Varaha Purana · Chapter 108

atha lavaṇadhenudānamāhātmyam //
hotovāca //
lavaṇadhenuṃ pravakṣyāmi tāṃ nibodha nṛpottama //
ṣoḍaśaprasthasaṃyuktāṃ dhenuṃ kṛtvā tu mānavaḥ

anulipte mahīpṛṣṭhe kṛṣṇājinakuśottare //
dhenuṃ lavaṇamayīṃ kṛtvā ṣoḍaśaprasthasaṃyutām

vatsaṃ caturbhī rājendra ikṣupādāṃśca kārayet //
suvarṇamukhaśṛṅgāṇi khurā raupyamayāstathā

mukhaṃ guḍamayaṃ tasyā dantāḥ phalamayā nṛpa //
jihvāṃ śarkarayā rājanghrāṇaṃ gandhamayaṃ tathā //
netre ratnamaye kuryātkarṇau patramayau tathā //
śrīkhaṇḍamayakoṣṭhau ca navanītamayāḥ stanāḥ

sūtrapucchāṃ tāmrapṛṣṭhāṃ darbharomāṃ payasvinīm //
kāṃsyopadohāṃ rājendra ghaṃṭābharaṇabhūṣitām

sugandhapuṣpadhūpaiśca pūjayitvā vidhānataḥ //
ācchādya vastrayugmena brāhmaṇāya nivedayet

nakṣatragrahapīḍāṃ ca sarvakālaṃ pradāpayet //
grahaṇe vātha saṃkrāntau vyatīpāte tathāyane

dvijāya sādhuvṛttāya vedavedāṅgavedine //
dvijāya sādhuvṛttāya kulīnāya ca dhīmate

vedavedāṅgaviduṣe śrotriyāyāhitāgnaye //
īdṛśāya pradātavyā tathā'matsariṇe nṛpa

iṣṭvā caivaṃ ca mantraṃ tu pucchadeśopaviśya ca //
chatrakopānahau deye mudrikākarṇamātrakaiḥ

ācchādya vastrayugmena dakṣiṇāṃ kambalaṃ dadet //
pūrvoktena vidhānena svaśaktyā kanakena tu

brāhmaṇaṃ pūjya vidhivatpūrvoktavidhinā nṛpa //
sadakṣiṇaṃ ca gopucchaṃ dattvā brāhmaṇahastake

imaṃ mantraṃ samuccārya tatastāṃ pratipādayet //
imāṃ gṛhāṇa bho vipra rudrarūpāṃ namo'stu te

rasajñā sarvabhūtānāṃ sarvadevanamaskṛtā //
kāmaṃ pūraya me devi rudrarūpe namo'stu te

dattvā dhenuṃ tu lavaṇenaikāhaṃ caiva tiṣṭhati //
svayaṃ trirātraṃ vipreṇa tathaiva lavaṇāśinā

sahasreṇa śatenātha svaśaktyā kanakena tu //
dattvemāṃ svargamāpnoti yatra devo vṛṣadhvajaḥ

ya idaṃ śṛṇuyādbhaktyā śrāvayedvāpi mānavaḥ //
mucyate sarvapāpebhyo rudralokaṃ ca gacchati

iti śrīvarāhapurāṇe śvetavinītāśvopākhyāne lavaṇadhenumāhātmyaṃ nāma aṣṭādhikaśata tamo'dhyāyaḥ