વરાહ પુરાણ · અધ્યાય 117

અથ દ્વાત્રિંશદપરાધાઃ॥
શ્રીવરાહ ઉવાચ॥
શૃણુ ભદ્રે મહાશ્ચર્યમાહારવિધિનિશ્ચયમ્ ॥
આહારં ચાપ્યનાહારં તચ્છૃણુષ્વ વસુન્ધરે

ભુઞ્જાનો યાતિ ચાશ્નાતિ મમ યોગાય માધવિ ॥
અશુભં કર્મ કૃત્વાપિ પુરુષો ધર્મમાશ્રિતઃ

આહારં ચૈવ ધર્મજ્ઞ ઉપભુઞ્જીત નિત્યશઃ ॥
સર્વે ચાત્રૈવ કર્મણ્યા વ્રીહયઃ શાલયસ્તથા

અકર્મણ્યાનિ વક્ષ્યામિ યેન ભોજ્યંતિ માં પ્રતિ ॥
તેન વૈ ભુક્તમાર્ગેણ અપરાધો મહૌજસઃ

પ્રથમં ચાપરાધાન્નં ન રોચેત મમ પ્રિયે ॥
ભુક્ત્વા તુ પરકીયાન્નં તત્પરસ્તન્નિવર્ત્તનઃ

દ્વિતીયસ્ત્વપરાધોઽયં ધર્મવિઘ્નાય વૈ ભવેત્ ॥
ગત્વા મૈથુનસંયાગં યો નુ માં સ્પૃશતે નરઃ

તૃતીયમપરાધં તુ કલ્પયામિ વસુંધરે ॥
દૃષ્ટ્વા રજસ્વલાં નારીમસ્માકં યઃ પ્રપદ્યતે

ચતુર્થમપરાધં તુ દૃષ્ટં નૈવ ક્ષપામ્યહમ્ ॥
સ્પૃષ્ટ્વા તુ મૃતકં ચૈવ અસંસ્કારકૃતં તુ વૈ

પંચમં ચાપરાધં ચ ન ક્ષમામિ વસુંધરે ॥
દૃષ્ટ્વા તુ મૃતકં યસ્તુ નાચમ્ય સ્પૃશતે તુ મામ્

ષષ્ઠં તં ચાપરાધં વૈ ન ક્ષમામિ વસુંધરે ॥
મમાર્ચનસ્ય કાલે તુ પુરીષં યસ્તુ ગચ્છતિ

સપ્તમં ચાપરાધં તુ કલ્પયામિ વસુંધરે ॥
યસ્તુ નીલેન વસ્ત્રેણ પ્રાવૃતો માં પ્રપદ્યતે

અષ્ટમં ચાપરાધં ચ કલ્પયામિ વસુન્ધરે ॥
મમૈવાર્ચ્ચનકાલે તુ યસ્ત્વસમં પ્રભાષતે

નવમં ચાપરાધં તં ન રોચામિ વસુન્ધરે ॥
અવિધાનં તુ યઃ સ્પૃશ્ય મામેવ પ્રતિપદ્યતે

દશમશ્ચાપરાધોઽયં મમ ચાપ્રિયકારકઃ ॥
ક્રુદ્ધસ્તુ યાનિ કર્માણિ કુરુતે કર્મકારકઃ

એકાદશાપરાધં તુ કલ્પયામિ વસુંધરે ॥
અકર્મણ્યાનિ પુણ્યાનિ યસ્તુ મામુપકલ્પયેત્

દ્વાદશં ચાપરાધં તં કલ્પયામિ વસુંધરે ॥
યસ્તુ રક્તેન વસ્ત્રેણ કૌસુમ્ભેનોપગચ્છતિ

ત્રયોદશં ચાપરાધં કલ્પયામિ વસુન્ધરે ॥
અન્ધકારે ચ માં દેવિ યઃ સ્પૃશેત કદાચન

ચતુર્દ્દશાપરાધં તુ કલ્પયામિ વસુન્ધરે ॥
યસ્તુ કૃષ્ણેન વસ્ત્રેણ મમ કર્માણિ કારયેત્

અપરાધં પંચદશં કલ્પયામિ વસુંધરે ॥
અધૌતેન તુ વસ્ત્રેણ યસ્તુ મામુપકલ્પયેત્

ષોડશં ત્વપરાધાનાં કલ્પયામિ વરાનને ॥
સ્વયમન્નં તુ યો હ્યયાદજ્ઞાનાદપિ માધવિ

અપરાધં સપ્તદશં કલ્પયામિ વસુન્ધરે ॥
યસ્તુ માત્સ્યાનિ માંસાનિ ભક્ષયિત્વા પ્રપદ્યતે

અષ્ટાદશાપરાધં ચ કલ્પયામિ વસુંધરે ॥
જાલપાદં ભક્ષયિત્વા યસ્તુ મામુપસર્પતિ

એકોનવિંશાપરાધં કલ્પયામિ વસુંધરે ॥
યસ્તુ મે દીપકં સ્પૃષ્ટ્વા મામેવ પ્રતિપદ્યતે

વિંશકં ચાપરાધં તં કલ્પયામિ વરાનને ॥
શ્મશાનં યસ્તુ વૈ ગત્વા મામેવ પ્રતિપદ્યતે

એકવિંશાપરાધં તં કલ્પયામિ વસુન્ધરે ॥
પિણ્યાકં ભક્ષયિત્વા તુ યો મામેવાભિગચ્છતિ

દ્વાવિંશં ચાપરાધં તં કલ્પયામિ પ્રિયે સદા ॥
યસ્તુ વારાહ માંસાનિ પ્રાપણેનોપપાદયેત્

અપરાધં ત્રયોવિંશં કલ્પયામિ વસુન્ધરે ॥
સુરાં પીત્વા તુ યો મર્ત્યઃ કદાચિદુપસર્પતિ

અપરાધં ચતુર્વિંશં કલ્પયામિ વસુન્ધરે ॥
યઃ કુસુમ્ભં ચ મે શાકં ભક્ષયિત્વોપચક્રમે

અપરાધં પંચવિંશં કલ્પયામિ વસુન્ધરે ॥
પરપ્રાવરણેનૈવ યસ્તુ મામુપસર્પતિ

અપરાધેષુ ષડ્વિંશં કલ્પયામિ વસુન્ધરે ॥
નવાન્નં યસ્તુ ભક્ષેત ન દેવાન્ન પિતૄન્યજેત્

સપ્તવિંશં ચાપરાધં કલ્પયામિ ગુણાન્વિતે ॥
ઉપાનહૌ ચ પ્રપદે તથા વાપીં ચ ગચ્છતિ

અપરાધં ત્વષ્ટવિંશં કલ્પયામિ ગુણાન્વિતે ॥
શરીરં મર્દ્દયિત્વા તુ યો મામાપ્નોતિ માધવિ

એકોનવિંશાપરાધો ન સ સ્વર્ગેષુ ગચ્છતિ ॥
અજીર્ણેન સમાવિષ્ટો યસ્તુ મામુપગચ્છતિ

ત્રિંશકં ચાપરાધં તં કલ્પયામિ યશસ્વિનિ ॥
ગન્ધપુષ્પાણ્યદત્ત્વા તુ યસ્તુ ધૂપં પ્રયચ્છતે

એકત્રિંશં ચાપરાધં કલ્પયામિ મનસ્વિનિ ॥
વિના ભેર્યાદિશબ્દેન દ્વારસ્યોદ્ધાટનં મમ

મહાપરાધં જનીયાદ્દ્વાત્રિંશં તં મમ પ્રિયે ॥
અન્યચ્ચ શૃણુ વક્ષ્યામિ દૃઢવ્રતમનુત્તમમ્

કૃત્વા ચાવશ્યકં કર્મ મમ લોકં ચ ગચ્છતિ ॥
નિત્યયુક્તશ્ચ શાસ્ત્રજ્ઞો મમ કર્મપરાયણઃ

અહિંસાપરમશ્ચૈવ સર્વભૂતદયાપરઃ ॥
સામાન્યશ્ચ શુચિર્દક્ષો મમ નિત્યં પથિ સ્થિતઃ

નિગૃહ્ય ચેન્દ્રિયગ્રામમપરાધવિવર્જિતઃ ॥
ઉદારો ધાર્મિકશ્ચૈવ સ્વદારેષુ સુનિષ્ઠિતઃ

શાસ્ત્રજ્ઞઃ કુશલશ્ચૈવ મમ કર્મપરાયણઃ॥
ચાતુર્વર્ણ્યસ્ય મે ભદ્રે સન્માર્ગેષુ વ્યવસ્થિતઃ

આચાર્યભક્તા દેવેષુ ભક્તા ભર્તરિ વત્સલા॥
સંસારેષ્વપિ વર્ત્તન્તી ગચ્છન્તી ત્વગ્રતો યદિ

મમ લોકસ્થિતા સા વૈ ભર્ત્તારં પ્રસમીક્ષતે॥
પુરુષો યદિ મદ્ભક્તઃ સ્ત્રિયં ત્યક્ત્વા ચ ગચ્છતિ

સ તતોઽત્ર પ્રતીક્ષેત ભાર્યાં ભર્ત્તરિ વત્સલામ્॥
અન્યચ્ચ તે પ્રવક્ષ્યામિ કર્મણાં કર્મ ચોત્તમમ્

ઋષયો માં ન પશ્યન્તિ મમ કર્મપથે સ્થિતાઃ ॥
દ્રષ્ટવ્યા મમ લોકેષુ ઋષયોઽપિ વરાનને

કિં પુનર્માનુષા યે ચ મમ કર્મવ્યવસ્થિતાઃ ॥
અન્યદેવેષુ યે ભક્તા મૂઢા વૈ પાપચેતસઃ

મમ માયાવિમૂઢાસ્તુ ન પ્રપદ્યન્તિ માધવિ ॥
માં તુ યે વૈ પ્રપદ્યન્તે મોક્ષકામા વસુન્ધરે

તાનહં ભાવસંસિદ્ધાન્બુદ્ધ્વા સંવિભજામિ વૈ ॥
યેન ત્વં પરયા શક્ત્યા ધારિતાસિ મયા ધરે

તેનેદં કથિતં દેવિ આખ્યાનં ધર્મસંયુતમ્ ॥
પિશુનાય ન દાતવ્યં ન ચ મૂર્ખાય માધવિ

તતો ન ચોપદિષ્ટાય ન શઠાય પ્રદાપયેત ॥
નાદીક્ષિતાય દાતવ્યં નોપસર્પ્યાય યત્નતઃ

શઠાય ચ ન દાતવ્યં નાસ્તિકાય ન માધવિ ॥
વર્જયિત્વા ભાગવતં મમ કર્મપરાયણમ્

એતત્તે કથિતં દેવિ મમ ધર્મં મહૌજસમ્ ॥
સર્વલોકહિતાર્થાય કિમન્યત્પરિપૃચ્છસિ

ઇતિ શ્રીવરાહપુરાણે દ્વાત્રિંશદપરાધકથનં નામ સપ્તદશાધિકશતતમોઽધ્યાયઃ