //
evamudvarttanaṃ kṛtvā snānakarma tu kārayet

tata āmalakaṃ caiva vasugandhārṇamuttamam //
tena me sarvagātrāṇi marddayitvā dṛḍhavrataḥ

jalakumbhaṃ tato gṛhya imaṃ mantramudāharet //
devānāṃ devadevo'si devo'nādirabhūḥ paraḥ

tava vyaktasvarūpeṇa snānaṃ gṛhṇīṣva me'nagha //
evaṃ tu snapanaṃ kuryānmama mārgānusārakaḥ

atha sauvarṇakumbhena rajatasya ghaṭena vā //
eteṣāmapyalābhe tu karmajñaḥ karma kārayet

tāmrakumbhamayenaiva kuryātsnapanamuttamam //
evaṃ tu snapanaṃ kṛtvā vidhidṛṣṭena karmaṇā

paścādgandhaḥ pradātavyaḥ prakṛṣṭo mantrasaṃyutaḥ //
sarvagandhāḥ saumanasyāḥ sarvavarṇāśca te matāḥ

utpannāḥ sarvalokeṣu tvayā satyeṣu yojitāḥ //
mayā ca te tavāṅgeṣu tānāvaha śucīnprabho

mama bhaktyā susantuṣṭaḥ pratigṛhṇīṣva mādhava //
evaṃ gandhāṃstato dattvā utkṛṣṭaṃ karma kārayet

karmaṇyānyapi mālyāni tato mahyaṃ pradāpayet //
tadeva cārccanaṃ kṛtvā karmaṇyaḥ karmasammitaḥ

tataḥ puṣpāñjaliṃ dattvā imaṃ mantramudīrayet //
jalajaṃ sthalajaṃ caiva puṣpaṃ kālodbhavaṃ śuci

mama saṃsāramokṣāya gṛhṇa gṛhṇa mamācyuta //
evaṃvidhopacāreṇa arcayitvā mama priyam

paścāddhūpaṃ ca me dadyātsugandhadravyasammitam //
dhūpaṃ gṛhya vidhānena mayoktaṃ sukhavallabham

ubhayeṣu kuleṣvātmā dhūpamaṃtramudīrayet //
vanaspatirasaṃ divyaṃ bahudravyasamanvitam

mama saṃsāramokṣāya dhūpo'yaṃ pratigṛhyatām //
mantraḥ –
śāntirvai sarvadevānāṃ śāntirmama parāyaṇam

sāṃkhyānāṃ śāntiyogena dhūpaṃ gṛhṇa namo'stu te //
trātā nānyo'sti me kaścittvāṃ vihāya jagadguro

evamabhyarccanaṃ kṛtvā mālyagandhānulepanaiḥ//
paścādvastraṃ ca vai dadyāt kṣaumaśuklaṃ sapītakam

evaṃ caiva samādāya kṛtvā śirasi cāñjalim //
divyayogaṃ samādāya imaṃ mantramudīrayet

prīyatāṃ bhagavānpuruṣottamaḥ śrīnivāsaḥ śrīmānānandarūpaḥ //
goptā karttādhikarttā mānyanātha bhūtanātha ādiravyaktarūpaḥ //
kṣaumaṃ vastraṃ pītarūpaṃ manojñaṃ devāṃge sve gātrapracchādanāya

vastrairvibhūṣaṇaṃ kṛtvā mama gātrānusāri yat //
paścātpuṣpaṃ gṛhītvā tu āsanaṃ copakalpayet

gṛhītvā praṇavādyena dharmapuṇyena saṃvṛtaḥ

idaṃ parāyaṇaṃ parasparaprītikaraṃ prāṇarakṣaṇaṃ prāṇināṃ sviṣṭaṃ tadanukalpaṃ satyamupayuktamātmane taddeva gṛhāṇa

evaṃ tu prāpaṇaṃ kṛtvā mama mārgānusārakaḥ //
mukhaprakṣālanaṃ dattvā śīghrameva prakalpitam

śuciḥ stuvati devānāmetadeva parāyaṇam//
śaucārthaṃ tu jalaṃ gṛhṇan kṛtvā prāpaṇamutamam

evaṃ tu bhojanaṃ dattvā vyapanīya tu prāpaṇam//
tāmbūlaṃ tu tato gṛhya cemaṃ mantramudīrayet

mantraḥ -
alaṅkāraṃ sarvato devānāṃ dravyānuktau sarvasaugandhikādibhiḥ gṛhya tāmbūlaṃ lokanātha viśiṣṭamasmākaṃ ca bhavanaṃ tava pratimā ca ha

alaṅkāraṃ mukhe śreṣṭhaṃ tava prītyā mayā kṛtam //
mukhaprasādhanaṃ śreṣṭhaṃ deva gṛhṇa mayā kṛtam

etenaivopacāreṇa madbhaktaḥ karma kārayet //
anumukto mahālokānpaśyate mama nityaśaḥ

iti śrīvarāhapurāṇe bhagavacchāstre devopacāravidhirnāmāṣṭādaśādhikaśatatamo'dhyāyaḥ