Varaha Purana · Chapter 110

atha dhānyadhenudānamāhātmyam //
hotovāca//
śṛṇu rājanpravakṣyāmi dhānyadhenumanuttamām //
yasyāḥ saṃkīrtanādeva sā tuṣyet pārvatī svayam

viṣuve cāyane vāpi kārttikyāṃ tu viśeṣataḥ //
yāṃ dattvā mucyate pāpācchaśāṃka iva rāhuṇā

(tadidānīṃ pravakṣyāmi dhānyadhenuvidhiṃ param)
daśadhenupradānena yatphalaṃ rājasattama//
tatsarvameva prāpnoti vrīhidhenupradānataḥ

kṛṣṇājinaṃ tataḥ kṛtvā prāgvatsaṃsthāpayedbudhaḥ //
gomayenānuliptāyāṃ bhūmau tāṃ paripūjayet

uttamā tu bhaveddhenurdroṇaiścāpi catuṣṭayaiḥ //
madhyamā ca tadardedhena vittaśāṭhyaṃ na kārayet

caturthāṃśena vatsaṃ tu kalpayitvā vidhānataḥ //
caturthāṃśena dhenorvai vatsaṃ tu parikalpayet

kartavyau rukmaśṛṅgau tu rājatakhurasaṃyutau //
gomedaiḥ kurvīta ghrāṇaṃ aguruṃ candanaṃ tathā/७//
muktāphalamayā daṃtā ghṛtakṣaudramayaṃ mukham//
praśastapatraśravaṇaṃ kāṃsyadohanakāritām

ikṣupṛṣṭimayāḥ pādāḥ kṣaumyapucchasamanvitām //
nānāphalasamopetāṃ ratnagarbhasamanvitām

pādukopānahacchatrabhājanaṃ tarpaṇaṃ tathā//
aṅgaṃ tu pūrvavatkāryaṃ mukhaṃ kṣaudramayaṃ śubham

pūrvavaccārccayitvā tāṃ kṛtvā dīpārccanādikam//
puṇyakālaṃ ca samprāpya snātaḥ śuklāṃbaro gṛhī

triḥ pradakṣiṇamāvṛttya daṃḍavatpraṇamecca tām//
tvaṃ hi vipra mahābhāga vedavedāṅgapāraga

mayā dattāṃ ca gṛhṇīṣva prasīda tvaṃ dvijottama//
prīyatāṃ mama deveśo bhagavānmadhusūdanaḥ

yā ca lakṣmīstu govinde svāhā yā ca vibhāvasau //
śakre śacīti vikhyātā śive gaurī ca saṃsthitā

gāyatrī brahmaṇaḥ proktā jyotsnā candre raveḥ prabhā //
buddhirbṛhaspateḥ khyātaṃ medhā muniṣu sattamā

tasmātsarvamayī devī dhānyarūpeṇa saṃsthitā //
evamuccārya tāṃ dhenuṃ brāhmaṇāya nivedayet

dattvā pradakṣiṇaṃ kṛtvā taṃ kṣamāpya dvijottamam //
yāvacca pṛthivī sarvā vasuratnāni bhūpate

tāvatpuṇyaṃ samadhikaṃ vrīhidhenośca tatphalam //
tasmānnarendra dātavyā bhuktimuktiphalapradā

ihaloke ca saubhāgyamāyurārogyavarddhanam //
vimānenārkavarṇena kiṅkiṇījālamālinā

stūyamāno'psarobhiśca sa yāti śivamandiram //
yāvacca smarate janma tāvatsvarge mahīyate

tataḥ svargātparibhraṣṭo jambūdvīpapatirbhavet //
evaṃ hareṇa codgīrṇaṃ śrutvā vākyaṃ narottamaḥ

sarvapāpaviśuddhātmā rudraloke mahīyate

iti śrīvarāhapurāṇe śvetavinītāśvopākhyāne dhānyadhenudānamāhātmyaṃ nāma daśādhikaśatatamo'dhyāyaḥ