વરાહ પુરાણ · અધ્યાય 107

અથ નવનીતધેનુદાનમાહાત્મ્યમ્ ॥
હોતોવાચ ॥
નવનીતમયીં ધેનું શૃણુ રાજન્પ્રયત્નતઃ ॥
યાં શ્રુત્વા સર્વપાપેભ્યો મુચ્યતે નાત્ર સંશયઃ

ગોમયેનાનુલિપ્તાયાં ભૂમૌ ગોચર્મમાનતઃ ॥
ચર્મ કૃષ્ણમૃગસ્યેવ તસ્યોપરિ ચ ધારયેત્

કુમ્ભં તુ નવનીતસ્ય પ્રસ્થમાત્રસ્ય ધારયેત્ ॥
વત્સં ચતુર્થભાગસ્ય તસ્યામુત્તરતો ન્યસેત્

કૃત્વા વિધાનેન ચ રાજસિંહ સુવર્ણશૃઙ્ગી સુમુખા ચ કાર્યા ॥
નેત્રે ચ તસ્યા મણિમૌક્તિકૈસ્તુ કૃત્વા તથાન્યચ્ચ ગુડેન જિહ્વામ્

ઓષ્ઠૌ ચ પુષ્પૈશ્ચ ફલૈશ્ચ દન્તાઃ પ્રકલ્પ્ય સાસ્નાં ચ સિતૈશ્ચ સૂત્રૈઃ ॥
જિહ્વાં તથા શર્કરયા પ્રકલ્પ્ય ફલાનિ દન્તાઃ કમ્બલં પટ્ટસૂત્રમ્

નવનીતસ્તનીં રાજન્નિક્ષુપાદાં પ્રકલ્પયેત્ ॥
તામ્રપૃષ્ઠાં રૌપ્યખુરાં દર્ભરોમકૃતચ્છવિમ્

સ્વર્ણશૃઙ્ગીં રૌપ્યખુરાં પંચરત્નસમન્વિતામ્ ॥
ચતુર્ભિસ્તિલપાત્રૈશ્ચ સંવૃતાં સર્વતો દિશિ

આચ્છાદ્ય વસ્ત્રયુગ્મેન ગન્ધપુષ્પૈરલંકૃતામ્ ॥
દીપાંશ્ચ દિક્ષુ પ્રજ્વાલ્ય બ્રાહ્મણાય નિવેદયેત્

મન્ત્રાસ્ત એવ જપ્તવ્યાઃ સર્વધેનુષુ યે સ્મૃતાઃ ॥
પુરા દેવાસુરૈઃ સર્વૈઃ સાગરસ્ય તુ મન્થને

ઉત્પન્નં દિવ્યમમૃતં નવનીતમિદં શુભમ્ ॥
આપ્યાયનં તુ ભૂતાનાં નવનીત નમોઽસ્તુ તે

એવમુચ્ચાર્ય તાં દદ્યાદ્બ્રાહ્મણાય કુટુમ્બિને ॥
ધેનું ચ દત્ત્વા સુદુઘાં સોપધાનાં નયેદ્ગૃહમ્

હવિરેવં રસં ચૈવ વિપ્રવર્યસ્ય ભૂપતે॥
ભુક્ત્વા તિષ્ઠેદ્દિનં રાજન્ ધેનુદસ્ત્રીણિ વૈ દ્વિજઃ

યઃ પ્રપશ્યતિ તાં ધેનું દીયમાનાં નરોત્તમ ॥
સર્વપાપવિનિર્મુક્તઃ શિવસાયુજ્યતાં વ્રજેત્

પિતૃભિઃ પૂર્વજૈઃ સાર્દ્ધં ભવિષ્યદ્ભિશ્ચ માનવઃ ॥
વિષ્ણુલોકં વ્રજત્યાશુ યાવદાભૂતસંપ્લવમ્

ય ઇદં શૃણુયાદ્ભક્ત્યા શ્રાવયેદ્વાપિ માનવઃ ॥
સર્વપાપવિશુદ્ધાત્મા વિષ્ણુલોકે મહીયતે

ઇતિ શ્રીવરાહપુરાણે શ્વેતવિનીતાશ્વોપાખ્યાને નવનીતધેનુદાનમાહાત્મ્યંનામ સપ્તાધિકશતતમોઽધ્યાયઃ