Varaha Purana · Chapter 111

atha kapilādhenudānamāhātmyam //
hotovāca //
athātaḥ sampravakṣyāmi kapilāṃ dhenumuttamām //
yatpradānānnaro yāti viṣṇulokamanuttamam

pūrvoktena vidhānena dadyāddhenuṃ savatsakām //
sarvālaṅkārasaṃyuktāṃ sarvaratnasamanvitām

kapilāyāḥ śiro grīvā sarvatīrthāni bhāmini //
pitāmahaniyogācca nivasanti hi niścayaḥ

prātarutthāya yo martyaḥ kapilāgalamastakāt //
cyutaṃ tu bhaktyā pānīyaṃ śirasā vandate śuciḥ

sa tena puṇyatoyena tatkṣaṇāddagdhakilbiṣaḥ //
triṃśadvarṣakṛtaṃ pāpaṃ dahatyagnirivendhanam

kalyamutthāya yo martyaḥ kuryāttāsāṃ pradakṣiṇam //
pradakṣiṇī kṛtā tena pṛthivī syādvasundhare

pradakṣiṇena caikena śraddhāyuktena tatkṣaṇāt//
daśajanmakṛtaṃ pāpaṃ tasya naśyatyasaṃśayam

kapilāyāstu mūtreṇa snāyāccaiva śucivrataḥ/
sa gaṅgādiṣu tīrtheṣu snāto bhavati mānavaḥ

tena snānena caikena bhāvayuktena vai naraḥ //
yāvajjīvakṛtātpāpānmucyate nātra saṃśayaḥ

gosahasraṃ ca yo dadyādekāṃ vā kapilāṃ naraḥ //
samametatpurā prāha brahmā lokapitāmahaḥ

gavāmasthi tato'pyetanmṛtagandhena dūṣayet //
yāvajjighrati taṃ gandhaṃ tāvatpuṇyaistu pūryate

gavāṃ kaṇḍūyanaṃ śreṣṭhaṃ tathā ca paripālanam //
tulyaṃ gośatadānasya bhayarogādipālane

tṛṇādikāni yo dadyātkṣudhitena gavāhnikam //
gomedhasya phalaṃ divyaṃ labhate mānavottamaḥ

vimānairvividhairdivyaiḥ kanyābhirabhito'rpitaiḥ //
sevyamānaḥ sugandhairvai dīpyamāna ivāgnayaḥ

suvarṇakapilā pūrvaṃ dvitīyā gaurapiṅgalā //
tṛtīyā caiva raktākṣī caturthī guḍapiṃgalā

paṃcamī bahuvarṇā syātṣaṣṭhī ca śvetapiṅgalā//
saptamī śvetapiṃgākṣī tvaṣṭamī kṛṣṇapiṃgalā

navamī pāṭalā jñeyā daśamī pucchapiṃgalā //
ekādaśī khuraśvetā tvetāsāṃ sarvalakṣaṇāḥ

sarvalakṣaṇasaṃyuktā sarvālaṃkṛtasundarī //
brāhmaṇāya pradātavyā bhuktimuktipradāyinī

bhuktimuktipradā teṣāṃ viṣṇumārgapradāyinī

iti śrīvarāhapurāṇe śvetavinītāśvopākhyāne kapilādānamāhātmyaṃ nāma ekādaśādhikaśatatamo'dhyāyaḥ