Varaha Purana · Chapter 106

atha dadhidhenudāna māhātmyam //
hotovāca //
dadhidhenormahārāja vidhānaṃ śṛṇu sāṃpratam //
anulipte mahībhāge gomayena narādhipaḥ

gocarmamātraṃ tu punaḥ puṣpaprakaraśobhite //
kuśairāstīrya vasudhāṃ kṛṣṇājinakuśottarīm

dadhikumbhaṃ tu saṃsthāpya saptadhānyacayopari //
caturthāṃśena vatsaṃ tu sauvarṇaṃ mukhamaṇḍitam

ācchādya vastrayugmena puṣpagandhaistu pūjitām //
brāhmaṇāya kulīnāya sādhuvṛttāya dhīmate

kṣamādiguṇayuktāya dadyāttāṃ dadhidhenukām //
pucchadeśopaviṣṭastu mudrikākarṇabhūṣaṇaiḥ

pādukopānahau chatraṃ dattvā maṃtramimaṃ paṭhet //
dadhikrāvṇeti maṃtreṇa dadyāddhenuṃ supūjitām

evaṃ dadhimayīṃ dhenuṃ dattvā rājarṣisattama //
ekāhārī dinaṃ tiṣṭheddadhnā ca nṛpanandana

yajamāno vasedrājaṃstrirātraṃ ca dvijottamaḥ //
dīyamānāṃ prapaśyanti te yānti paramaṃ padam

ya idaṃ śṛṇuyādbhaktyā śrāvayedvāpi mānavaḥ //
so'śvamedhaphalaṃ prāpya viṣṇulokaṃ ca gacchati

iti śrīvarāhapurāṇe śvetavinītāśvāpokhyāne dadhidhenudānamāhātmyaṃnāma ṣaḍadhikaśatatamo'dhyāyaḥ