Varaha Purana · Chapter 107

atha navanītadhenudānamāhātmyam //
hotovāca //
navanītamayīṃ dhenuṃ śṛṇu rājanprayatnataḥ //
yāṃ śrutvā sarvapāpebhyo mucyate nātra saṃśayaḥ

gomayenānuliptāyāṃ bhūmau gocarmamānataḥ //
carma kṛṣṇamṛgasyeva tasyopari ca dhārayet

kumbhaṃ tu navanītasya prasthamātrasya dhārayet //
vatsaṃ caturthabhāgasya tasyāmuttarato nyaset

kṛtvā vidhānena ca rājasiṃha suvarṇaśṛṅgī sumukhā ca kāryā //
netre ca tasyā maṇimauktikaistu kṛtvā tathānyacca guḍena jihvām

oṣṭhau ca puṣpaiśca phalaiśca dantāḥ prakalpya sāsnāṃ ca sitaiśca sūtraiḥ //
jihvāṃ tathā śarkarayā prakalpya phalāni dantāḥ kambalaṃ paṭṭasūtram

navanītastanīṃ rājannikṣupādāṃ prakalpayet //
tāmrapṛṣṭhāṃ raupyakhurāṃ darbharomakṛtacchavim

svarṇaśṛṅgīṃ raupyakhurāṃ paṃcaratnasamanvitām //
caturbhistilapātraiśca saṃvṛtāṃ sarvato diśi

ācchādya vastrayugmena gandhapuṣpairalaṃkṛtām //
dīpāṃśca dikṣu prajvālya brāhmaṇāya nivedayet

mantrāsta eva japtavyāḥ sarvadhenuṣu ye smṛtāḥ //
purā devāsuraiḥ sarvaiḥ sāgarasya tu manthane

utpannaṃ divyamamṛtaṃ navanītamidaṃ śubham //
āpyāyanaṃ tu bhūtānāṃ navanīta namo'stu te

evamuccārya tāṃ dadyādbrāhmaṇāya kuṭumbine //
dhenuṃ ca dattvā sudughāṃ sopadhānāṃ nayedgṛham

havirevaṃ rasaṃ caiva vipravaryasya bhūpate//
bhuktvā tiṣṭheddinaṃ rājan dhenudastrīṇi vai dvijaḥ

yaḥ prapaśyati tāṃ dhenuṃ dīyamānāṃ narottama //
sarvapāpavinirmuktaḥ śivasāyujyatāṃ vrajet

pitṛbhiḥ pūrvajaiḥ sārddhaṃ bhaviṣyadbhiśca mānavaḥ //
viṣṇulokaṃ vrajatyāśu yāvadābhūtasaṃplavam

ya idaṃ śṛṇuyādbhaktyā śrāvayedvāpi mānavaḥ //
sarvapāpaviśuddhātmā viṣṇuloke mahīyate

iti śrīvarāhapurāṇe śvetavinītāśvopākhyāne navanītadhenudānamāhātmyaṃnāma saptādhikaśatatamo'dhyāyaḥ