વરાહ પુરાણ · અધ્યાય 111

અથ કપિલાધેનુદાનમાહાત્મ્યમ્ ॥
હોતોવાચ ॥
અથાતઃ સમ્પ્રવક્ષ્યામિ કપિલાં ધેનુમુત્તમામ્ ॥
યત્પ્રદાનાન્નરો યાતિ વિષ્ણુલોકમનુત્તમમ્

પૂર્વોક્તેન વિધાનેન દદ્યાદ્ધેનું સવત્સકામ્ ॥
સર્વાલઙ્કારસંયુક્તાં સર્વરત્નસમન્વિતામ્

કપિલાયાઃ શિરો ગ્રીવા સર્વતીર્થાનિ ભામિનિ ॥
પિતામહનિયોગાચ્ચ નિવસન્તિ હિ નિશ્ચયઃ

પ્રાતરુત્થાય યો મર્ત્યઃ કપિલાગલમસ્તકાત્ ॥
ચ્યુતં તુ ભક્ત્યા પાનીયં શિરસા વન્દતે શુચિઃ

સ તેન પુણ્યતોયેન તત્ક્ષણાદ્દગ્ધકિલ્બિષઃ ॥
ત્રિંશદ્વર્ષકૃતં પાપં દહત્યગ્નિરિવેન્ધનમ્

કલ્યમુત્થાય યો મર્ત્યઃ કુર્યાત્તાસાં પ્રદક્ષિણમ્ ॥
પ્રદક્ષિણી કૃતા તેન પૃથિવી સ્યાદ્વસુન્ધરે

પ્રદક્ષિણેન ચૈકેન શ્રદ્ધાયુક્તેન તત્ક્ષણાત્॥
દશજન્મકૃતં પાપં તસ્ય નશ્યત્યસંશયમ્

કપિલાયાસ્તુ મૂત્રેણ સ્નાયાચ્ચૈવ શુચિવ્રતઃ।
સ ગઙ્ગાદિષુ તીર્થેષુ સ્નાતો ભવતિ માનવઃ

તેન સ્નાનેન ચૈકેન ભાવયુક્તેન વૈ નરઃ ॥
યાવજ્જીવકૃતાત્પાપાન્મુચ્યતે નાત્ર સંશયઃ

ગોસહસ્રં ચ યો દદ્યાદેકાં વા કપિલાં નરઃ ॥
સમમેતત્પુરા પ્રાહ બ્રહ્મા લોકપિતામહઃ

ગવામસ્થિ તતોઽપ્યેતન્મૃતગન્ધેન દૂષયેત્ ॥
યાવજ્જિઘ્રતિ તં ગન્ધં તાવત્પુણ્યૈસ્તુ પૂર્યતે

ગવાં કણ્ડૂયનં શ્રેષ્ઠં તથા ચ પરિપાલનમ્ ॥
તુલ્યં ગોશતદાનસ્ય ભયરોગાદિપાલને

તૃણાદિકાનિ યો દદ્યાત્ક્ષુધિતેન ગવાહ્નિકમ્ ॥
ગોમેધસ્ય ફલં દિવ્યં લભતે માનવોત્તમઃ

વિમાનૈર્વિવિધૈર્દિવ્યૈઃ કન્યાભિરભિતોઽર્પિતૈઃ ॥
સેવ્યમાનઃ સુગન્ધૈર્વૈ દીપ્યમાન ઇવાગ્નયઃ

સુવર્ણકપિલા પૂર્વં દ્વિતીયા ગૌરપિઙ્ગલા ॥
તૃતીયા ચૈવ રક્તાક્ષી ચતુર્થી ગુડપિંગલા

પંચમી બહુવર્ણા સ્યાત્ષષ્ઠી ચ શ્વેતપિઙ્ગલા॥
સપ્તમી શ્વેતપિંગાક્ષી ત્વષ્ટમી કૃષ્ણપિંગલા

નવમી પાટલા જ્ઞેયા દશમી પુચ્છપિંગલા ॥
એકાદશી ખુરશ્વેતા ત્વેતાસાં સર્વલક્ષણાઃ

સર્વલક્ષણસંયુક્તા સર્વાલંકૃતસુન્દરી ॥
બ્રાહ્મણાય પ્રદાતવ્યા ભુક્તિમુક્તિપ્રદાયિની

ભુક્તિમુક્તિપ્રદા તેષાં વિષ્ણુમાર્ગપ્રદાયિની

ઇતિ શ્રીવરાહપુરાણે શ્વેતવિનીતાશ્વોપાખ્યાને કપિલાદાનમાહાત્મ્યં નામ એકાદશાધિકશતતમોઽધ્યાયઃ